Inissiisarfittaassap inissaaleqiffiunissaa aarleqqutigineqartoq

Pineqaatissinneqarsimasunut Nuummi inissiisarfittaassaq ukiut marluk qaangiuppata ammartussatut pilersaarutigineqarpoq, inissalli naammannavianngitsut, Pinerluttunik Isumaginnittoqarfiup pisortaata aarleqqutigaa.

Allattoq Karsten Sommer

maajip 17-at 2016 07:04

Nutserisoq Mads Lynge

Aviisi ullormut saqqummersartoq Politiken ullumi taama allaaserisaqarpoq.

Kalaallit pineqaatissinneqarsimasut 36-t Herstedvesterimi parnaarussivimmi maanna inissinneqarnikuupput.

- Herstedvesterimi inissiisarneq 2018-imi atorunnaarpat, pineqaatissinneqarsimasunullu Nuummi inissiisarfittaassaq atulerpat, sakkortuumik pinerluuteqarsimasutut pineqaatissinneqarsimasut Nuummi siunissami inissinneqartalissapput. Inissallu katillugit 20-usussat naammannavianngillat, pineqaatissinneqarsimasut aatsaat ikileriarujussuarpata inissaqalissaaq, Pinerluuteqarsimasunut Isumaginnittoqarfimmi 2013-imili pisortaasimasoq Hans Jørgen Engbo oqarpoq.

Aamma atuaruk Parnaarussat Herstedvesteri Nuummit piumanerugaat

Sakkortuumik pinerluuteqarsimasutut pineqaatissinneqarsimasut ukiut qulingiluat kingulliit ingerlaneranni amerliartorsimasut maluginiarsimallugu taassuma oqaatigaa.

Hans Jørgen Engbop oqaasii inatsisinik atuutsitsinermut ministerimit Søren Pindimit, Danmarkimilu pinerluuteqarsimasunut isumaginnittoqarfiup pisortaanit oqaaseqarfigineqarumanngillat.

Pineqaatissinneqarsimasunut Nuummi inissiisarfittaassaq katillugit 76-inik inissaqassaaq, taakkunannga matoqqasumik inissiisarfimmi inissat 40-ssallutik.