Politikki

Parnaarussat Herstedvesteri Nuummit piumanerugaat

Kalaallit Herstedvesterimi parnaarussat ilaat Nuummi parnaarussivissamut nutaamut, pilersaarutit naapertorlugit 2018-imi naammassineqartussamut, nuunneqarnissartik kissaatiginngilaat. Aviisi Politiken ullumi taama allaaserisaqarpoq.

Allattoq Helle Nørrelund Sørensen

apriilip 21-at 2016 11:43

Nutserisoq Mads Lynge

Kalaallit 25-t Herstedvesterimi ullumi inissinneqarnikuupput, Politikenilu naapertorlugu taakkunannga affaasa missaat Herstedvesterimit Nuummut nuunneqarnissartik kissaatiginngilaat.

Herstedvesterimi inissinneqarsimasut ilaasa ilaqutaat Nunatsinni illoqarfimmit allamit nunaqarfimmiilluunniit Nuuliarlutik inissinneqarsimasumut pulaarniartut angalanerat Danmarkiliarnertut akeqartoq, ilaatigullumi akisunerusoq matumani pissutaatinneqarpoq.

Aamma atuaruk Pineqaatissinneqarsimasut nuunneqarnissaat suleqatigiissitamit misissorneqalersoq

Pineqaatissinneqarsimasut ilaat pineqaatissinneqarnertik naammassigunikku Danmarkimiiginnarnissartik kissaatigaat, inissinneqarsimasullu ilaat Tunumeersut Nuummi susassaqanngitsutut misigisimanertik pissutigalugu Nuummut nuunneqarnissartik kissaatiginngilaat.

Kalaallit pineqaatissinneqarsimasut pineqaatissinneqarnertik Nuummi naammassiniarneraat namminneq kissaatigisinnaassagaat Herstedvesterimi inissiisarfiup pisortaata Hanne Høegh Rasmussenip neriuutigaa, tamannali qulakkeersinnaannginnerarlugu.

Danmarkimi inatsisinut atuutsitsinermut ministereqarfiup ajornartorsiut eqqumaffigaa, Nuummilu parnaarussivittaassap 2018-imi atorneqalinnginnerani aaqqiissuteqartoqarsinnaanissaa suliniutigalugu. Politiken taama ullumi allaaserisaqarpoq.

Aamma atuaruk Hedstedvesterimut aallartitsisarunnaassapput