Utoqqaat pillugit oqaaseqartartoq: Nuummi utoqqarnut angerlarfimaffinniittunut ikiortissaaleqineq ajuippoq
Angerlarsimaffinni ikiortit qulingiluat maannakkorpiaq amigaataapput.
Pisariaqartitsiviusut kisiisa marsip aallaqqaataata tungaanut kommunimit sullinneqarallartussanngorput.
Taamaanga killinneq Utoqqaat pillugit oqaaseqartartoq, Kiista P. Isaksen, sakkortuumik isornartorsiuivoq,
- Killiffipput ajuuilluni ajorpoq, utoqqartatta inatsisitigut pisinnaatitaaffii eqquutsinneqarnatillu malinneqanngillat. Aamma isumaqarpunga ernumanartumiittugut ammalu utoqqaat taamatut nalaassaqartut ernumanartumiipput.
Utoqqaat ikiorneqanngippata sumiginnaanerusoq
Nuummi utoqqaat angerlarsimaffinni ikiorteqarnissamik pisariaqartitsut 269-iupput.
Utoqqaap pisariaqartitani tunngavigalugit ikiorneqartariaqartoq nalilerneqarpat, taava ikiorneqarnissaanut tamanna akuersissutaasoq, Kiista P. Isaksen erseqqissaavoq.
-Taava nalilersuinerit takutippagu utoqqaq ikiorneqartariaqartoq, ikiorsiissutillu akuersissutigineqarsimappata, neqeroorutititut taanna isigineqartussaanngilaq. Kisianni pisinnaatitaaffittut tinguneqartussaallutillu isumangineqartussaapput. Taamaammat taakku eqquutsinneqanngippata suminginnaaneruvoq annertoorujussuaq inatsisit matumani unioqqutinneqarmata.
Utoqqaat amerliartornerisa ilutigisaanik sulisinnaasut ikiliartorput
Nunatsinni ukioqqortusisut amerliartuinnartut sulisinnaasullu ikinneruleriartortut ukiorpanngortuni ilisimaneqarpoq.
Taamaammat oqartussaasut innuttaaasunik sullissinerminni piffinnut nutaanut naleqqussartariaqalertut, , Utoqqaat pillugit oqaaseqartartoq isumaqarpoq.
- Oqartussat ataatsimoorlutik ingittariaqalerput, iliuusissamut tikkuussinissamut aqqutissiuillutik, piffissamut qaninnerusumut kisianni aamma piffissamut ungasinnerusumut.
