Qeqertarsuarmiut Avannaata Qimussersuanut suli ilaaqqusaanngillat
Qeqertarsuarmi qimmit qimuttut pillugit suliaq suli kingunerlutsitsivoq.
Qimmit qimuttut Qeqertarsuarmeertut aamma Kangerlummeertut Kalaallit Nunaanni Qimussertartut Kattuffiata sukkanniuutsitsinernut aaqqissuussaanut tamanut suli mattusimaneqarput.
Qimminik Qeqertarsuarmeertunik aamma Kangerlummeertunik mattussineq 2018-imi oktobarimi pivoq, taamani Nuummiit Qeqertarsuarmut qimminik allanertanik eqqussisoqarsimasinnaaneranut pasitsaassisoqarsimanera pissutaavoq.
SULIAP INGERLANIKUUNERA:
Januar 2018:
- Kalaallit Nunaanni Qimussertartut Kattuffiat, KNQK, pasilliutinik anngussivigineqarpoq.
Oktober 2018:
- KNQK-p Qeqertarsuarmiut Kangerlummiullu pasilliuteqartoqarnera pissutigalugu oktobarip 17-ani 2018-mi Avannaata Qimussersuanut mattummagit suliaq avammut saqqummiunneqarpoq.
November 2018:
- Inatsisartut aalisarnermut piniarnermullu ataatsimiititaliaata taamani aalisarnermut piniarnermullu naalakkersuisuusoq qimmit pasilliutigineqartut DNA-vi misissorneqassasut piumasaraat. Misissuiffigineqalereerpulli.
Marts 2019:
- Kukkuluttuttoqarneratigut DNA-mik misissuineq januarimili piareersimasussaangaluaq kinguarpoq.
Maj 2019:
- DNA-mik misissuineq piareerpoq - inernerali isertuunneqarpoq.
Juni 2019:
- Kommune Qeqertalimmit uppernarsarneqarpoq qimmillip kissaateqarneratigut qimmit pasilliutigineqartut oktobarip 25-ani 2018-imi toqunneqarsimasut.
Juli 2019:
- Aalisanermut piniarnermullu naalakkersuisup uppernarsarpaa innuttaasup suliamut akuusup inatsisitigut innarlitsaaliugaanerata qulakkeerneqarnissaa kiisalu sulianik suliarinnittarnermi pisortat sulianik pineqaatissiissutaasinnaasunik suliaqarneranni tunngaviinut malittarisassat eqqortinneqartussaaneri.
Oktober 2019
- Suliaq eqqartuussivimmut anngunneqassangaluaruni pisoqalereersimassammat politiit suliamik misissuinerminnik unitsitsipput.
December 2019
- DNA-mik misissuisimanerup inerneri Kalaallit Nunaanni Qimussertartut Kattuffiat aqqutigalugu avammut siaruarneqarput.
- Uumasut nakorsaanerata qimmeq allanertaasoq uppernarsarpaa.
Kingornalu, DNA-mik misissuisoqareersoq, paasineqarpoq qimmip pasilliutigineqartup aappaa kalaallit qimmerinngikkaa qimuttoq. DNA-mimmi misissuinerup inernera naapertorlugu qimmip misissorneqartup DNA-vata 50 procentia qimuttuusimasoq DNA-vata sinnera qimmeq qimuttuusimanngilaq. Kisianni qimuttutut 50 procentiini 35 procentia aamma taamaallaat kalaallit qimmiat qimuttuusimavoq.
AAMMA ATUARUK Qimmit qimuttut pillugit suliaq: Uumasup nakorsaata DNA-mik misissuinerup inernera maanna oqaluttuaraa
Qimmip allanertatut pasineqartup aappaata DNA-va misissorneqarnikuunngisaannarpoq. Qimmillu allanertatut pasineqartut tamarmik, piginnittup kissaateqarnera naapertorlugu, Kommune Qeqertalimmit 2018-imi oktobarip qaammataani toqunneqarsimapput. Tamanna pivoq Kalaallit Nunaanni Qimussertartut Kattuffiat qimminik Qeqertarsuarmeersunik aamma Kangerlummeersunik aaqqissuussaminut tamanut mattussilluni nalunaaruteqareersorlu.
- Mattusseqqanerput suli aalajangiusimavarput. Naalakkersuisoqarfimmut allagaqarnikuuvugut piumasaqarlutalu. Taakkualu allakkat nutserneqarnissaanut pissutaapput taama kingusitsigisumut killinnitsinnut, Johan Olsen, Kalaallit Nunaanni Qimussertartut Kattuffianni siulittaasoq, oqarpoq.
Kalaallit Nunaanni Qimussertartut Kattuffiata qimminik Qeqertarsuarmeersunik aamma Kangerlummeersunik suli mattusseqqanera pissuteqarpoq kattuffik ilisimatinneqarsimammat pasilliutigineqartup aappaa arnaviaq, DNA-millu misissorneqarluni allanertaasutut paasineqartoq, arfinilinnik piaqqisimasoq, piaraanillu marlunnik amiakkoqartoq.
Tamannarpiarlu pissutigalugu KNQK Aalisarnermut, piniarnermut aamma nunalerinermut naalakkersuisoqarfimmut paasiniaasimavoq qimmit qimuttut pillugit suliaq qanoq nangeqqinniarneqarnersoq.
AAMMA ATUARUK Pasilliutit nutaat: Qimmit allanertat piaraat Qeqertarsuarmi suli qimmerineqarput
- Aap, taakkua toqunneqarsimasut allakkaniipput. Ilumoorpoq. Kisianni aamma piaqqiorsimagamik. Tassa taakkuupput aamma uagut qulakkeerusutagut. Ilumut tamarmik toqunneqarpat? Taannalu qulakkiissagutsigu misissuisoqaqqittariaqarpoq suli akusanik peqartoqarnersoq, Johan Olsen oqarpoq.
Kisianni Qeqertarsuarmi qimussertartut peqatigiiffiat, Qimusseq 82, naapertorlugu qimmit qimuttut pillugit suliami erniaarineqarsimasunik amiakkoqanngilaq.
- Ernummatissaqanngikkaluarput uagut maani pissutsit qanimut nalunnginnatsigit. Oqarsinnaavugut massakkut akusaqanngilaq. Aamma amiakkunik takusaqarsinnaanngilagut, Hans Jørgen Lukassen, Qimusseq 82-imi siulittaasoq, oqarpoq.
Kisianni Kalaallit Nunaanni Qimussertartut Kattuffiata qimmit pingasut ataallugit ukiullit Qeqertarsuarmi qanoq pineqarniarnersut paasitinneqartinnatik mattusseqqanertik aalajangiusimaannarniarpaat.
- Qeqertarsuarmiuulluni qasunartorujunngorunarpoq. Qimmeq qimuttoq akuneqanngitsoq illersorpaat. Pigerusuppaat atorluartaramikku takornariat takkukkaangata, Johan Olsen oqarpoq.
Aalisarnermut, piniarnermut aamma nunalerinermut naalakkersuisoq, Jens Immanuelsen, KNR-imit oqaaseqartinniaraluarparput iluatsinnaguli.
