KNQK: Qimmit pillugit suliaq nutaaq ataatsimiissutigineqarpoq
Suliassarlu nutaaq nalunaarutigineqartoq Kalaallit Nunaanni Qimussertartut Kattuffiata siulersuisuunerisa tallimanngornermi ualilluartoq immikkut ataatsimiinnerminni eqqartorpaat.
- Siulersuisuunerit ataatsimeereertinnagit annerusumik oqaaseqarsinnaanngikkallarpunga. Kisianni uppernarsarsinnaavara suliassamik allamik tassa qaqitsisoqartoq. Qeqertarsuarmi pisup saniatigut. Sumiiffillu allaavoq, KNQK-imi siulittaasoq Mikkel Jeremiassen taama oqarpoq.
Kalaallit Nunaanni Qimussertartut Kattuffiannit suliassanngortitsineq nutaaq pillugu tusagassiuutinut kingusinnerusukkut nalunaaruteqarumaarlutik ilisimatitsipput.
Pisoq erloqinartoq
Qeqertarsuarmi Kangerlummilu qimuttut Kalaallit Nunaanni Qimussertartut Kattuffiata qimussertitsinissaanni tamani killiligaanngitsumik peqataaqqusaajunnaartut, sapaatip akunnerata aallartinnerani sammivarput.
Kalaallit qimuttuinit allaanerusut marluk Qeqertarsuarmut eqqunneqarsimasut oqaatigineqarpoq. Tamatumalu kingunerisaanik Qeqertarsuarmi qimmit assigiinngitsut marluk nuliutinneqarlutik piaqqiortinneqarsimanerat pasitsaanneqarpoq.
- Erloqinartorujussuuvoq aammalu imaannaanani, qimussertartut kattuffianni siulittaasoq, Mikkel Jeremiassen oqarpoq.
