Naalakkersuisut: Trumpip atorfilittai oqaloqatigerusuppagut

Múte B. Egede marlunngornermi tusagassiortunik katersortitsinermi eqqissisaaqqippoq. Taassuma 'uagut kalaallit ataatsimoortugut' oqaatigaa.

Allattoq Nicole Sander Bertelsen, Hanna Vestergaard Hviid

januaarip 21-at 2025 13:14

Nutserisoq Connie Fontain

- Danskiorusunngilagut aamma amerikamioorusunngilagut, kalaalliuvugut, naalakkersuisut siulittaasuat, Múte B. Egede (IA) tusagassiortunik katersortitsinermi oqaqqippoq.

Taanna innuttaasut qitiusut susoqarnera aamma ilisimaniassammassut tusagassiortunik katersortitsilluni oqarpoq.

- Iligisagut oqaloqatigilereerpagut, kisianni inuit maannakkut eqqartungaatsiarpaatigut, taamaammat uagutsinnik oqaloqateqarnissaat uagullu avaqqutissanngikkaatigut pingaaruteqarpoq,Vivian Motzfeldt oqarpoq.

- Iligiinnut ilaalluta NATO-mut Europamullu ilaavugut. Taamaammat diplomati suleqatigiinnerup ilaatut pingaaruteqarpoq, taanna tusagassiortunik katersortitsinermi oqarpoq.

SULIAQ NAATSUMIK

Donald Trump USA-mi præsidentit 47-ssaatut qinerneqarpoq. Taassuma nunatsinni aqutsilernissani soqutigalugu ivertinneqannginnermini oqaatigaa.

Taassuma oqarnera naapertorlugu tamanna USA-p sillimaniarneranut pisariaqarpoq. Tamanna Floridami Mar-a-Lagomi januaarip arfineq-aappaani tusagassiortunik katersortitsinermi oqaatigaa.

Tusagassiortunik katersortitsinermi tassani sakkutuulersornikkut nunatsinni aqutsilernissani mattunniarnagu oqaatigaa.

Naalakkersuisut siulittaasuata, Múte B. Egedep nunarput kalaallit pigigaat arlaleriarluni oqaatigaa. Taamaattorli naalakkersuisut USA suleqatiginerulerusukkaat oqaatigaa.

Danskit ministeriunerata, Mette Frederiksenip nunatta siunissaa pillugu aalajangiinerit tamarmik nunatsinni aalajngerneqassasut oqaatigaa.

Donald Trump Juniorip Nuuk 'takornariatut' januaarip arfineq-aappaani tikeraarpaa. Tikeraarnermini teqqianik MAGA-mik allassimasortalinnik agguaavoq, Nuummiunut ullup-qeqqasiortitsivoq inoqutinullu attaveqaatini saqqummiussassanik suliaqarluni.

Tamatuma kingorna angutaa nunatsinnut inuulluaqqussuteqarpoq, oqarlunilu "takuliivippugut".

Múte B. Egedep oqarnera naapertorlugu tikeraarnissamut tikilluaqqusaavoq.

Allisiguk

Kalaallit Nunaata Danmark siunissami suleqatigissagaa qularutigineqassanngilaq, politikerit tusagassiortunik katersortitsinermi aalajangersumik oqarput, kisianni:

- Kalaallit Nunarput innuttaasullu siunissami susoqarnissaa aalajangertussaavaat, Múte B. Egede oqarpoq.

Donald Trumpip nalunaarutaa kingulleq ernumassutigissavarput?

- Kingullermik pisup kingorna ernumasoqarnera paasinarpoq, kisianni maannakkut eqqissisimanissaq aamma kalaallit ataatsimoortugut erseqqissaatiginissaa pingaaruteqarnerpaavoq, Múte B. Egede tusagassiortunik katersortitsinermi oqarpoq.

Danmark naleqqussassasoq

Donald Trumpip amerikami præsidentitut ivertinneqaqqammersup nunatsinnik aqutsilernissani kissaatigalugu arlaleriarluni oqaaseqarnera pissutigalugu nunarput ukiup nikinnerani ukkatarineqangaatsiarpoq.

Trump ippassaq ivertinneqarnermi kingorna nunatsinnut tunngatillugu aperineqarami ima akissuteqarpoq:

- Kalaallit Nunaat tupinnartorsuuvoq, USA-llu illersornissaq eqqarsaatigalugu pisariaqartippaa. Danmark naleqqussarumaartoq qularinngilara.

Aamma atuaruk Præsident Trump Kalaallit Nunaat pillugu: Danmark naleqqussarumaarpoq

Múte B. Egedep aamma danskit ministeriunerata Mette Frederiksenip (Socialdemokraterne) Kalaallit Nunaat kalaallit pigigaat oqaatiginikuuaat.

Naalakkersuisut USA-mut attaveqarlutik oqaloqaitiginninniarumartut Vivian Motzfeldtip oqaatigaa. Naalakkersuisut siulittaasuata siunissaq pillugu kalaallit aalajangiiginnarsinnaaneranni nunatta USA suleqatigerusukkaa arlaleriarluni oqaatiginikuuaa.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.