RAL sipaarniassaaq: Atuisuuneq maanna akisunerulissaaq
Royal Arctic Line (RAL) aningaasanik sipaarniartariaqarpoq.
Tamanna arlalinnik pissuteqarpoq, ataaserli qularutissaanngilaq: atuisartut tassani akiliissapput.
RAL-ip nunatsinnit nunatsinnullu assartuinermut akit qaffanniarlugit aalajangerpai, taamaammat niuertarfiit aamma taamaaliortariaqassapput.
- Pisartutta akinik qaffaaneq malugissagaat qularutissaanngilaq, Brugsenip pisortaa, Susanne Christensen, oqarpoq.
Taassuma oqarnera Pilersuisumi pisortamit, Brian Chemnitzimit taperserneqarpoq. Umiarsuaatileqatigiiffiup assartuinermut akinut qaffaanera namminneq pisartumi aamma malugissagaat oqaatigaa.
- Nioqqutissaatitta akiinik qaffaaqqittariaqarpugut, taanna oqarpoq, nangilluni Pilersuisoq RAL-ip akinik qaffaaneranut pisisartunut ataasiakkaanut malunnanngitsumik aningaanik aallerfissaqanngitsoq oqaatigaa.
Pisariaqarluinnartoq
RAL-illi assartuinermut akinik qaffaaqqittariaqarnera piumasarineqanngikkaluarluni pisariaqarluinnarpoq.
RAL-imi pisortaanerup, Niels Clemensenip oqarnera naapertorlugu umiarsuaatileqatigiiffik sanaartortoqarnera ilutigalugu ukiuni arfineq-pingasuni kingullerni aningaasaqarnikkut napatissinnaasimavoq. Tamannali muminganut ingerlajartulersimavoq.
Taannaannaanngilarli:
- Aamma umiarsuarnut nutaanut aningaasaliissaagut. Umiarsuit taarserneqartariaqangajalerput, taanna oqarpoq, umiarsuarlu Irena Arctica aappaagu ukiunik 30-nngortorsiortussaq innersuussutigalugu.
Umiarsuit pisoqqat assartugassallu ikiliartortut ilutigalugit umiarsuaatileqatigiiffiup umiarsuarnik nutaanik pisinerani avatangiisinut atatillugu malinniagassaqarpoq. Tamannalu akisuvoq.
- Ullumikkut aningaasaateqanngilagut. Ukiut sisamat tallimat ingerlaneranni sipaarniassaagut, taamaalilluta umiarsuarnik nutaanik ukuninnga pisisinnaanissatsinnut aningaasaateqalissalluta, Niels Clemensen oqarpoq.
Taamaammat assartuinermut akit januaarip aallaqqaataanit 6,4 procentimik qaffanneqarnissaat RAL-ip aalajangerpaa, qaffaanerlu tassunga killeqarnavianngilaq. Umiarsuaatileqatigiiffik 2025-mi 2026-imilu 3,1 procentimik aamma 2,2 procentimik aamma qaffaaqqinniarpoq.
Nuannaarutiginnittoqanngitsoq
Annertungajassinnaavoq. Kisianni RAL-ip assartuinermut akit januaarip aallaqqaataanit 10,5 procentimik inuussutissarsiuteqartunut naalakkersuisunullu siunnersuutigigaluarpaa.
- Kisianni qaffakkiartortumik atulersitsisoqarnissaa kissaatigineqarneruvoq. Taamaammat inuussutissarsiuteqartut naalakkersuisullu akinik qaffaaneq ukiunut pingasunut tulliuttunut agguataarneqassasoq siunnersuutigaat, atuisartugut taamaalillutik tupatsinneqassanatik, Niels Clemensen oqarpoq.
- Naafferartumik qaffaaneq nuannarineqanngitsoq qularutissaanngilaq.
Brugsenimi pisortap, Susanne Christensenip akit maanna qaffasinnerpaamut qaffanneqarnerat aamma nuannaarutiginngilaa. Taamaakkaluartorli Brugsenip qaffaaneq tigullugu ukiup tullianut missingersuutini akinik qaffaaviusinnaasut misissulereerpai:
- Akinik qaffaasoqarnissaa pillugu novembarimili paasissutissiiffigineqareerpugut, tamanna ajunngilluinnarpoq, taamaalilluta missingersuutissatsinnut tamanna siulittoreersinnaavarpoq, taanna oqarpoq, nangillunilu:
- Aamma ilummut isiginiassaagut, atuisut kisimik eqqorniarnagit sumi pitsanngorsaasinnaavugut, Susanne Christensen oqarpoq.
Pilersuisumili taama neriulluartoqartiginngilaq, taakku assartuinermut akinut qaffaanissaq pillugu tallimanngormat aatsaat nalunaarfigineqarput:
- Nunatsinni atuisartut tamarmik assigalugit eqqarsarpunga: Kalaallit Nunaanni najugaqarneq inuuniarnerlu akisoreertigisoq aamma akitsoqqilerpoq. Isumaqarpunga pissutsit illuanut ingerlasariaqaraluartut.
