KNI immikkut ittumik sinneqartoortoq
Ukrainemi sorsunneq aallartimmalli ikummatissap akia qaffangaatsiarnikuuvoq. Tamannalu ilaatigut aningaasanik naleerukkiartortitsisimavoq.
KNI-lli kalaallit inuiaqatigiit tamassuminnga eqqorneqannginnissaat isumagisimavaat, nunaqarfinnummi illoqarfinnullu ukiut arlalikkaartunik ikummatissamut aki qulakkeertarmassuk. Akillu qaffannginneranni aki isumaqatigiissutigisimammassuk tamanna nunatsinni aningaasanik naleerukkiartuaartitsisimanngilaq.
Tamanna aamma KNI-p immikkut ittumik sinneqartoorneranik isumaqarpoq. Isertitat umiarsuarsuit takornariartaatit, kilisaatit sakkutuullu angallatat ikummatissaannik orsersuinermit kiisalu nunarsuarmi ikummatissat akiisa nalinginnaanngitsumik allanngorarnerinut sanilliullugu akikinneruneranit pivoq.
KNI tusagassiorfinnut nalunaarummi taama nalunaaruteqarpoq.
- Ingerlatat nalinginnaasumik amerlinerisa kingunerinik atorfissaqartinneqartut tunniussinnaasimagatsigit assut sunniuteqarluarpoq pingaartumillu takornariat amerlanerunerat assut iluaqutaasimalluni, tassami takornarianiit isertitat ikummatissaasiviit, pisiniarfiit quillu aserfallatsaalineqarnissaannut aningaasaliinissaq taama ililluni aningaasassaqartinneqarluarnerulerpoq, KNI-mi siulersuisut siulittaasuat, Inger Eriksen, oqarpoq.
KNI akileraarutit suli akilinnginnerini 239 millionit koruuninik sinneqartoorpoq.
- Ukiumi naatsorsuusiorfiusumi qaangiuttumi KNI-p annertuumik sinneqartoornera ilaatigut takornariartaatileqatigiinnut ikummatissanik tunisinermit aallaaveqarpoq tamannalu inuaqatigiinnut toqqaannartumik iluaqutissanngortinnissaat siunniuppaat, Naalakkersuiusut siulittaasuat, Múte B. Egede, tusagassiorfinnut nalunaarummi taama oqarpoq.
Nutaamik periusissiortoqarnikuusoq
Siunissami tunngaviusumik ajornartorsiutaasussanut marlunnut KNI sillimaniarluni nutaamik periusiorsimavoq.
Ajornartorsiutissaq siulleq tassaavoq Nuummi, Ilulissani Qaqortumilu nutaanik mittarfeqalerpat inuit illoqarfinnut anginerusunut nutsernissaat. Suli sukkanerusumik nutsertoqarnissaanik kinguneqarnissaa KNI-p naatsorsuutigaa. Inuillu nutsernerat ilutigalugu nioqquteqarnermik ingerlatsiviup pisisartui ikiliartuinnarnissaat KNI-p naatsorsuutigaa.
Tamassuma saniatigut poortuutissat pillugit nalunaarusiornissamik pilersaaruteqartoqarnerata kinguneraa 2023-p naanerani Nuuk Imiup immiaaqqanik sodavandinillu tunisassiorniarunnaarniarluni aalajangernera. Nioqqutinik taakkunannga nunatsinni KNI kisiartaalluni siammarterisuunermini nutaamik nioqquteqartoqalernissaanut naleqqussartariaqassaaq, tamannalu ajornartorsiuterpassuarnik aaqqiivigineqartussanik nassataqartussaassaaq.
- Ajornartorsiutit taakku marluk annertuujupput, taamaattumillu pilersuisussaatitaanitta kiffartuussisussaatitaanittalu siunissami aamma ingerlatiinnarsinnaanissaanut nutaaliuutigaluta nutaanillu isertitaqaatissatsinnik pilersitsiniaatigaluta KNI-mi niuernermik ingerlatsinitsinnik naleqqussaasariaqarpugut, KNI-mi pisortaaneq, Jeppe Jensen, taama oqarpoq.
KNI A/S Kalaallit Nunaanni niuernermik pilersuinermillu suliffeqarfiit annersaraat. Suliffeqarfissuaq KNI sisamanik niuerfeqarpoq; Polaroil, Pilersuisoq, KNI engros aamma Neqi A/S.
