Amerlanerussuteqartut Danmarkimit tapiissutit inerteqqutaalersinniaraat: Oqallinneq pasilliinermik ilaqartoq

Pele Brobergip nunanit allanit tapiissuteqarfigineqartarnermut inatsimmut allannguutissatut siunnersuut Inatsisartut oqaaseqartarfianit saqqummiuppaa. Siunnersuut partiit Danmarkimit Savalimmiuniillu tapiissuteqarfigineqarsinnaanerannut inerteqquteqalersitsissaaq.

Inatsisartut inatsit, nunanit allanit aningaasanik tapiissuteqarfigineqarsinnaanermut inerteqquteqalersitsisussaq februaarip sisamaanni tuaviortumik oqaluuseraat.

Inatsit siullermeerneqarmat allanngortinneqarpoq, taamaalilluni Danmarkimit Savalimmiuniillu tapiissuteqarfigineqarsinnaaneq akuersissutaaginnarluni.

Inatsimmik tuaviortumik oqaluuserinninnermi Donald Trumpip nunatsinnik tigusinissamik sioorasaarinera pissutaavoq. Tamatuma saniatigut politikerit Tysklandimi pisutulli, tassa Elon Muskip tamanut ammasumik partiimut Alternative für Deutschlandimut tapersersuinerarneratulli pisoqarnissaa aarlerigaat.

Elon Musk partiinut talerperliunianut siorna februaarimi tapersersuinermik oqaaseqarpoq. Inatsisartut nunami allamiut – Danmarkimit Savalimmiuniillu minillugit kalaallit partiivinut tapiissuteqarnissaannut pinngitsoortitsinissamut inatsisissaq februaarimi tuaviortumik oqaluuseraat. Politikkikkut suleqatigiinnissaq suli akuerisaavoq. Assi © : Sergey Ponomarev/New York Times/Ritzau Scanpix

Taamani Naleraq sakkortuumik isornartorsiuivoq. Pele Brobergip inatsisissatut siunnersuutip tuaviortumik suliarineqarnera isornartorsiorlugulu tamanna 'aaqqiissuteqapallannerinnartut' taavaa.

Tamatuma saniatigut Hans Enoksenip nammineq Naleqqallu USA-mit pisiarineqarsinnaasutut pasineqartutut misiginini kamaatigaa.

Partiit sapaatip akunnerani matumani isummaminnik allannguipput. Partiit tamarmik Naleqqap siulittaasuata Danmarkimiit Savalimmiuniillu partiinut tapiissuteqartoqaqqissinnaajunnaarnissaanut allannguutissatut siunnersuutaa isumaqatigaat, oqallinnerli Pele Brobergip ‘eqqartuussivittut’ taasaanut ineriartupallappoq.

USA-mut angalanermi tunissuteqarfigineqarneq

USA-mit aningaasatigut tunissuteqarfigineqarsimasutut pasineqartup aqqa taaneqanngilaq – kisianni kina innersuunneqarnersoq ersarippoq.

Inatsisit Inatsisartuni ilaasortanut ataasiakkaanut aamma atuuttussanngorlugu ersarissarneqassasoq, Inuit Ataqatigiit siunnersuutigaat.

Inuit Ataqatigiit Kuno Fencker (N) nunanit allanit tapiissuteqarfigineqartarnermut inatsisip allanngortinneqarnissaanut siunnersuutip sisamanngornermi siullermeerneqarnerani toqqaannanngitsumik qitiulersippaat. Mariane Paviasenimmi (IA) Inatsisartunut ilaasortaq nunanut allanut angalanermini tunissuteqarfigineqarsimasoq innersuussutigaa. Assi © : KNR / Markus Valentin

Mariane Paviasenip (IA) oqaaseqarnermini ilaasortaq USA-mut angalasimasoq tusagassiuutitigut allaaserineqarsimasoq innersuussutigaa.

- Inatsisartuni ilaasortat immikkut akilerneqarlutik, immikkut nuannaariarnerminni allaat akilerneqarsimasut Qallunaat Nunaanni tusagassiuutinut ingammik tusarparput. Tamanna inatsisitigut unitsinneqassaaq. Tamanna inatsimmi ersarissumik allassimassaaq, IA-mit oqaaseqartoq oqarpoq.

Tusagassiorfiup Frihedsbrevetip ilanngutassiaq ima qulequtaqartoq: 'Kunop angalalluarnera: Kalaaleq politikeri USA-mut “angalariataarnermini” 100 tusindilikkaanik nalilimmik festertuniillunilu politikkikkut isertortunik ataatsimeeqateqartoq', saqqummiuppaa.

Frihedsbrevetip Kuno Fenckerip 100 tusindilinnik nalilinnut politikkikkut aaqqissuussinernut isissutissarsisimasoq nassuiaatigaa. Kuno Fenckerip tamanna Fake Newsiusoq tassa nutaarsiassaq eqqunngitsuusoq ulloq taanna Sermitsiamut oqaatigaa, angalaninilu nammineq akilersimanerarlugu.

Mariane Paviasenip (IA) aningaasatigut tapersiissutit aningaasanik kisimik naleqanngitsut tunissutissarsialli aamma pineqartut tunngavilersuutigaa: - Amerikamukaruma tassanilu ataatsimeersuarnermut, qineqqusaarnermi oqallinnermut allanulluunniit ornigunnissannut neqeroorfigineqaruma tamanna unitsinnissaa eqqarsaatigissavara. Politikeritut sulininni Danmarkimukaruma naaggaarnissannut pisussaaffeqarpunga. Pissusilersuut eqqunngitsuuvoq, taanna oqarpoq. Assi © : Privat

Pele Brobergip isummat tikilluaqqusaasut oqallinnermi oqaatigaa, taamaattorli tamanna inatsisinut ataatsimiititaliami suliareqqinneqarsinnaanerarlugu.

- Tivolimut billetit ilaatinneqassanersut aalajangersinnaanngilara, kisianni ataatsimiititaliap siunnersuummut oqaaseqaateqarnissaa ilumoorpoq. Ataatsimiititaliap immikkoortut ullumi saqqummiunneqartut pillugit oqaaseqaateqarsinnaanera pingaaruteqarpoq, taamaaliornikkut partiit isumaat ataqqineqassallutik.

Siammasissumik isumaqatigiittut

Partiit tamarmik Danmarkimi partiinit suleqatigisaminnit aningaasatigut taperneqarsimanatik  - taamaaliornaviaratillu oqaaseqartarfimmit oqaatigipallappaat.

Atassut siunnersuummut kisimi akuersinngilaq, partiillu siunnersuutit itigartinneqarnissaa innersuussutigaa. Aqqalu C. Jerimiassenip itigartitsinissaq Naleqqap Danmarkimik suleqateqarnermut pissutissaqanngitsumik tatiginarunnaarsaanerarlugu tunngavilersorpaa, taassumalu Naleraq folketingimut nammineq ilaasortaatitaqartoq innersuussutigalugu.

Naalakkersuisut Demokraatillu siunnersuummut tapersiipput, Siumup IA-llu inatsisinut ataatsimiititaliami suliareqqitassanngortitsipput.

Siunnersuut inatsisinut ataatsimiititaliap oqaaseqaateqarnissamut periarfissaqareernerani februaarip aqqarnani aappassaaneerneqassaaq.

- Naak oqallinneq annertugaluartoq isumaqatigiinngitsoqannginnera nuannaarutigaara, Pele Broberg naggasiivoq.