Kuno Fenckerip apersorneqarluni oqarasuaat iliinnaraa

Naalakkersuisut siulittaasuat tusagassiortunut marlunngornermi sassarpoq.

Tassani USA-mut attaveqarnermi ataatsimoornissaq pingaaruteqartoq oqaatigaa.

Taamali oqarneranit akunnialuit qaangiuttut Siumumit Inatsisartunut ilaasortaq, Kuno Fencker, USA-p Kongressiani ilaasortamik, Andy Ogles-imik, oqaloqateqarpoq. Kalaallit Nunaata USA-llu ataqatigiinnerat qanoq nukittorsarneqarsinnaanersoq ilaatigut tassani oqaloqatigiissutaavoq.

Siumumut ilaasortaq taama oqaloqatigeereernerisa kingorna isornartorsiorneqaqaaq. Inoqatinut attaveqaatini Kuno Fencker ilaatigut nunamik killuussisuunerarneqarpoq, inatsisartunullu ilaasortaqataasa taassuma iliuusai tulluanngitsutut killissamillu qaangiisutut nalilerpaat.

Taamaattumik KNR-ip Kuno Fencker pingasunngornermiilli oqaaseqartinniarsaraa. KNR-immi Kuno Fenckerimut isornartorsiutit inuttaanit akitikkusuppai. Taannali pissarsiassaanngilaq oqarasuaatinilu tigussanagu.

Kisianni Kuno Fencker piffissami tassani danskit tusagassiorfiinit arlalinnit apersorneqartarpoq.

KNR isornartorsiuisoq isornartorsioraa

KNR-ip Kuno Fenckerip apersornissaa ataasinngornermi iluatsippaa.

Tamannali apeqqutissat tamaasa akineqarneranik kinguneqanngilaq. Inatsisartunummi ilaasortap apersuinermimi apersuisup apeqqutai qinngarai apersuinerlu maannaannaq kipitillugu oqarasuaat iliinnarpaa.

Kuno Fencker taama ilioreerluni KNR illuinnaasiortutut isornartorsiuillunilu tusagassiuisutut isornartorsiorpaa.

Taamaattumik ammasuunissaq pillugu apersuineq tamaat uunga ikkupparput:

Kalaallit Nunaata USA-mut attaveqarnera tamarmi pisortatigoortumik pissasoq, Naalakkersuisut siulittaasuat, Múte Bourup Egede, tusagassiortunik marlunngornermi katersortitsinerminni oqarpoq. Sooruna Naalakkersuisut siulittaasuata oqaatigisaa malinnagu nammineq iliuuseqartutit naak naalakkersuisooqatigiit partiiannut ilaagaluarlutit?

- Naalakkersuisut oqalugiaataat takunngilara. Aatsaat kingornatigut takuara. Aamma tusaanngilara pisortatigoortumik suna tamarmi pinissaanut oqaaseqartoq. Takunngilara taanna. Eqqaamanngiivippara.

Múte Bourup Egede aamma oqarami suleriaasissatut oqaatigisani nunap sillimaniarneranut tunngassuteqartoq, illit tamanna soqutiginngiliuk?

- Soorunalimi soqutigaara. Kisianni Naalakkersuisuunngilanga. Naalakkersuisut taanna suleriaaseriniarunikku tassa taanna isumaqatigiissutigissuaat.

 Illit naalakkersuisooqataasutut tunuliaqutaassavit tassunga? Immaqaluunniit?

- Arlaannik inatsimmik siunnersuuteqartoqanngippat uanga taaseqataasinnaaninnillu periarfissinneqarlunga, tassani inissisimanngilanga.

Suli isumaqarpit Nuuk Nuuk Yorkimik ateqalissasoq?

- Oqartitsiniaassanngilatit oqaatiginngisannik. Oqarpunga podcasti taanna aamma asuliilaarfiusoq. Tassani uanga piaaralunga oqarpunga. Illarsaaralunga. Timmisartup

Piffissami maannakkutut ittumi quiasaarnissaq piffissaalluarsoraajuk?

- Tassami, apeqqulluunniit akisariaqarunanngilara. Immaqa unitsiinnarutsigu apersorneqarnera ajortussarsiuinnarniaruit.

Naamik, ajortussarsiunngilanga.

- Tassami, naamik unitsiinnartigu iluamik apersornianngikkumma.