Qimmit qimuttut: DNA-mik misissuineq piareertoq

Qimmit allanertat marluk Nuummit Qeqertarsualiaanneqarsimasutut pasitsaanneqareersullu Kalaallit Nunaanni Uumasunut Nakorsaqarfimmi Inuussutissalerinermullu Oqartussaaffimmi sulisoq qimmit DNA-vanik tigusivoq qimmit allanertaasutut pasitsaanneqartut takuinnarlugit aalajangiunneqarsinnaanngimmat allanertaanersut.

AAMMA ATUARUK Qimmip DNA-vanik misissuineq kinguaattoorfiuvoq

Qimmilli qimuttut DNA-vanik suli misissuisoqarnikuunngimmat, misiliutit qimmit pillugit ilisimatuussutsikkut misissuisunut, Qimmeq Projektimut, nassiunneqarput. Taakkualu ilaatigut kukkussuteqarnermikkut kinguaattooreerlutik misissuinertik maanna naammassisimalerpaat.
 
- Suliami killiffik tassaavoq misissuinerup inernerigallangaanik pissarsinerput. Kisianni misissuinermit nalunaarusiaq avammut saqqummiussinnaanngikkallarparput, Egill Steingrimsson, Kalaallit Nunaanni Uumasunut Nakorsaqarfimmi Inuussutissalerinermullu Oqartussaaffimmi, uumasut nakorsaanerat, oqarpoq.

AAMMA ATUARUK Qimussertartut allamiut qimmiinik akusanngortitsisimasutut pasineqartut

Kalaallit Nunaanni Uumasunut Nakorsaqarfimmi Inuussutissalerinermullu Oqartussaaffimmi suliaq suli naammassivissorneqanngimmat annertunerusumik oqaaseqaqqikkusunngikkallarput, inernerugallartummi Naalakkersuisunut ilaatigut saqqummiunneqaqqaassammata.

- Kisianni misissuinerup inernera pigaarput. Aamma Naalakkersuisoqarfiup pisortaa Naalakkersuisullu misissuinerup inerneranik avammut nalunaaruteqannginnitsinni ilisimateqqaartussaavagut, Egill Steingrimsson oqarpoq.