Pilersuisoq akinik qaffaapiloortoq: - Angajoqqaanut kisimiittunut erloqinakkunnarpoq
Per Ole Frederiksen Attumeersoq Pilersuisumut ippassaq pisiniarami tupaallappoq.
- Nerisassiornermut atortut aamma iffiornermut atortut pingaartumillu sukkutalilaallit massakkut piffissami matumani akii tassanngaannarujussuaq qaffapput, oqarpoq.
Pisiniarfimmimi akit qaffarujussuarsimapput.
Qajuusat 20 koruunit missaannik akeqartartut, ullormiit ullormut 55 koruuneqalersimasutut allagartaqalersimapput, saftilu 2 liiteri 75 koruuneqalersimalluni.
Nunaqarfimmiunullu pisoq siullermiinngilaq, siornatigummi akinik qaffaariataarneq aamma misigisareerpaat.
- Nunaqarfitsinni aammalumi nunaqarfinni allani tikittakkatsinni assorujussuaq tamanna tupigusuutigisarparput, akinik ullormiit ullormut ilaanni marloriaatit pingasoriaatit. Assupilorujussuaq pingaartumik angajoqqaanut kisimiittunut erloqinakkunnarpoq. Pingaartumik atuisuulluni akuersaaruminaattorujorujussuuvoq, Per Ole Frederiksen oqarpoq.
Nuna tamakkerlugu akinik qaffaaneq
Pilersuisoq Attumiittoq kisimi akinik ullormiit ullormut qaffaaffiunngilaq.
Aamma nunami tamarmi allani assinganik pisoqarpoq.
Kullorsuami immussuit aggoriikkat Klovborg skiveost poortat 84,95 koruuneqalersimapput aamma vaniljestangit marlukkaat 119 koruuneqalersimallutik.
Qeqertarsuamiittoq Renate Lyberth akinik qaffaasoqarneranik aatsaavissuaq misigisaqanngilaq, aappaassaali piffissap sivikitsup iluani misigalugu.
- Uani qaammatip iluanni uanga malugisanni pisisartutut, marloriarluni qaffaasoqarpoq. Siullermik qaffaaneq nammaginarpoq, kisiat massakkut qaffaaqqinneq malugisanni 10-15 kr. Inuussutissat ulluinnarni atortakkat amerlanerpaat, oqarpoq.
Akinik qaffaasaqattaartoqaannassappat ernumavoq.
- Ernumaneq pisisartutut ulluinnarni inuunitsinnut sunniunnera pillugu, aammami sunniutereerpoq. Akit taama qaffatsigisut tassami uangaannaanavianngilaq inuuniapiloortussaq. Innuttaasorpassuit ulluinnarni taanna nalaattussaanngorpaat, aamma nalaappaat.
Akinik appasitsitsiniaraluartut
Akit qaffannerannut pissutaasoq KNI-miit nalunaarutigineqartoq naapertorlugu, nunarsuarmi akinik qaffaanermik aamma assartuinermut aningaasartuuteqarnerulernermik pissuteqarpoq.
- Akinik nalimmassaanerit kittaarlugit piniarnagit aalajangeratta, sapinngisamik akit piffissami sivisunerpaami sungiusimasatut ipajaarnissaat atuutsinniarsimavarput – taamaattumik 2022-ip ukiuani akinik qaffaagattali akinik nalimmassaaqqisimanngilagut, Pilersuisumi pisortaq Brian Weuge Chemnitz oqarpoq nangillunilu:
- Maanna atuisartutta akinik qaffaangaatsiarneq misigeriataarpaat, uffa kittaarlugit qaffaanerit pinissaat piveersaaraluaripput. Pilersuisut taamaattumik niuernermik ingerlatsisut allat assigalugit akinik siunissami nalimmassaajumaarpoq.
KNI-p ilisimatitsissutigaa, inuussutissat ataasiakkaat akiisa qaffaassutaat assigiinngitsorujussuusinnaasoq. Qaffaaffiunerpaapput sioraasat, 46 procentimik atuisartunut siornali akisunerulersut. Naatitat panertitat imaluunniit allatut igariaannanngorsakkat 23 prpocentip missaannik qaffaaviupput, qajuusat issingigassat assigisaallu 20 procentimik qaffattut.
KNI-p peqatigitillugu erseqqissaatigaa, niuertutut, namminneq atuisartutik iluanaarniarfigissallugit siunertarinngikkitsik, kisiannili aningaasaqarnertik aningaasartuutinut isertitanullu nalimmassartuassallugu niuernertutut sulinerminni siunertariuaritsik.
Akit tassanngaannaq allanngortut
Ullumilu kimilluunniit ilimagineqanngitsumik pisoqariataarpoq.
Per Ole Frederiksenimi Pilersuisumut Attumiittumut ullumi iserami paasivaa ippassaq akit qaffatsitat akii titariarlugit akikilleqqinneqarsimasut.
Taamaakkaluartoq takusani suli naammaginngilai:
- Soorunalimi akitsungaatsiarsimapput appariaateqaqqikkarluarlutik, kisianni atuisuulluni aki eqqortoq assorujussuaq takorusunnaraluarpoq, Per Ole Frederiksen oqarpoq.
Pilersuisup akit qaffariarlutik ullumi appartinneqarnerat kukkusoqarsimaneranik pissuteqarnerarpai.
Aningaasartuutiviusut malillugit akinik nalimmassaaneq suliarujussuusarpoq, nalimmassagassat amerlaqimmata. Nassuerutigissavara akit ilaasa nalimmassarneqarneranni kukkusoqarsimammat – ajuusaarpunga. Soorunami akit kukkusumik atuutilersinneqarsimasut paasiortornerat malillugu akit iluarsiortorneqassapput, oqarpoq nangillunilu:
- Akinik ullumi iluarsiisoqarsimappat, taava kukkunerit sumiinneri paasisimassavarput.
Kisianni suli nalornisitsisoqarnera naammaginanngitsoq, Per Ole Frederiksen isumaqarpoq. Nunattami ilarujussuani atuisartut ataasiinnarmut niuerniarsinnaasarput, kukkusoqartillugulu niuertarfimmut tatiginnissinnaaneq ajornakusuulertarpoq:
- Pilersuisumi allamik pisiniarfissaqarnani tatiginninneq samanerujussuarmiippoq allaat peqquserluffigineqartutut misiginarluni. Akuerineqarsinnaanngilluinnarpoq, oqarpoq.
Kikkulluunniit akiliivallaarsimasut niuertarfimmukassasut, Brian Weuge Chemnitzilp kaammattuutigaa.
- Kukkuneq utoqqatsissutigeqaarput, soorunami pisisartutta akisuallaamik akiliisimasut, uppernarsaat tigummiarunikku aningaasat utertitsissinnaassavaat.
