Naalakkersuisoq Jens Immanuelsen kalaallit qimmii qimuttut akusaasimanersut pillugu misissuineq maanna oqaaseqarfigisinnaanagu oqarpoq.

Qimmit marluk allanertatut pasineqartut Qeqertarsuarmi toqunneqartut

Qimmit qimuttut qimminik allanik akuneqarsimanersut pillugu misissuineq mianernartillugu naalakkersuisoq akisussaasuusoq oqaaseqarusunnani oqarpoq. Qeqertarsuarmili qimmit toqunneqarsimasut paasissutissiissutigaa.

- Qimmit taamak pasitsaanneqarsimasut pineqartut inuttaata saaffiginninnera tunngavigalugu tamakkerlugit toqunneqarsimasut oqaatigineqarpoq, aalisarnermut, piniarnermut nunalerinermullu naalakkersuisoq, Jens Immanuelsen oqarpoq.

Qimmillu marluk Nuumminngaanniit Qeqertarsuarnut eqqunneqarsimasutut pasineqartut toqunneqarsimasut kommunimit uppernarsarneqarpoq.

- Kommunip iliuusia aallaaveqarpoq, qimminik piginnittuusoq qimmit taakkua pineqartut pillugit kommunimut saaffiginnissimavoq taakkua qimmiutini kissaatigalugu toqunneqarnissaat, Kommune Qeqertallip pisortaanera, Hans Peter Poulsen oqarpoq.

Kalaallit qimmii qimuttut akuneqatsaaliorneqarnissaat inatsisitigut qulakkeerniarneqarpoq.

AAMMA ATUARUK Qimmit pillugit suliaq nutaaq ataatsimiissutigineqarpoq

Qimmit qimuttut qimminik allanik akuneqarsimanissaat ukioq ataaseq affarlu matuma siorna pasitsaanneqarpoq.

Qimmit qimuttut akusaasimasinnaanerannut suliaq aamma allanik kinguneqareerpoq, ilaatigut Qeqertarsuarmiut Kangerlummiullu Avannaata Qimussersuaniit ilaaqqusaajunnaarallarlutik.

Pisortallu qimmit pillugit misissuisitsinerat sivisuvallaartutut nunatsinni qimussertartut kattuffiannit isornartorsiorneqareerpoq.

AAMMA ATUARUK Pisortat qimmit pillugit misissuisitsinerat sivisuallaarpoq

Misissuinerullu inernerata qimmilinnut paasineqajaarnissaa pingaartuusoq, suliamulli oqaaseqarnissaq suli mianernartoq Jens Immanuelsen oqarpoq.

- Qimmeqatigiinnut piginnittut inuttut aamma illersugaapput. Taamaattumik suliap mianernartumik killeqqanera peqqutigalugu taanna annerusumik oqaaseqarfigisinnaanngilara, aalisarnermut, piniarnermut nunalerinermullu naalakkersuisoq, Jens Immanuelsen oqarpoq.

AAMMA ATUARUK DNA-mik misissuineq piareertoq

Qimmit qimuttut allanik akusaanissaata inerteqqutaanera ersernerluppallaarsimassappat, inerteqqutaanera pillugu qaammarsaasoqarnerusariaqartoq Jens Immanuelsen isumaqarpoq.

Qeqertarsuarmi qimmit massakkut 289-iupput Kangerlummi 32-ullutik.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat