Nioqqutissanik assartuussuaq ullunik 14-inik kinguaattooqqeriaannartoq
Nioqqutissanik assartuussuaq Tukuma Nuummut tallimanngormat tikittussaagaluarpoq, teknikkikkulli ajornartoorluni Århusip umiarsualivianiit suli avalanngilaq. Taamaammat nioqqutissanik assartuussuup taassuma Danmarkimiit nunatsinnut tikinnissaa kinguaattooqqeriaannarpoq.
Assartuussuup Tukumap Island aqqusaareerpagu Nuummut aggustip ulluisa 25-anni tikinnissaa naatsorsuutigineqarpoq. Royal Arctic Line, RAL, nittartakkamini sapaatit akunnerata naanerani taama allappoq. Taamaammat nioqqutissanik nutaanik ilaatigut paarnanik naatitanillu assartuussuup Tukumap tikinnissaa RAL-ip angalanissamut pilersaarutaani allannguutit malillugit ullunik 14-inik kinguaattooqqeriaannarpoq.
Teknikkikkut ajornartoornermi ilimagisamit iluarsagassaqarnerunera assartuussuup Tukumap tikinnissaata kinguaattooqqeriaannarneranut peqqutaasoq, RAL nittartakkamini ilisimatitsivoq.
Tukumap Danmarkimiit usii umiarsuarmik allamik Århusimiit Reykjavikkiliaanneqariarlutik umiarsuarmik aamma allamik Reykjavikkimiit Nuuliaanneqassapput. Umiarsuit allat marluk taakku usiminnik Reykjavikkimi paarlaatereerunik nioqqutissat nunatsinneersut Danmarkiliaatissavaat, aamma nioqqutissat nutaat Danmarkimeersut Nuuliaanneqassapput.
Assartuussuaq Tukuma Nuummut tikereeriarpat, pajuttaatit nioqqutissanik nutaanik nunatta sinneranut qaqugu assartuilissanersut, RAL-ip oqaatigisinnaanngikkallarpaa.
