Nioqqutissat nungorarnerat allatut eqqarsartariaqalersitsisoq
Ulluni makkunani niuerniarneq allatut eqqarsartariaqalersitsivoq. Pisiniarfinnimi nioqqutissat nungorarput, ullunilu makkunani ullunilu aggersuni qaninnerni nutaanik nioqqutissaqaleqqinnissaa ilimanarpallaarnani.
Umiarsuarmi assartuut, Tukuma Arctica, Nuummut aggustip aqqarnganni tikittussaagaluaq Århusip umiarsualiviani kinguaattooqqareerluni avalaqqammerpoq, Royal Arctic Line ilisimatitsivoq. Tamannalu pisiniarfinni nioqqutissat nungorarnerannik kinguneqarpoq.
- Naatsiiarsiniarlunga illoqarfik tamaat kaajallakkaluarakku soqanngilaq. Eqqumeeqaaq, Nuummiu Hansine Steenholdt oqarpoq.
- Qaqorteqqasut atuinnarsinnaavakka, imaluunniit qerisut, naatsiiat qerisut. Allanik aamma igasariaqassaanga soorlu pastat atorlugit, taanna oqarpoq.
Nioqqutissanilu nungorartut naatsiiaannaanngillat. Pisiarineqarluartartummi ilaat soorlu guuloruujut, uanitsut, vindruuat, manniit naatitarpassuillu allat aamma nungorarmata, Hansine Steenholdt allatut eqqarsartariaqartuni kisiartaaqqajanngilaq.
Erneeraq Street Ringstedimi nioqqutissanik amigaateqartunut aamma ilaavoq.
- Assigiinngitsut inerititat amigaatigivikka, naatitat aamma amigaatigivikka, taanna oqarpoq.
Taanna inuusuttunik sullissisuuvoq, nerisassaminnillu Nuup Kangerluanukannginnerminni pisinialeruttornermini amigaateqallattaavoq.
- Sapinngisara tamaaviat ujartuisaqattaarpunga pitsaanersuiuillungalu matussuserniarsarivara. Iluatsitsilaarpunga, kisianni suli amigaateqalaarpunga, taanna oqarpoq.
Nioqqutissat nutaat tikiunneqareeriarpata pisiniarfiit amigaateqarunnaalernavianngitsut
Nioqqutissaaleqiunnaarallarnaviarnatillu, Kalaallit Nunaanni Brugsenip nioqquteqarnermi pisortaa Jes Nyborg ilisimatitisvoq.
- Nioqqutissaateqannginnerput pissutigalugu pisisartugut piffissami sivisuumi pakatsisittussanngorpagut.
Assartuussuummi inerititat naatitallu Nuummut Royal Arctic Linep anngalanissamut pilersaarutaani allannguutit malillugit aggustip 25-ani tikiutereeriarpagit amerlasoorpassuit tunisinnaanaviarnagit, taassuma ilimagaa.
- Inerititat naatitallu amerlasuut tikisittakkagut ulluni 14-ini assartorneqartillutik asiusarput. Taamaammat tigugaangatsigit eqqaannartariaqartarpavut.
Timmisartukkut tikisitat
Naatitalli tamarmik umiarsuarmik Nuuliaanneqartanngillat. Naatitammi ilaat soorlu champignonit allallu timmisartukkut sapaatit akunnerannut marloriarlugit tikisittaritsik, Jes Nyborgip nassuiaatigaa.
Naatsiialli uanitsullu kiilup missaanik oqimaassuseqartut timmisartukkut tikisinniaraanni 50-60 koruunit missaanik assartornerinnaanut akeqarnerarpaa. Pisisartuminnullu taama atugassaqartitsisinnaannatik Jes Nyborg aamma nassuiaavoq.
- Pisisartuvut taama atugassaqartikkusunngilavut, taamaammat naatitanik soorlu naatsiianik tuniniagassaqarnavianngikkallassaagut, taanna oqarpoq.
Tukuma Arctica Danmarkimiit ataasinngornermi aallarpoq, tassa umiarsuit nioqqutissanik nutaanik usillutik Nuuliartut marluupput. Tukuma Arcticami usisat Islandimi usingiariarlugit umiarsuarmut allamut nuussinnarlugit Nuummut aggustip 25-ani tikittussanngortut maanna pilersaarutaalerpoq.
