Nioqqutissat nutaat sinerissami kinguaattuussasut

Sineriammi najugaqaruit, taava ulluinnarni pisiarisartakkavit, poortukkat allallu tikinnissaat ullunik marlunnik pingasunilluunniit kinguaattuussapput.

- Nioqqutissanut tamanut tamanna atuuppoq. Suummi tamarmik Nuuk aqqutigalugu ingerlateqqinneqartaramik, Royal Arctic Linemi tuniniaanermut pisortaq, Niels Clemensen, oqarpoq.

Tukuma Arcticap kinguaattoorneranut teknikkikkut ajornartoornera pissutaavoq, taamaasilluni assartuut qaammammi uani ullunik 14-inik kinguaattooqqalluni Nuummut aatsaat aggustip 25-iani tikippoq.

Royal Arctic Linelli utaqqiisaasumik aaqqiissuteqarneratigut umiarsuaq alla atorlugu nioqqutissat nutaat aggustip 20-iani illoqarfiit pingaarnersaannut tikisinneqarput. Tamannali umiarsuaateqarfiup containerii ingerlaartinneqartut nikingassuteqarallalernerannik kinguneqartitsivoq.

Tukuma Arcticap kinguaattoornerata kingunerlutsitsinera

Utaqqiisaasumik aaqqiissutitut umiarsuaq arsartuutitut atorneqartoq Tukuma Arcticatut usitussuseqartigisimanngilaq.

- Tukuma Arcticap kinguaattoornera kingunerlutsitsivoq. Ulluni 14-ini kingullerni Nuummut nassiussuineq nalinginnaasunngoqqissimavoq, Tukumalli ajornartoornerata kinguaattoortitsinera assartuinermut atatillugu suli nassiussuinernut sivisutitsissaaq, Niels Clemensen nassuiaavoq.

Umiarsuup aserortooqqarnerani pisoq qaqutigoorluinnartuuvoq bæreleje pingaarutilik motoorip pingaarnerup sarpimmut akselianit Tukuma Arcticap sarpianut najummisoq akornuteqalermat.

Royal Arctic Linep naatsorsuutigaa sinerissami angallannerup ullunik marlunnik pingasunilluunniit kinguaattoorfiunissaa septembarimi sapaatit akunnerisa aappaata tungaanut.