Utaqqineq taamaatingajalersoq: Sapaatip akunnerata tulliani Pilersuisoq nutaanik nioqqutissaateqalissasoq
Royal Arctic Linep assartuutaa Tukuma Arctica Nuummut nioqqutissanik nutaanik nassarluni aggustip 11-ianni tikittussaasimagaluarpoq.
Sulili umiarsuaq tikissimanngilaq. Kinguaattoorneranut teknikkikkut ajornartoornera pissutaavoq.
Pisiniarfiilli maanna qilanaartuutissaqalerput, Royal Arctic Lineminni Sermitsiaq.AG-imut nalunaarutigaa sapaatiuppat aggustip 20-anni umiarsuaq nioqqutissanik nutaanik ulikkaarluni Nuummut tikinnissasoq.
Tamannalu aamma nunap sinneranut nutaanik nioqqutissaqartitsilissaaq.
Pilersuisumi pisortaq, Brian Weuge Chemnitz, KNR-imut taama oqarpoq:
- Sapaatip akunnerata tulliani nioqqutissat pisiniarfinnut agguaanneqalereerniarpasipput. Avannarpasinnerusumili sivisunerulaarsinnaavoq. Sapaatip akunnerata tulliani pisiniarfiit amerlanerpaartaat nutaanik nioqqutissaateqalissasut naatsorsuutigaara, taanna oqarpoq.
Nuummituulli sineriammi pisiniarfinni nioqqutissat arriitsumik nungukkiartuaarput. Nioqqutissallu ilaat sivisulaartumik utaqqineqassapput.
- Pisiniarfinni naatitanik nioqqutissanillu qaangiutiasunik nillataartitsivimmiittuutinik amigaateqassaagut, Brian Weuge Chemnitz oqarpoq.
Nioqqutissat qaangiutiasut tikinnissaat ullut 14-it sinnerlugit kinguaattooqqammata tikikkunik ajortereersimanissaat tamassumunnga peqqutaavoq.
Sapaatip akunnerata uuma aallartinnerani Kalaallit Nunaanni Brugseni aamma taama nalunaaruteqarpoq.
Naatitat qerisut naatsiiallu kujataaneersut
Kaallunili innarnissaq ernumagineqassanngilaq. Brian Weuge Chemnitz paasissutissiivoq Pilersuisup pisiniarfiutai nioqqutissanut nutaanut taarteqartut, assersutigalugu naatsiiat naatitallu qerisut asiunaveersaartinneqartarput.
Kujataanilu pisiniarfinni naatsiianik qujanartumik pisisoqarsinnaasimavoq - nioqqutissat taakku Nuummi amigaatigineqarput.
- Kujataani naatsiianik naatitsisartut peqatigalugit Kujataani pisiniarfinnut naatsiianik pilersuisimavugut, taanna oqarpoq.
Brian Weuge Chemnitzip oqarnera naapertorlugu sineriammi nioqqutissaaleqineq Nuumminngaanniit nalinginnaanerusoq.
Assersuutigalugu illoqarfiit immat sikusartut eqqaaniittut nioqqutissaataat immap sikunerani aasaaneranut sanilliullugu ikinnerusarput. Kisianni tamanna allatut aaqqiivigineqartarpoq.
- Nioqqutissanut nutaanut taarsiutit tassaanerusarput naatsiiat igalaaminermik puullit qerisullu aamma naatitat qerisut. Taakku uagut pisisartuttalu sungiusimaneruaat, taanna oqarpoq.
Nuummi pisiniarfiit pilersaarut malillugu sapaatiuppat nutaanik nioqqutissaateqaqqilissapput.
