KNQK: Qeqertarsuarmi qimmit qimuttut marluk allanertanik akusaasimapput

Qimmit DNA-vanik misissuinerup takutissimavaa qimmit pineqartut qimminit europameersunit aamma qallunaatsiaat qimmerisimasaannik akoqartut. Taama Kalaallit Nunaanni Qimussertartut Kattuffiat ilisimatitsivoq.
Qimmeq allaaserineqartumut attuumassuteqanngilaq. Assi © : KNR
Allattoq Kathrine Kruse
decembarip 13-at 2019 05:22

Qeqertarsuarmi qimmit qimuttut pillugit suliaq imaannaanngitsoq maanna naammassiartuaalerpoq.

Kalaallit Nunaannimi Qimussertartut Kattuffiat Qimmeq Projektiminngaannit ilisimatinneqarsimavoq qimmit qimuttut marluk DNA-vanik misissuinerup inernerata takutissimagaa qimmit pineqartut qimminit allanertanit akusaasut.

- Ilami allaat tupaallaatigisatsinnik europami qimmit assigiinngitsunit akoqarsinnarlutik aamma qallunaatsiaat nunatsinniissimasut - nunguinnarnikullu - qimmerisimasaanik aamma pinngoqqqaatitut sananeqataataat akoqarsimapput, Mikkel Jeremiassen, Kalaallit Nunaanni Qimussertartut Kattuffianni siulittaasup tullia, oqarpoq.

Mikkel Jeremiassen naapertorlugu Kalaallit Nunaanni Qimussertartut Kattuffiat qimmit pineqartut marluk DNA-vanik misissuinerup inerneranik Qimmeq Projektimit decembarip aallartisimalernerani ilisimatinneqarsimavoq.

AAMMA ATUARUK Qimmit qimuttut pillugit suliaq: Politiit misissuinertik unitsikkaat

Misissuinerullu inernerata takutissimavaa qimmit pineqartut marluk pinngoqqaatimittut sananeqaataasa 65 procentia qimminit allanertanertanit akoqartoq.

- Allatut oqaatigalugu affaa sinnerujussuarlugu akoqarput qimmit taakkua, Mikkel Jeremiassen oqarpoq.

SULIAP INGERLANIKUUNERA:

Januar 2018:

  • Kalaallit Nunaanni Qimussertartut Kattuffiat, KNQK, pasilliutinik anngussivigineqarpoq.

Oktober 2018:

  • KNQK-p Qeqertarsuarmiut Kangerlummiullu pasilliuteqartoqarnera pissutigalugu oktobarip 17-ani 2018-mi Avannaata Qimussersuanut mattummagit suliaq avammut saqqummiunneqarpoq.

November 2018:

  • Inatsisartut aalisarnermut piniarnermullu ataatsimiititaliaata taamani aalisarnermut piniarnermullu naalakkersuisuusoq qimmit pasilliutigineqartut DNA-vi misissorneqassasut piumasaraat. Misissuiffigineqalereerpulli.

Marts 2019:

  • Kukkuluttuttoqarneratigut DNA-mik misissuineq januarimili piareersimasussaangaluaq kinguarpoq.

Maj 2019:

  • DNA-mik misissuineq piareerpoq - inernerali isertuunneqarpoq.

Juni 2019:

  • Kommune Qeqertalimmit uppernarsarneqarpoq qimmillip kissaateqarneratigut qimmit pasilliutigineqartut oktobarip 25-ani 2018-imi toqunneqarsimasut.

Juli 2019:

  • Aalisanermut piniarnermullu naalakkersuisup uppernarsarpaa innuttaasup suliamut akuusup inatsisitigut innarlitsaaliugaanerata qulakkeerneqarnissaa kiisalu sulianik suliarinnittarnermi pisortat sulianik pineqaatissiissutaasinnaasunik suliaqarneranni tunngaviinut malittarisassat eqqortinneqartussaaneri.

Oktober 2019

  • Suliaq eqqartuussivimmut anngunneqassangaluaruni pisoqalereersimassammat politiit suliamik misissuinerminnik unitsitsipput.

Qimmillu pineqartut allanertanik akusaanerisa paasineqarnerata kinguneranik Qeqertarsuarmi qimmit akusatut pasineqartut DNA-visa misissorneqarnissaat Qimmeq Projektermiut inassutigaat.

AAMMA ATUARUK Pasilliutit nutaat: Qimmit allanertat piaraat Qeqertarsuarmi suli qimmerineqarput

Qeqertarsuarmi qimussertartut peqatigiiffiat Kalaallit Nunaanni Qimussertartut Kattuffiannit pingasunngornermi unnukkut misissuinerup inerneranik ilisimatinneqarsimavoq, kiisalu suliami ingerlariaqqinnissamut innersuussutigineqartut saqqummiunneqarsimallutik. Peqatigiiffiillu ingerlariaqqinnissamut innersuussutigineqartuni marlunni sorleq toqqarniarniarlugu kattuffimmut kingusinnerpaamik sapaammi akissuteqarnissamut periarfissinneqarsimavoq.

Qimmit pineqartut marluk, qimmillip kissaateqarnera naapertorlugu, Kommune Qeqertalimmit 2018-imi oktobarip qaammataani toqunneqarnikuupput.

AAMMA ATUARUK Qimussertartut allamiut qimmiinik akusanngortitsisimasutut pasineqartut

Taamaattorli Kalaallit Nunaanni Qimussertartut Kattuffiat ukioq manna oktobarip qaammataani pasilliutinik nutaanik anngussivigineqarnikuupput, tassalu qimmit pineqartut kinguaavinik amiakkoqartoq.

Qimminik allanertanik Qeqertarsuarmut eqqussisoqarsimasinnaaneranik pasilliuteqartoqareersoq qimmit pineqartut marluk DNA-vanit misissuinermut atugassanik siorna aasakkut tigusisoqarpoq.

Pasilliutigineqartut naapertorlugit qimmit allanertat marluk Qeqertarsuarmut 2017-imi ukiup affaani siullermi eqqunneqarsimapput. Kalaallit Nunaanni Politiit Namminersorlutik Oqartussat suliassanngortitsinerata misissuiffiginissaa unitsinnikuuaat suliaq naammassineqassangaluaruni akiligassiinermik kinguneqartussaammat, taamaalillunilu eqqartuussivimmut anngunneqartuuguni pisoqalereersimasussaammat.

KNR-imit allagaatinik takunnissinnaatitaanermut periarfissaq atorlugu Qeqertarsuarmi qimmit marluk pineqartut DNA-vanik misissuinerup inerneranik oktobarimili piniarsimagaluarpugut. Aalisarnermullu piniarnermullu naalakkersuisoqarfimmit ulloq manna tikillugu suli akineqarsimanngilagut arlaleriarluta nukingisaaruteqartaraluarluta.

Qeqertarsuarmi qimmit pingasunik ukioqalersimanngitsut tamarmik toqunneqarnissaat Qimmeq-Projektip innersuussutigisimagaa siusinnerusukkut allaqqavoq. Tamannali eqqunngitsoq Qimmeq-projektimeersut arfininngornermi erseqqissaatigaat.

Qimmeq-projektip qimmit DNA-visa misissorneqarnissaat kisiat innersuussutigaa. Tamatuma kingorna susoqassanersoq politikkikkut aalajangigassaasoq, professori Qimmeq-projektimeersoq Morten Meldgaard allappoq.