Akit qaffannerat qinikkat isornartorsiorpaat: Akuersaarneqarsinnaanngilaq
Ullormiit ullormut akit qaffariarujussuarput.
Nuna tamakkerlugu Pilersuisup pisiniarfiini pisisartut sapaatip akunnerata matuma aallartinnerani tamanna siumorpaat.
Tamannalu Inatsisartunut ilaasortanit sakkortuumik isornartorsiorneqarpoq.
- Tassami aalassatsitsingaatsiaannanngilaq, akuerineqarsinnaanngitsumik killiffeqartoqarpoq, Naleraq sinnerlugu Inatsisartunut ilaasortaq Jens Napãtôk oqarpoq.
Siumut sinnerlugu Inatsisartunut ilaasortamit Lars Poulsenimit taperserneqarpoq.
- Isumaqarpunga paasissutissanik eqqortunik pisariaqarluta, taamatut qaffaarujussuarneq akueriuminaappoq, oqarpoq.
Kukkuneruvoq
KNR marlunngornermi oqaluttuarpoq, Pilersuisup pisiniarfiini arlalinni akit qaffarujussuarsimasut. Qajuusat 2 kilot siornatigut 20 koruuneqartut ullormiit ullormut 55 koruuneqaleriasaarput, saftilu 2 liiteri 75 koruuninik akitsorluni.
Pisiassalli arlaqartut akikilleqqinneqarput. Taamaaliortoqarporlu nioqqutissat ilaasa akiinik Pilersuisoq kukkusimammat.
Assersuutigalugu qajuusat maanna 28 koruuningajannik akeqarput.
- Kukkulluni akilersuisoqarnera apeqqusernartorujussuuvoq aamma akuersaarneqarsinnaanngilaq, Kristian Jeremiassen, Inuit Ataqatigiit sinnerlugit maanna Inatsisartuniittoq oqarpoq, nangillunilu:
- Kukkuneq angivallaaqaaq, ullormiillu ullormut akit akitsoriarlugit akikilleqqinneqarnerat illersorneqarsinnaanngilaq. Pilersuisumi tamanna aqunneqartariaqarpoq pisisartunut akiliisitsiinnarani.
Kukkuneq eqqumaffigigitsik, KNI- mi pisortaaneq Jeppe Jensen ilisimatitsivoq.
Oqarpoq kukkunerup qanoq pisimanera ilisimagitsik taamaammallu taama pisoqaqqinnissaa pinngitsoortissinnaallugu.
Pisiassat akikinnerpaatinniarsaraat
KNI naapertorlugu akit tassanngaannaq allanngornerannut pissutaavoq nunarsuarmi nioqqutissat akiisa qaffannerat assartuinermullu aningaasartuutit akitsornerat.
KNI-mi pisortaaneq, Jeppe Jensen, KNR-imut ilisimatitsivoq, siorna septembarimili akit qaffanneqannginnissaat sulissutigisimallugu, nunarsuarmi akit appaqqinnissaat neriuutigalugu. Akilli qaffakkiartuinnarmata nunatsinni akit aamma qaffattariaqarsimapput.
Nassuiaalli tamanna Inatsisartunut ilaasortanit iluarineqanngilaq.
- Siornatigut kukkussutaasarsimasut pisisartunut tuttarnerat akueriunnaarlugu nalimmassaasariaqalerpoq nutaamik eqqarsarluni aaqqiisoqartariaqalerpoq, Jens Napãtôk oqarpoq.
Lars Poulsen aamma isumaqataavoq. Alloriaqqinnissamullu piareersimavoq:
- Naalakkersuinikkut qulaajaaneq, tassani misissuititsinermik kinguneqassappat taannalu piaartumik aaqqissuunneqassasoq piumasaraarput, oqarpoq.
Naatsorsuutini kukkuneq pissutaanngilaq
KNI-mi naatsorsuutinik 112 millionit koruuninik nalilimmik uukapaatitsisoqarsimasoq 2021-mi saqqummerpoq.
Akit qaffapiloornerannut tamanna ilaatigut pissutaasoq Naleqqamit Hans Enoksen isumaqarpoq. Tusagassiorfinnut nalunaarummi taama allappoq.
KNI-miilli tamanna akerlinerneqarpoq.
- Tamanna sakkortunerpaamik akerlilerpara taamannallu oqartut ilumuunngillat. Akit qaffannerat naatsorsuutini uukapaatitsisimanermut tunngassuteqanngilaq. Uukapaatitsinerit 2012-imit 2020-mut pipput, inunniillu ataasiakkaanit piliarineqarlutik, qulaajarneqareersimallutillu, Suliaq politiinut ingerlateqqinneqareerpoq.
- Siornatigut uukapaatitsisimanerit akit qaffannerannut attuumassuteqarnerarneqarnerat taamaammat akerlilerluinnarpara, KNI-mi pisortaaneq Jeppe Jensen oqarpoq.
Pilersuisumi nioqqutissani 6.000-iusuni nioqutissat 2.500-t agguaqatigiissillugu 10,5 procentimik akitsorput.
- Akitsoriaataat taakku pisiarineranni akigitinneqartunut naleqqupput. Erseqqissaassutigerusoqaara nioqqutaatitsinnit iluanaarutigut siornatigornit amerlanerunngimmata. Aamma kissaatiginngilarput, Jeppe Jensen oqarpoq.