Qeqqata Kommuniani ilaqutariit paarsisartut feeriarnerminni aningaasanik ikiorserneqartalissapput

Ilaqutariit meeqqaanik paarsisartut qitornarsiatik Danmarkimut nunatsinnilu feeriarnerminni angalaqatigisarnissaannut aningaasanik ikiorserneqartarnissaat Qeqqata Kommuniata kommunalbestyrelsiani ilaasortat sisamangormat ullaakkut ataatsimiinnerminni isumaqatigiissutigaat.

Tamannalu Qeqqata Kommuniani atugarissaarnermut ataatsimiititaliami siulittaasup Juliane Enoksenip (IA) nuannaarutigaa:

- Nuanneqaaq periarfissinneqarmata meeqqat ilaqutariinni paarsisartuniittut taavalu ilaqutariit paarsisartut taamatut periarfissinneqarnerat isumalerujussuuvoq taakkununnga tamanut, taanna oqarpoq.

Ilaqutariit paarsisartut feeriarlutik angalassagaangamik qitornarsiatik angalaqatiginissaannut kommunimut aningaasanik taperneqarnissamut qinnuteqaataat siornatigut itigartitsissutigineqartarpoq.

Tamannalu ilaqutariinnut paarsisartut qitornarsiaasullu akornanni pissutsinut kingunerluuteqangaatsiarsinnaavoq.

Ingammik feriarnerup kingorna ulluinnarni inuuniarnerannut akornutaasarpoq. Ilaqutariimmi meerarsiatik qimallugit angalasarsimagaangata, ilaqutariinni naligiinnginnermik pilersitsisarpoq.   

Meeqqammi ilaasa anaana ataatalu angalaqatigisinnaasarneranni allat angerlarsimaannartariaqartarnerat meeqqanut paasiuminaassinnaasarpoq. Tamannalu meeqqanut tujorminartupilussuusinnaasoq, Julianne Enoksen oqaluttuarpoq.

Ilaqutariimmi tamangajammik feriartut, meerarsiat ilaqutariinnut paarsisartunut allanut inissinneqarallartarput, meeqqallu ilaqutariit nalinginnaasumik paarsisartut ilaqutarivinnagit misigisimalersinnaasarput. 

- Taakku meeqqat pineqartut suli ukiukikkaluarlutik ulluinnarni nalaattareernikuusaat imaannaanngitsuupput. Ilaqutariinnullu paarsisartunut pinerminni toqqissisimaneq taanna pigiliunnikuusartik avissaaqqikkaangat soorunami pakatsinermik aallaqqaataaneertutullu misiginermik pilersitsisarpoq, Juliane Enoksen oqarpoq.

Ilaqutariinni assigiinngisitaarnermik pilersitsisartoq

Nammineq meerarisat qitornarsiallu akornanni assigiinngisitsisoqarnerata naapertuutinnginnera aaqqiivigissallugu kommunimut pingaaruteqarsimavoq.

Ilaannikkullu qitornarsiat qitornarsiallu allat assigiinngitsumik pineqarsinnaasarput. Qeqqata Kommunianimi ilaqutariit paarsisartut qitornarsiartik ilagalugu angalanissamut qinnuteqaataat siornatigut itigartitsissutigineqartarput, naak kommunini allani ilaqutariit paarsisartut qitornarsiaat akiliunneqartaraluartoq.

Tamannalu ilaqutariinnut paarsisartunut qitornarsiamullu kingunerluuteqartartoq Juliane Enoksen oqaluttuarpoq:

-Akuerineqanngikkallarnerani ilaqutariit paarsisartut allatut ajornartumik paarsartik ilaqutariinnut paarsisartunut allanut inissikkallarneqartarput, taannalu meeqqamut ilaqutariinnullu paarsisartunut imaannanngitsumik kinguneqartarpoq, feeriareerlutik uteraangata aallaqqaataaneeqqittutut misinnartarmat, taanna oqarpoq.

Ilaqutariit paarsisartut sumut angalanissaat apeqqutaatinneqarani nunatsinni nunatsinniillu Danmarkimut angalanermi siumut utimullu billeti kommunimiit akilerneqartassaaq.

Qeqqata Kommuniata taama aalajangernerata ilaqutariinnik paarsisartunik amerlanerulersitsinissaa Juliane Enoksenip neriuutigaa:

-Neriuppunga, ilaqutariimmi paarsisartut pisariaqartittorujussuugatsigit, Juliane Enoksen oqarpoq.