RAL-ip angalanissamut pilersaarutini allanngortimmagit umiarsuaq ullormik ataatsimik siusinnerusukkut tikittalissaaq

Royal Arctic Linep (RAL) angalanissamut pilersaarutai aappaagumit nutaanngussapput.

Umiarsuaq assartuissut Nuummut ullumik ataatsimik siusinnerusukkut – tassa sisamanngornermi tikittalissaaq. Umiarsuaatileqatigiiffiup angalanissamut pilersaarut patajaannerulersippaa, nioqqutissallu nutaanerusut qulakkeerlugit, RAL-ip pisortaanera, Niels Clemensen oqarpoq:

- Nuummi tallimanngornikkut niuerniartoqangaatsiartarpoq. Atugassanik nioqquteqarfiit ullormik ataatsimik siusinnerusukkut tikittalernissarput noqqaassutigaat. Silap qanoq innera soorunami naalagaaffiginngilara – kisianni allatigut nioqqutaarniarfinnut atatillugu pitsanngorsaanissamut sunniuteqarsinnaavoq, taanna oqarpoq, nangillunilu:

- Nioqqutissat tallimanngornermi ullaakkumut piareernissaat pingaarneruvoq, taamaalillutik ullup ingerlanerani nioqqutaasivimminnut ilioraasinnaallutik. Taamaammat tallimanngornermi soraaruit sapaatip akunnerata naanissaanut atugassanik pisiniarsinnaalissaatit.

Nunatsinni pisiniarfiit RAL-ip angalanissaminut pilersaarumminik allanngortitsinissaa umiarsuarmi taamaalilluni Nuummut pingasunngornikkut tikittalernissaa noqqaassutiginikuuaat, tamannali periarfissaanngitsoq, Niels Clemensen oqarpoq:

- Piffissami matumani taamaaliortoqarsinnaanngilaq, umiarsuarmimmi allamik Aarhusimi talittarfimmiittoqartarpoq, taamaammallu kranit tamarmik pingasunngornikkut atorneqartarlutik. Taamaammat sisamanngorneq periarfissani piffissami matumani pitsaanerpaavoq, taanna oqarpoq.

RAL-illi angalanissamut pilersaarutiminik allanngortitsinera atuisartunut kisimi nuannaarnermik pilersitsiniarnerunngilaq – allannguinermi umiarsuaatileqatigiiffiup nammineq aamma iluaqutigissagaa, Niels Clemensen oqarpoq:

- Siusinnerusukkut tikittalernerput sapaatip akunnerata naanerani sulivallaartorpassuaqarnissaanik pinngitsoortitsisalissaaq. Umiarsuimmi imarpikkut ingerlaartut tikikkaangata assartukkat ilarparujussui sineriammut aamma ingerlanneqaqqittartussaapput, taanna oqarpoq, nangillunilu:

- Tamanna sapaatip akunnerata naanerani sulissutigineqartarpoq. Tassuuna aningaasartuutinik annikilliisinnaavugut.