Pasilliutit nutaat: Qimmit allanertat piaraat Qeqertarsuarmi suli qimmerineqarput
![Slædehunde](/sites/default/files/styles/image_934x467/public/img_4958.jpg?itok=sF1-Ss0Q)
Narrujuummerneq. Tassa Kalaallit Nunaanni Qimussertartut Kattuffiata Ilulissani sapaatip akunnerata naanerani ataatsimeersuarnerani peqataasut ilaasa misigisaat. Tamanna pivoq politiit Qeqertarsuarmi qimmit pillugit misissuinerminnik unitsitsinerminnik nalunaaruteqarnerisa kingorna.
SULIAP INGERLANIKUUNERA:
Januar 2018:
- Kalaallit Nunaanni Qimussertartut Kattuffiat, KNQK, pasilliutinik anngussivigineqarpoq.
Oktober 2018:
- KNQK-p Qeqertarsuarmiut Kangerlummiullu pasilliuteqartoqarnera pissutigalugu oktobarip 17-ani 2018-mi Avannaata Qimussersuanut mattummagit suliaq avammut saqqummiunneqarpoq.
November 2018:
- Inatsisartut aalisarnermut piniarnermullu ataatsimiititaliaata taamani aalisarnermut piniarnermullu naalakkersuisuusoq qimmit pasilliutigineqartut DNA-vi misissorneqassasut piumasaraat. Misissuiffigineqalereerpulli.
Marts 2019:
- Kukkuluttuttoqarneratigut DNA-mik misissuineq januarimili piareersimasussaangaluaq kinguarpoq.
Maj 2019:
- DNA-mik misissuineq piareerpoq - inernerali isertuunneqarpoq.
Juni 2019:
- Kommune Qeqertalimmit uppernarsarneqarpoq qimmillip kissaateqarneratigut qimmit pasilliutigineqartut oktobarip 25-ani 2018-imi toqunneqarsimasut.
Juli 2019:
- Aalisanermut piniarnermullu naalakkersuisup uppernarsarpaa innuttaasup suliamut akuusup inatsisitigut innarlitsaaliugaanerata qulakkeerneqarnissaa kiisalu sulianik suliarinnittarnermi pisortat sulianik pineqaatissiissutaasinnaasunik suliaqarneranni tunngaviinut malittarisassat eqqortinneqartussaaneri.
Oktober 2019
- Suliaq eqqartuussivimmut anngunneqassangaluaruni pisoqalereersimassammat politiit suliamik misissuinerminnik unitsitsipput.
Qimmit allanertat Qeqertarsuarmut, qimminik qimuttoqarfiusumut, eqqunneqarsimasinnaanerat politiit misissugarivaat.
AAMMA ATUARUK Qimmit qimuttut pillugit suliaq: Politiit misissuinertik unitsikkaat
Politiilli misissuinerminni inerniliuppaat qimmit pineqartut 2017-imi ukiup affaani siullermi eqqunneqarsimasinnaasut. Taamaattumillu suliaq eqqartuussivimmut anngunneqassangaluaruni pisoqalereersimassasoq.
- Narrujuummertoqarpoq. Suli siullermeerluta ataatsimiinngilagut. Pappiliat pisariaqartitagut piareeriarpata sulinerput aallartissuarput, Johan Olsen oqarpoq.
Erniaajusut suli qimmerineqarsinnaaneri pasilliutigineqalersut
Johan Olsenip, Kalaallit Nunaanni Qimussertartut Katttuffianni, KNQK-mi, siulittaasunngorlaap, isertuutinngilaa politiit arlaannaannilluunniit kinguneqartitsinatik misissuinerminnik unitsitsinerat kattuffiup pakatsissutigigaa. Kattuffimmummi suliaq tamaannga killeqanngilaq.
- Taanna suliaq ingerlareertoq ingerlaqqittussaavoq. Pinngitsoorani, Johan Olsen oqarpoq, nangillunilu:
- Qimmit taakkua kinguaavinit peqartoqartoq tusaamavarput. Kisianni massakkut uppernarsaatissaqarnanga oqarpunga. Kisianni assiutigineqarpalupput.
AAMMA ATUARUK Qimmit qimuttut pillugit suliaq: Unioqqutitsilluni eqqussisoqarsimasinnaaneranut politiinut tunniussisoqarsimavoq
Jens Immanuelsen aalisarnermut, piniarnermut nunalerinermullu naalakkersuisuuvoq (S). Taassuma naalakkersuisoqarfia politiinut suliamik tunniussisuuvoq - kisianni taassuma maanna qanoq iliornissartik suli oqaatigisinnaanngilaa.
- Qanoq ingerlariaqqittoqarnissaanut tunngasoq maannaqqissaaq oqaatigisinnaanngilara. Kisianni inerniliineq perusupparput, Jens Immanuelsen oqarpoq.
Jens Immanuelsen qimmit allanertat 2017-imi ukiup affaani siullermi Qeqertarsuarmut eqqunneqarsimasutut pasineqartut erniaavinik qimmeqartoqarneranik tusagaqarsimanngilaq.
- Naamerluinnaq. Taamaallaat ilisimavara taamanikkut pasitsaanneqarsimasut toqunneqarsimasut, Jens Immanuelsen oqarpoq.
AAMMA ATUARUK Illersuisoq aamma Inatsisartunut ilaasortaq akuliuppoq: - Suliaq una ilinniarfigisariaqarparput
Kalaallit Nunaanni Qimussertartut Kattuffianni siulersuisunngortut, Ilulissanilu sapaammi qinerneqartut, Qeqertarsuarmi qimmit pillugit suliaqarnertik piffissami aggersumi naliliiffigeqqissavaat.