Qimmit qimuttut pillugit suliaq: Unioqqutitsilluni eqqussisoqarsimasinnaaneranut politiinut tunniussisoqarsimavoq
Qeqertarsuarmiut kangerlummiullu qimussertartut Avannaata Qimussersuanut ukioq manna mattunneqarnerat. Qimmip qimuttup DNA-vanik misissuinerit siullersaat. Qimmillu sarliap piaraatalu kiserngoruttup ataatsip toqunnerat.
SULIAP INGERLANIKUUNERA:
Januar 2018:
- Kalaallit Nunaanni Qimussertartut Kattuffiat, KNQK, pasilliutinik anngussivigineqarpoq.
Oktober 2018:
- KNQK-p Qeqertarsuarmiut Kangerlummiullu pasilliuteqartoqarnera pissutigalugu oktobarip 17-ani 2018-mi Avannaata Qimussersuanut mattummagit suliaq avammut saqqummiunneqarpoq.
November 2018:
- Inatsisartut aalisarnermut piniarnermullu ataatsimiititaliaata taamani aalisarnermut piniarnermullu naalakkersuisuusoq qimmit pasilliutigineqartut DNA-vi misissorneqassasut piumasaraat. Misissuiffigineqalereerpulli.
Marts 2019:
- Kukkuluttuttoqarneratigut DNA-mik misissuineq januarimili piareersimasussaangaluaq kinguarpoq.
Maj 2019:
- DNA-mik misissuineq piareerpoq - inernerali isertuunneqarpoq.
Juni 2019:
- Kommune Qeqertalimmit uppernarsarneqarpoq qimmillip kissaateqarneratigut qimmit pasilliutigineqartut oktobarip 25-ani 2018-imi toqunneqarsimasut.
Juli 2019:
- Aalisanermut piniarnermullu naalakkersuisup uppernarsarpaa innuttaasup suliamut akuusup inatsisitigut innarlitsaaliugaanerata qulakkeerneqarnissaa kiisalu sulianik suliarinnittarnermi pisortat sulianik pineqaatissiissutaasinnaasunik suliaqarneranni tunngaviinut malittarisassat eqqortinneqartussaaneri.
Tassa tamakkua tamarmik pipput qimmit allanertat marluk Nuummit Qeqertarsuarmut 2017-ip aasaanerani eqqunneqarsimasutut pasilliutigineqartut siorna saqqummiunneqarmata.
Qimmip qimuttup allanertanik akuneqaratarsinnaanera illersorniarlugu Kalaallit Nunaanni Qimussertartut Kattuffiata qimussertartut qeqertarsuarmiut kangerlummiullu Avannaata Qimussersuanut ukiut ataatsip matuma siorna mattummagit suliaq avammut saqqummiunneqarpoq. Kattuffiummi Qeqertarsuarmi qimmit allanertanik akuneqaratarsinnaaneri ernummatigivaat - taamaattumillu kattuffiup qimmip qimuttup qimminik allanertanik akuneqarsinnaanera illersorniarlugu taamaaliorput.
AAMMA ATUARUK Qimussertartut allamiut qimmiinik akusanngortitsisimasutut pasineqartut
Politiit suliakkiut maanna misissuiffigaat
Suliarlu maanna unnerluussisussaatitaasunut anngussimalerpoq.Tamanna Kalaallit Nunaanni Politiit uppernarsarpaat. Taakkuami Namminersornerullutik Oqartussanit suliassanngortitsiffigineqarsimapput.
- Uppernarsarsinnaavara Namminersorlutik Oqartussanik qimmeqarnermut qitsuuteqarnermullu inatsimmik unioqqutitsisoqarsimasinnaaneranut suliakkiummik tigusisimanerput, Kalaallit Nunaanni Politiini unnerluussisussaatitaasut pisortaat, Morten Nielsen, taama oqarpoq.
Taamaammat Kalaallit Nunaanni Politiit qimmeqarfinnut qimminik allanertanik ilumut eqqussisoqarsimanersoq maanna misissorpaat.
- Uani politiit misissugassaat tassaavoq inatsimmik unioqqutitsisoqarsimasoq. Aamma unioqqutsitsineq akiligassiinermik assigisaanilluunniit kinguneqartissinnaanersoq, Morten Nielsen nassuiaavoq.
AAMMA ATUARUK DNA-mik misissuineq piareertoq
Pineqaatissiissutaasinnaasoq: Akiligassiissut
Morten Nielsenip qimminik allanertanik qimmeqarfinnut eqqussisoqarsimassappat tamanna qanoq kinguneqartinneqarumaarnersoq suli oqaatigisinnaanngilaa.
- Kisianni oqarsinnaavunga qimmeqarnermut inatsimmi unioqqutitsisoqarsimatillugu akiligassiinernik kinguneqakkajuttartoq, Morten Nielsen oqarpoq.
Nunatsinni qimmeq qimuttoq illersorniarlugu qimmit qimuttut kisimik qimuttoqarfinneeqqusaapput, taamatullu qimmit allanertat qimmeqarfinnut eqqunneqarnissaat inerteqqutaalluinnarluni.
Kisianni qimmeqarneq qitsuuteqarnerlu pillugit inatsimmi qimmit qimuttut qimminik allanertanik akuneqarsinnaanerat immikkut inerteqqutigineqanngilaq.
Taamaattorli Naalakkersuisut qimmeqarneq qitsuuteqarnerlu pillugu massakkut inatsimmut nutarsaassutaasussaq inatsisissaq nutaaq upernaaq tusarniaassutigivaat. Tassani ilaatigut aalajangersangaatinniarneqarpoq Naalakkersuisut piaqqiortitsinermut, allisaanermut, nipitartitsinermullu malittarisassiorsinnaassasut.
Nunatsinni qimmit qimuttut ikiliartupiloorput. Nunatsinni qimminik qimuttunik 15.000-it missaanik ullumikkut qimmeqarpoq. Taakkualu ukiut 20-t matuma siorna amerlassusaasunit affaannaapput.
AAMMA ATUARUK To hunde aflivet i Qeqertarsuaq