Qimmit qimuttut pillugit suliaq: Uumasup nakorsaata DNA-mik misissuinerup inernera maanna oqaluttuaraa
50 procentia qimuttoq aamma 50 procentia qimmeq qimuttuunngitsoq. Kisianni qimuttutut 50 procentiini 35 procentia taamaallaat kalaallit qimmiat qimuttoq.
Qimmip pineqartup qimuttup DNA-vanik Statens Naturhistoriske Museumimi Wildlife forensics facilitymi qimmip qimuttup pinngoqqaatimitut sananeqatai misssorneqarmata inerneri taamaassimapput.
Taama oqaluttuarpoq Egill Steinsgrimsson. Taanna Uumasunut Nakorsaqarfimmi aamma Inuussutissalerinermut Oqartussaaffimmi uumasut nakorsaanerat.
- Aap, tassa qimmip DNA-visa ilangaatsiai kalaallit qimmianersuunngillat, taanna taama oqarpoq.
SULIAP INGERLANIKUUNERA:
Januar 2018:
- Kalaallit Nunaanni Qimussertartut Kattuffiat, KNQK, pasilliutinik anngussivigineqarpoq.
Oktober 2018:
- KNQK-p Qeqertarsuarmiut Kangerlummiullu pasilliuteqartoqarnera pissutigalugu oktobarip 17-ani 2018-mi Avannaata Qimussersuanut mattummagit suliaq avammut saqqummiunneqarpoq.
November 2018:
- Inatsisartut aalisarnermut piniarnermullu ataatsimiititaliaata taamani aalisarnermut piniarnermullu naalakkersuisuusoq qimmit pasilliutigineqartut DNA-vi misissorneqassasut piumasaraat. Misissuiffigineqalereerpulli.
Marts 2019:
- Kukkuluttuttoqarneratigut DNA-mik misissuineq januarimili piareersimasussaangaluaq kinguarpoq.
Maj 2019:
- DNA-mik misissuineq piareerpoq - inernerali isertuunneqarpoq.
Juni 2019:
- Kommune Qeqertalimmit uppernarsarneqarpoq qimmillip kissaateqarneratigut qimmit pasilliutigineqartut oktobarip 25-ani 2018-imi toqunneqarsimasut.
Juli 2019:
- Aalisanermut piniarnermullu naalakkersuisup uppernarsarpaa innuttaasup suliamut akuusup inatsisitigut innarlitsaaliugaanerata qulakkeerneqarnissaa kiisalu sulianik suliarinnittarnermi pisortat sulianik pineqaatissiissutaasinnaasunik suliaqarneranni tunngaviinut malittarisassat eqqortinneqartussaaneri.
Oktober 2019
- Suliaq eqqartuussivimmut anngunneqassangaluaruni pisoqalereersimassammat politiit suliamik misissuinerminnik unitsitsipput.
December 2019
- DNA-mik misissuisimanerup inerneri Kalaallit Nunaanni Qimussertartut Kattuffiat aqqutigalugu avammut siaruarneqarput.
DNA-mik misissuinerup inernera ukioq manna maajimi piareerpoq, oqartussalli taamani misissuinerup inernera isertuussassanngortippaat.
AAMMA ATUARUK KNQK: Qeqertarsuarmi qimmit qimuttut marluk allanertanik akusaasimapput
- Siullertut qimmeq piaraalu toqunneqareersimapput. Taamaattumik annertunerusumik ajoqusiisinnaajunnaareersimasutut oqaatigineqarsinnaapput. Taamaammat taamani naliliivugut suliap suli ingerlanerani misissuinerup inernera ilisimatitsissutiginiarnagu, Egill Steingrimsson oqarpoq.
Taamaalilluni uumasut nakorsaaneqarfianit qimmip ataatsip DNA-va kisiat misissorneqarsimavoq, naak pasilliuteqartoqaraluartoq kalaallit qimmerinngisaanik marlunnik Nuummit Qeqertarsuarmut eqqussisoqarsimanerarlugu.
Qimmilli aappaa oqartussanit misissugassanik tigusiffigineqannginnerani toqunneqarsimavoq.
- Qimmeq qerneq aamma eqqaaneqarsimavoq. Taanna taamani paasinngilarput. Tassami paasissutissanik tassunga tunngasumut arnaviamit misissuinermut atugassanik tigusiartoreersimanitsinni ilisimatinneqarpugut. Kisianni kingusinnerusukkut ilisimatinneqarpugut qimmeq taanna qerneq toqunneqareersimasoq. Tamanna kommunimit paasivarput, Egill Steingrimsson oqarpoq.
AAMMA ATUARUK Pasilliutit nutaat: Qimmit allanertat piaraat Qeqertarsuarmi suli qimmerineqarput
Kalaallit Nunaanni Politiit KNR-imut ukioq manna oktobarimi uppernarsarpaat Qeqertarsuarmut kalaallit qimuttunik qimmerinngisaannik eqqussisoqarsimasinnaaneranut pasilliutinik politiinut tunniussisoqarsimasoq. Politiilli taamani misissuinerminni inerniliuppaat qimmit pineqartut 2017-imi ukiup affaani siullermi eqqunneqarsimasinnaasut. Taamaattumillu suliaq eqqartuussivimmut anngunneqassangaluaruni pisoqalereersimassasoq.
- Politiit suliaq unitsiinnarpaat, taamaattumik uani suliami allatut iliuuseqaqqissinnaanngilagut. Aamma paasisagut naapertorlugit arnavissap piarai tamarmik toqunneqarsimapput, Egill Steingrimsson oqarpoq.
Egill Steingrimssonip aamma oqaluttuaraa Uumasunut Nakorsaqarfik aamma Inuussutissalerinermut Oqartussaaffik qimmit pineqartut piaraannik amiakkoqarsimasinnaaneranut pasilliutinik anngussivineqarsimanngitsoq.
AAMMA ATUARUK DNA-mik misissuineq piareertoq
- Uanilu qanoq iliuuseqassagutta paasissutissanik tigussaanerusunik, soorlu qimmeq suna pineqarnersoq aamma sumiinnersoq anngussivineqartariaqarpugut. Taava tassaanngaannit sumiiffimmi oqartussaasut, uanilu kommuuni pineqarpoq, suliamik misissuisussaapput.
KNR-imit Qimmeq Projekti misissuisuunerarlugu kukkulluta oqaatigisimavarput. Uumasunut Nakorsaqarfik aamma Inuussutissalerinermut Oqartussaaffik maanna erseqqissaateqarpoq misissuinissaq Qimmeq Projektimit Statens Naturhistoriske Museumimi Wildlife forensics facilitymi pisinnaasoq innersuussutigineqarsimasoq. Taamaattumik Qimmeq Projekti qimmit pinngoqqaatimittut sananeqaataanik misissuisuunngilaq.
