Pineqaatissinneqarsimasut nuunneqarnissaat suleqatigiissitamit misissorneqalersoq

Kalaallit Herstedvesterimiittussanngortinneqarlutik pineqaatissinneqarsimasut Nuummi pinerluuteqarsimasunut inissiisarfittaassamut nuunneqarnissaannut tunaartarisassat suut atorneqassanersut Pinerluttunik Isumaginnittoqarfiup ataani suleqatigiissitamit misissorneqartussanngorpoq.
Allattoq Helle Nørrelund Sørensen
aggustip 10-at 2015 10:41
Nutserisoq Simon Uldum -

Danmarkimi Pinerluttunik Isumaginnittoqarfik taama ilisimatitsivoq.

Pinerluuteqarsimasunut inissiisarfimmi Herstedvesterimi Danmarkimiittumi kalaallit 26-t ullumikkut inissinneqarsimapput, taakkulu tamarmik inissinneqartussatut pineqaatissinneqarsimapput - tassalu piffissami killiligaanngitsumi pineqaatissinneqarsimallutik. Taakkulu tassaanerupput sakkortuumik pinerluuteqarsimasut, soorlu toqutsisimasutut aammalu sakkortuumik nakuusersimasutut pineqaatissinneqarsimasut.

AAMMA ATUARUK Inissiisarfittaassap sanaartornissaanut qaartitsineq siulleq aggustimi pissaaq

Pineqaatissinneqarsimasut Danmarkimit Nuummi inissiisarfittaamut 2018-imi nuunneqarpata, Herstedvesterimi kalaallinut immikkoortortap matuneqarnissaa pilersaarutaavoq. Kalaallilli inissinneqartussatut pineqaatissinneqarsimasut tamarluinnarmik nuunneqassanersut suli nalunarallarpoq.

Taamaammat suleqatigiissitap pilersinneqaqqammersup nuutsitsinissamut tunaartarisassiornissaq isumagissavaa, ilaatigullu kalaallip pineqaatissinneqarsimasup Nunatsinni inissinneqarneratigut suut sianiginiarneqassanersut aamma misissussallugu.

Suleqatigiissitami nutaami suli ataatsimiittoqanngilaq.

Nuummi pinerluuteqarsimasunut inissiisarfittaassap sanaartorneqarnissaanut qaartitsineq siulleq aggustip 17-iani pissaaq.

 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq