Jens-Frederik Nielsen: - Inissisimaffipput suli ilungersunartuuvoq

Tysklandip kansleria Friedrich Merz, Frankrigillu præsidentia Emmanuel Macron Naalakkersuisut siulittaasuata danskillu ministeriunerata marlunngormat pingasunngormallu tikeraarpaat.

- Pitsaasumik nalilerusuppara oqaloqatigiissutigineqartut angalanitsinni naapitagullu taakkua pingaaruteqartorujummik oqaloqatigiissutissaqarfigigatsigit ornippagut taakkulu aamma nunatsinnut tapersersuinerat allatigullu naqissuseqqimmassuk pitsaavoq.

Naalakkersuisut siulittaasuat Jens-Frederik Nielsen (D) oqarpoq.

Naalakkersuisut siulittaasuata Berlinimiinnermi qaffasissumik inuussutissarsiuteqartut oqalugiarfigai Tyskillu kansleriat Friedrich Merz ataatsimeeqatigalugu. Jens-Frederik Nielsen Mette Frederiksenilu Berlinimi ataatsimiinnerit kingorna Parisimut aamma ataatsimiigiarput.

- Parisimi siullertut aamma taamatut ilisimatusarfimmut pulaarpugut ilinniartorparpassuit saqqummiiffigalugit taamatullu immaqa pingaarnertut præsident Macron ataatsimeeqatigaarput.

- Oqaloqatigiinnerit pitsaasut tassuuna ingerlappagut. Aamma alloriarfissat tullii nunatta akunneranni qanoq isikkoqarsinnaanersut ilaatigut eqqartorlugit, taanna oqarpoq.

Pissutsit suli ilungersunartut

Kalaallit Nunaat pillugu siunissami isumaqatigiissuteqarnissamut sinaakkutissat suliarineqarsimasut.

Trump inuit attaveqaqatigiittarfianni, Truth Social-imi, sapaatip akunnerata siuliani pingasunngornermi ataatsimeeqatigiinnerup kingorna allappoq.

Siunissamut isumaqatigiissutissamut immersugassamut qanoq ilaqarnersut tamanit ilisimaneqanngilaq. Tamannalu pillugu suli isumaqatigiissuteqartoqanngitsoq Jens-Frederik Nielsen erseqqissaavoq.

- Taamaattorli ilungersunartorsiorluta suli taanna oqaatigaara, suli isumaqatigiissuteqartoqanngimmat.

- Tusatsiakkat aallaavigalugit nunarput isumaqatigiinniarfigineqartut taavalu isumaqatigiissummik piareeqqasoqartumik oqariartortaarnerit taakkua eqqoqqissaanngimmata, taanna oqarpoq nangillunilu:

- Maannakkut aqqutit eqqortut atorlugit oqaloqatigiinnerni paasiniarsaraarput sunarpiaruna sumorpiaruna killittoqarnersoq. Kisianni ilungersunartumiinnitsinnut  immaqa pingaarnerpaavoq una, suli præsidentiusoq USA-mi nunarput pigerusullugu takutitsisarmat. 

- Taannalu soorunami uagutsinnut suliassaavoq annertooq, ilungersunartumilu inissisimanitsinni naqissusiilluni.

Suleqatiginnissinnaanermut nukittorsaasut

Taamaammat nunanik iligisatsinnik suleqateqarnissaq pingaaruteqartoq. Nunatsinnilu politikerit suli suliassaqartorujussuusut taassuma oqaatigaa:

- Nunarput tatiniarneqarnerani nunatta avataaninngaanniit iligisagut suleqatigineri qaninnerulersinnissaa pingaaruteqarpoq. NATO-p ataani iliuusissat pingaaruteqarput taamatullu aamma EU-mut qanimut oqaloqateqarnerput nukittorsarnissaa pingaaruteqarpoq, taannalu naalakkersuisuniit maannakkut ingerlapparput, Naalakkersuisut siulittaasuat oqarpoq.

Naak isumaqatiginninniartoqalereeraluartoq nunarput USA-mit suli tatisimaneqarnera pissutigalugu, nunanit iligisatsinnik suleqatiginnissinnaanermut suli nukittorsaassallutik naalakkersuisut siulittaasuat oqarpoq.

- Inuussutissarsiornikkut, kulturikkut, ilinniartitaanikkut allatigullu suleqatigiissinnaaneq nukittorsarnissaanut tunngasut taakkua alloriarfigissuagut ataasiakkaarlugit.

- Suliaq annertuvoq, kisianni suleqatigiikkusussuseq piummat tassani oqaloqatigiinnerit soorunami ingerlatiinnassuagut, Jens-Frederik Nielsen oqarpoq.