Erik Jensen Siumumeersup USA-mut tikeraarnera pillugu: Angalanini nammineq akisussaaffigaa

Inatsisartunut Siumumit ilaasortaq, Kuno Fencker partiini akuersissuteqaqqaatinnagu USA-mut angalavoq.

Allattoq Andreas Wille

januaarip 23-at 2025 07:27

Kalaallit Nunaata USA-mut attaveqarnera tamarmi pisortatigoortumik pissasoq, Naalakkersuisut siulittaasuat, Múte Bourup Egede, tusagassiortunik marlunngornermi katersortitsinerminni oqarpoq.

Oqariartuulli tamanna tamanit paasineqarsimarpasinngilaq.

Múte B. Egedemmi nalunaaruteqarneranit akunnialuit qaangiuttut Inatsisartunut Siumumit ilaasortap Kuno Fenckerip USA-miinnini Facebookimini nalunaarutigaa.

Aamma atuarukNaalakkersuisut: Trumpip atorfilittai oqaloqatigerusuppagut

Taassumalu Repræsentaternes Husimiissimanini kiisalu kongressimi ilaasortaminik Andy Oglesimik Donald Trumpip parteeqatigisaanik naapitsisimanini nalunaarutigaa.

Siumumeersup, Kuno Fenckerip, USA-mi sulerinerluni kikkunnillu ataatsimeeqateqarnerluni partiimi siulittaasuanut ilisimatitsissutigineq ajorai, Siumup siulittaasua, Erik Jensen oqarpoq.

- Inuttaata nammineerluni akisussaaffigaa taanna angalanini. Taamaattumik Siumuminngaanniit pisinnaatitsissummik tunniussaqarsimannginnerput taanna erseqqissaatigissuara, Erik Jensen oqarpoq.

Inuiaqatigiit ataatsimoortut

Kuno Fencker USA-mi præsidentinngoqqammersup, Donald Trumpip, ivertinneqarneranut peqataassalluni Facebookimi quppernermini sapaatiummat allappoq.

Inuiaqatigiit ataatsimoortariaqartut inuiaqatigiittullu illersoqatigiinnissaq pingaaruteqartoq, Siumup siulittaasuata partiit siuttuinut oqariartuutigisaqattaarsimallugu oqarpoq.

- Naatsorsuutigaaralu aamma tamanna partii siumut tunuliaqutaralugu qinikkat tamarmik ilisimaarigaat aamma malikkaat, taanna oqarpoq.

SULIAQ NAATSUMIK

Donald Trump USA-mi præsidentit 47-ssaatut qinerneqarpoq. Taassuma nunatsinni aqutsilernissani soqutigalugu ivertinneqannginnermini oqaatigaa.

Taassuma oqarnera naapertorlugu tamanna USA-p sillimaniarneranut pisariaqarpoq. Tamanna Floridami Mar-a-Lagomi januaarip arfineq-aappaani tusagassiortunik katersortitsinermi oqaatigaa.

Tusagassiortunik katersortitsinermi tassani sakkutuulersornikkut nunatsinni aqutsilernissani mattunniarnagu oqaatigaa.

Naalakkersuisut siulittaasuata, Múte B. Egedep nunarput kalaallit pigigaat arlaleriarluni oqaatigaa. Taamaattorli naalakkersuisut USA suleqatiginerulerusukkaat oqaatigaa.

Danskit ministeriunerata, Mette Frederiksenip nunatta siunissaa pillugu aalajangiinerit tamarmik nunatsinni aalajngerneqassasut oqaatigaa.

Donald Trump Juniorip Nuuk 'takornariatut' januaarip arfineq-aappaani tikeraarpaa. Tikeraarnermini teqqianik MAGA-mik allassimasortalinnik agguaavoq, Nuummiunut ullup-qeqqasiortitsivoq inoqutinullu attaveqaatini saqqummiussassanik suliaqarluni.

Tamatuma kingorna angutaa nunatsinnut inuulluaqqussuteqarpoq, oqarlunilu "takuliivippugut".

Múte B. Egedep oqarnera naapertorlugu tikeraarnissamut tikilluaqqusaavoq.

Allisiguk

Siumut sinnerlugu Inatsisartunut ilaasortap iliuusai Siumup siulittaasuata qanoq kinguneqartinneqarsinnaanersut KNR-imut oqaatigiumanngilaa. Kuno Fenckerillu taama iliornini inuttut allatut nammineq akisussaaffigissagaa siulittaasoq erseqqissaavoq.

- Inuttut nammineq soqutigisai sumullu assigiinngitsunut oqaloqatiginninneri soorunami inuiaqatigiinni ernumalersitsinerat paasilluarsinnaagaluarlugu, kisianni pisinnaatitaaffii aammalu kikkunnik oqaloqatiginninnissaa uatsinnut akisussaaffigitinniassallugu tulluartuusorinngilara, Erik Jensen KNR-imut oqarpoq.

Kuno Fenckerip inuit nunarput pillugu oqaloqatigisimallugit Facebookimini allappaa.

KNR-ip Kuno Fencker oqaaseqartinniarsaraa.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.