Qimmit qimuttut pillugit suliaq pisoqalereersimavoq, taamaattumik qimuttunik qimmeqarfimmut qimminik allanertanik eqqussisimasutut pasineqartoq akiligassinneqassanngilaq. Qimmip assiga toqqorsivimmeersuuvoq allaaserisamullu attuumassuteqarani.Assi: KNR

Qimmit qimuttut pillugit suliaq: Politiit misissuinertik unitsikkaat

Qeqertarsuarmut qimminik allanertanik eqqussisoqarsimaneraalluni pasilliutaasunut politiit misissuinertik unitsippaat.

Qeqertarsuarmi qimmit allanertat pillugit suliaq akiligassiinermik kinguneqassanngilaq. Aamma allatut kinguneqartinneqassanngilaq.

Politiimmi suliaq eqqartuussivimmut anngunneqassangaluarpat kinguneqartitsivineqarnissaminut pisoqalisimasoq misissuinerminni nalilerpaat.

- Ilisimatitsissutigisinnaavara politiit misissuinerminni inerniliummassuk qimminik eqqussisimaneq 2017-imi ukiup affaani siullermi pisimasutut, Kalaallit Nunaanni Politiini unnerluussisussaatitaasut pisortaat, Morten Nielsen, oqarpoq.

SULIAP INGERLANIKUUNERA:

Januar 2018:

  • Kalaallit Nunaanni Qimussertartut Kattuffiat, KNQK, pasilliutinik anngussivigineqarpoq.

Oktober 2018:

  • KNQK-p Qeqertarsuarmiut Kangerlummiullu pasilliuteqartoqarnera pissutigalugu oktobarip 17-ani 2018-mi Avannaata Qimussersuanut mattummagit suliaq avammut saqqummiunneqarpoq.

November 2018:

  • Inatsisartut aalisarnermut piniarnermullu ataatsimiititaliaata taamani aalisarnermut piniarnermullu naalakkersuisuusoq qimmit pasilliutigineqartut DNA-vi misissorneqassasut piumasaraat. Misissuiffigineqalereerpulli.

Marts 2019:

  • Kukkuluttuttoqarneratigut DNA-mik misissuineq januarimili piareersimasussaangaluaq kinguarpoq.

Maj 2019:

  • DNA-mik misissuineq piareerpoq - inernerali isertuunneqarpoq.

Juni 2019:

  • Kommune Qeqertalimmit uppernarsarneqarpoq qimmillip kissaateqarneratigut qimmit pasilliutigineqartut oktobarip 25-ani 2018-imi toqunneqarsimasut.

Juli 2019:

  • Aalisanermut piniarnermullu naalakkersuisup uppernarsarpaa innuttaasup suliamut akuusup inatsisitigut innarlitsaaliugaanerata qulakkeerneqarnissaa kiisalu sulianik suliarinnittarnermi pisortat sulianik pineqaatissiissutaasinnaasunik suliaqarneranni tunngaviinut malittarisassat eqqortinneqartussaaneri.

Namminersorlutik Oqartussat politiinut juulimi 2019-mi suliassanngortitsimmata suliaq politiit tassani aatsaat tiguneqarpoq. Suliassallu misissuiffigineqarnerani piffissaq Morten Nielsen naapertorlugu pingaaruteqarpoq.

 

AAMMA ATUARUK Qimmit qimuttut pillugit suliaq: Unioqqutitsilluni eqqussisoqarsimasinnaaneranut politiinut tunniussisoqarsimavoq

- Suliami uani toqqammavigisimasarput tassaavoq qimminik eqqussineq - eqqunneqartut qassiusimagaluarneri apeqqutaatinnagit - 2017-imi ukiup affaani siullermi pisimanera. Eqqussinermi uani inatsimmik unioqqutitsineruvoq - imaanngitsoq qimuttunik qimmeqarfimmi allanertanik qimmeqarneq. Taamaattumik ersarissivoq uani unioqqutitsisimasinnaanerup kinguneqartinneqarsinnaanera pisoqalereersimasoq, Morten Nielsen oqarpoq.

Qimussertartut mattunneqartut

Politiit suliamik unitsitsinerat unioqqutitsinerup akiligassiinermik kinguneqartinneqartarneranut tunngavoq.

- Pinerluttulerinermut tunngasunik sulianik ingerlataqartilluta unnerluutigineqartut pinerluttulerinermik inatsit toqqammavigalugu akisussaatinneqarsinnaanerat nalilersortarparput. Tamannalu anguneqarsinnaanngitsutut nalileraangatsigu suliamik misissuinerput unitsittarparput, Morten Nielsen nassuiaavoq.

Nunatsinni qimmeq qimuttoq illersorniarlugu qimmit qimuttut kisimik qimuttoqarfinneeqqusaapput, taamatullu qimmit allanertat qimmeqarfinnut eqqunneqarnissaat inerteqqutaalluinnarluni.

AAMMA ATUARUK Illersuisoq aamma Inatsisartunut ilaasortaq akuliuppoq: - Suliaq una ilinniarfigisariaqarparput

Kisianni qimmeqarneq qitsuuteqarnerlu pillugit inatsimmi qimmit qimuttut qimminik allanertanik akuneqarsinnaanerat immikkut inerteqqutigineqanngilaq.

Kalaallit Nunaanni Qimussertartut Kattuffiat, KNQK, Qeqertarsuarmut qimminik allanertanik eqqussisoqarsimasinnaaneranut pasilliutinik 2018-mi januaarimi anngussivigineqarpoq. KNQK-llu Qeqertarsuarmiut Kangerlummiullu pasilliuteqartoqarnera pissutigalugu oktobarip 17-ani 2018-mi Avannaata Qimussersuanut mattummagit suliaq avammut saqqummiunneqarpoq.

Kommune Qeqertalimmit siusinnerusukkut uppernarsarneqarnikuuvoq qimmillip kissaateqarneratigut qimmit pasilliutigineqartut oktobarip 25-ani 2018-imi toqunneqarsimasut.

Suliaq aamma qimmip qimuttup DNA-vanik misissuinerit siullersaannik suliaqarfiunikuuvoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat