Ilisarititsineq: Morgan Angaju nunatsinnut asannilersitserusuttoq

Morgan Angaju Josefsen Røjkjærip ilaqutaasa angerlarsimaffiat, Danmarkimi Ringkøbingimiittoq eqqiluisaarfiujuaannarpoq.

Tamaaviaarlutik sulilluartarsimapput - sapinngisamillu ajunnginnerpaamik angusaqarniartarsimapput. Tamatigut.

- Kalaaliuneq naleqartuusoq tulluusimaarutigisassaasorlu peroriartuutigaara. Inuit iluameersuummata, 26-nik ukiulik Morgan Angaju oqarpoq. Nuup qinnguani "Nunarsuup isuani"qaqqajunnami issialluni eqqaamasalikkersaarpoq.

Morgan Angajup nunarput pillugu takorluukkani, angerlarsimaffimminiit ilitsoqqussani, allanit isumaqataaffigineqanngissinnaasoq kingusinnerusukkut atuarfimmi paasivaa.

- Kalaallinik siuaaqarnera pillugu imatut qinngasaavissorneqarnikuunngilanga, ilaquttalli imerajuttuunerarneqaraangata apummillu illuliani najugaqarnerartilluni ilaalu ilanngullugit artornartarpoq, taanna oqarpoq paarnanillu nunialluni.

Morgan Angaju ulluinnarni Ilulissani najugaqarpoq – 2023-mili aalajangersimasumik najugarivaa. 

Morgan Angaju qallunaajullunilu kalaaliuvoq, kalaaliunerusutulli misigisimavoq. Aatami piniarnerit pillugit misigisalikkersaarutai oqaluttuatoqqanillu oqaluttuartarnera peroriartuutigai.  Assi © : Privatfoto

Tassani takornarialerisuuvoq, suliffeqarfeeqqamillu takornarianik sullissiffiusumik ’Dogsled and Ice Academy’-mik taaguutilimmik, februarimi ukioq manna ingerlasseqataalerpoq. Suliffeqarfimmik ingerlatseqatini, Jørgen Kristensen, suleqatigalugu piffissap annerpaartaa atorlugu "Kalaallit Nunaat piviusoq“ takornarianut pilerinarsarlugulu takutissortarpaa. 

- Tikeraat tikeraareerlutik aallaraangata, nunatsinnut asannilersimanissaat kissaatigiinnarpara, taanna oqarpoq. 

Instagramimi quppernermini ’morganxplorer’ atorlugu, Ilulissani inuunerminit angalaartarnerminiillu assilisaminik videoliarisartakkaminillu ikkussisarpoq: Piniariarnerit, illuaqqiarnerit, qajartornerit, iluliarsuit qimmillu qimuttut. Nunatsinnut isiginnittariaatsimisulli inuit isiginnilersikkusuppai.

Morgan Angaju inoqatinut attaveqaatitigut sunniiniartartuunani oqarpoq. Instagraminili atorlugu inuit nunatsinnut angalarusulersikkunigit nunatsinnulluunniit soqutiginninnerulersissinnaagunigit, tamanna tulluusimaarutigissavaa. Assi © : @morganxplorer (Instagram)

- Nunarput qanoq ittuunersoq inunnut takutinniarsaralugu ilungersortuaannarnikuuvunga. Danmarkimimi ilisimasakinneq atuuttorujussuuvoq. Meeqqat atuarfianni nunarput pillugu ilinniagakitsuarasuusarput – qanorlu paasisaqartigissanersut ilinniartitsisup aalajangertarpaa, taanna oqarpoq nangillunilu:

- Ilinniartitsisullu ilisimasaqannginnertik pissutigalugu arlalitsigut isummiussereertarput.

'Taanna kalaallinik ilaqutalik’

Morgan Angaju meeraagallarami qatanngutini ilagalugit aatakkuminut pulaaraangami, allattuiffik qorsuk nassarlugu angalaartarput kalaallit oqaasiinik allattuillutik.

Morgan Angajup eqqaamasaani oqaaseq ilikkaqqaagaa tassaavoq 'iggu'.

- Aataga taama oqartuaannarnikuugami. Aamma aanaga, taanna oqaluttuarpoq.

Morgan Angajup (talerperleq)  aataava (saamerleq) Maniitsuminngaanneerpoq. Morgan Angaju nammineq pisaminit neqinik nunatsinniit nassiussikulavoq - aataaminut angajoqqaaminullu.  Assi © : Privatfoto

Morgan Angaju anaanaminiit kalaallinik naggueqarpoq. Aataava Maniitsumiit Danmarkimut 1971-imi nuuppoq, tassanilu Morgan Angajup aanaava naapippaa.

Aanaava 2012-imi napparsimanerminik pissuteqarluni toquvoq.

- Allanik aanattuulli nunatsinnut asannileqqatigisumik takunissara ilimaginngilara. Atisai angerlarsimaffialu tamarmi nunatsinnut tunngasunik ulikkaarput, taanna eqqaamasalikkersaarpoq.

Taamaakkaluartorli Morgan Angajup ilagisartagaasa nunatsinnut attuumassuteqartut ilaannaasa suminngaanneernertik oqaatigisarpaat.

- Ikinngutima ilarpassui uattulli tulluusimaarinnitsigalutik peroriartorsimanngillat, taanna oqarpoq.

Morgan Angaju meeraagallarami nunarput pillugu saqqummiisarnikuuvoq. Aallaqqaammut atuaqatiminut - kingornalu atuartunut allanut aammalumi atuarfinni allani.  Assi © : Privatfotos

Morgan Angajulli ikinngutini immiaarartoqatigisinnaanngoramigit tulluusimaarnera annikilliallappoq.

- Kalaallinik ilaqutalittut inuit nalunngilluarpaannga. Immiaarartortungalu takugaangaminnga kalaaliunera pillugu siornatigornit nuanniinnerujussuarmik takutitsivigisarnikuuaannga, taanna oqarpoq.

Atuartut minnerit annerusullu assigiinngissutaat eqqaamalluarpai.

- Kalaallinik ilaqutaqarnera kakkanniutigisorujussuusarnikuuara. Tassanngaannarli kalaaliuneq torrakkunnaarpoq inuillu illaruaatiginnittalerput, taanna oqarpoq.

Taamaakkaluartorli Morgan Angaju nakanganani nunarput pillugu isumalluarpaluttumik isiginnittaaseqarnini aalajangiusimaniarlugu ilungersorpoq. Atuaqatini akerlilerniarlugit aalajangerpoq.

- Nunarput pillugu atuaqatigiiaarpassuarnut oqalugiarnikuuvunga. Inuimmi ilisimasaqannginnamik - taamaattoqarneralu assut uumitsannaraara, taanna oqarpoq.

Nunarpulli nammineq tikeraarsimanngisaannarlugulu nammineq isiminik takunikuunngisaannarpaa. Ilaqutaasali Ilulissani Qeqertarsuullu Tunuani ilaqutariiullutik tamarmik angalanissaat 2014-imi pingaartippaat, tamannalu Morgan Angajup pakatsissutiginngilluinnarpaa.

2014-imi ilaqutariit Qeqertarsuup Tunuani angalaaqatigiinniarlutik Morgan Angajup angajoqqaavi aalajangerput. Assi © : Privatfoto

Angalanerup asannilersippaa. 

- Tassanngaanniilli suna tamarmi sukkalaartumik pivoq, taana oqarpoq qungujullunilu. 

Takornariaqarnerup oqaluttuaq uummaarissuutippaa

KNR-ip Morgan Angaju aggustip qaammataani naapimmagu, ulloq ataasiinnaq Nuummiittussaavoq. Yellowknifemut Canadap avannaanut aqaguani timmisartoqqittussaavoq.

Canadap avannaani ataatsimeersuarnermut, nunap inoqqaavi namminersorlutik suliffeqarfiutitaarnissaannut ilaatigut ikiuiniarfiusumi, peqataavoq.

Dogsled and Ice Academymimi qanoq iliorlutik kalaallit piorsarsimassusaannik tammatsaaliueqataanertik Morgan Angajup ataatsimiinnermi oqaluttuaraa. 

- Tamanna eqqarsaatigisimaqaara. Takornariartitsinerli nunatsinni assigiinngitsorpassuarnik ingerlatitseqqiiffiuvoq. Pingaartumik maani avannaani, taanna oqarpoq.

Taamaattumik aamma kalaallit piorsarsimassusaata puigugaanissaa ernumaginngilaa.

- Isumaqarpunga takornariartitsineq ilutigalugu annertusiartuinnassasoq, taanna oqarpoq nangillunilu:

- Assersuutigalugu takornariaqarneq pissutigalugu qimusserneq suli atugaavoq. Aammattaaq aalisartorpassuit piniartorpassuillu qimussimik inuussutissarsiuteqarput.

Morgan Angajup Ilulissat nuannareqaa. Suliffeqarfimmik piginnittoqatini, Jørgen Kristensen, peqatigalugu takornariat Qeqertarsuup tunuani inuuneq pillugu ilitsersuussisarpoq - qimussernermik, piniarnermik, sikumit aalisarnermik pinngortitarsuarmillu pinninngaartumik.  Assi © : Privatfotos

Suliffeqarfeeqqat takornarialerisut nunaqavissuniit pigineqartut, kalaallit piorsarsimassusaata puigorneqannginnissaanut attanneqaannarnissaanullu pingaaruteqarluinnartut, Morgan Angaju isumaqarpoq. Takornarialerisullu piorsarsimassutsip iluamik oqaluttuarineqarnissaa annertuumik akisussaaffigaat.  

Takornarianilli angallassisartut ilai akisussaaffimmik tamatuminnga naammassinnissinnaanngitsut Morgan Angajup nalaassimavai.

- Tamannalu qiiaamminaraara, taanna oqarpoq.

Umiarsuarmi takornariartaammi pulaarnermini arnaq qallunaaq angallassisuuvoq. Taava takornariat ilaata sooq kalaallinik angallassisoqannginnersoq apeqqutigaa.

- Arnaq taava akivoq, kalaallit suliffimminik paarsisinnaanngitsuusut aamma tamaani imigassap tungaatigut ajornartorsiuteqalaartoqartoq, Morgan Angaju oqarpoq.

Taamatut pisoqarnera nunarput pillugu isummiussereertoqartarneranik misigisaqartarnikuuneranut utersaartippaa.

- Takornariat ilai taamatut isummiussereertoqartarnera immaqa siornatigut misigereernikuuaat, Morgan Angaju oqarpoq nangillunilu:

- Taamaattoqannginneralu inissikkumallugu tamaanngartarput isorartuumik angalallutik, tamaanilu angallassisumit taamaattoqarnera uppernarsarneqassaaq, taanna anersaaruluppoq. 

Trump isummiussereertarnerullu kalunneri

Naak kalaallit nunarpullu pillugit suli isummiussereertoqartaraluartoq, kalaallit inuillu namminneerlutik isummiussereertarnernik allanngortitsiartortut, Morgan Angaju isumaqarpoq.

- Kalaaliuneq ullumikkut nunatsinni tulluusimaarutaasorujussuusoq isumaqarpunga, taanna oqarpoq.

Taassuma nagguini ’usorsisimaarutigeqai’.

- Taamaattumik tamaani najugaqarpunga. Aamma nunatsinni Issittumilu piorsarsimassuseq inooriaaserlu nunani allani nuannarineqarneruleriartortut maluginiarpara. Nunap inoqqaavi pinngortitamilu pinngortitap pissarititai atorlugit inuuneq, nunarsuarmioqatitsinniit soqutiginartinneqarput. 

Morgan Angaju tuniniaanermi bacheloritut ilinniagaqarsimavoq, Europalu pillugu kandidatinngorniarluni massakkut ilinniarluni. Assi © : Privatfoto

Akuersaarpalaartumillu soqutigineqarneq, Morgan Angajup inoqatinut attaveqaatit aqqutigalugit annerusumik malugaa.  

- Uanga aamma inuit Issittumi sumiiffinni assigiinngitsuneersut amerlasuut malittarisarpakka. Taakku malinnaasorpassuaqarput piorsarsimassusertillu usorsisimaarlutik nittarsaattarpaat. Taamaattumik nuannarineqarnera takusinnaavara, taanna oqarpoq. 

Soqutiginninnerup annertusiartornera, Morgan Angajup nammineq Instagramimini, inunnit 10.000-t sinnerlugit amerlassusilinniit malinnaaffigineqartumi, malugisimavaa. Pingaartumik  ukiup ataatsip ingerlanerani – pingaartumillu Trumpip nunatsinnik siorna decembarimi pisiaqarnissamik kissaateqarnini oqaatigeqqimmagu.

Tamassumalu pinera eqqaamaqqissaarpaa.

- Piffissap ilaani ilumoorlunga isumaqaleraluarpunga, timmisartut F16-it marluk nunarput qulaatissagaat, taavalu Trump New Yorkimiit oqarumaartoq, nunarput Amerikamiunit maanna pigineqalersoq.

Morgan Angaju 2020-miit 2023-mut bachelorinngorniarnermini aasaakkut atuanngiffeqarnerup nalaani,  Ilulissani takornarialerisutut sulisarnikuuvoq. Piffissami tassani maanna suliffeqarfimmik piginneqatini Jørgen Kristensen naapippaa, taassumalu Ilulissani piniarnermik, qimussernermik pinngortitarlu pillugu ilinniartippaa. Assi © : Privatfoto

Aallaqqaammut ernumassuteqaraluarluni, kingorna oqallinneq tusagassiuutitigullu sammineqarnera kamaatigalugulu pakatsissutigaa. Pingaartumik Danmarkimi.

- Nunarput taamaattuunngitsoq aasit taamaattunngortinneqarpoq. Nunarput tassanngaannaq pialuutitut pisiarineqarsinnaasutut, pigineqarsinnaasutut tunniunneqarsinnaasutullu inissinneqarpoq, taanna oqarpoq.

Suna tamarmili ajortuinnaanngilaq. Trumpimmi nunarput pillugu oqaaseqarneranit nunatsinnut isiginiarneq, soqutiginninneq ujartuinerlu aamma annertusiartorpoq.

- Nunarput pillugu Danmarkimi tusagassiuutitigut paasissutissarpassuit saqqummiunneqartaleriataarput. Inuppaaluit assigiinngitsut pillugit uannut oqarput: ’Arraa uagulluunniit tamanna naluarput', Morgan Angaju oqaluttuarpoq.

Suliffeqarfiit angallassisartut danskinik piginnittullit  ilisimasaqanngitsut

Morgan Angaju Canadami Yellowknifemi niuernikkut ataatsimeersuarnermi peqataareernermi kingorna, Manerassuarmi qeqertani sumiiffinnilu soorlu Tongami Fijimilu, qaammatini arlalinni angalaniarluni pilersaaruteqarpoq. Arferit nalunnguaqatigalugillu arferit arferillu pissusaat paasisaqarfigissavai.

Ilulissanut uteruni, qimussimik angalaneq aallartilluarsimassaaq.

Morgan Angaju Jørgen Kristensenilu peqatigiillutik Dogsled and Ice Academy pilersippaat. Ukioq kaajallallugu takornarianik angallassisarput, soorlu qimussertitsillutik, umiatsiartitsillutik paddleboardertitsillutilluunniit. Assi © : Dogsled and Ice Academy

Siunissami Jørgenilu namminneq suliaminnik inuussutiginniinnarsinnaanissaq takornarialerinermillu suliffeqarfissuarnik qallunaanit pigineqartunik unammisariaqannginnissaq neriuutigaa.

- Jørgenilu millionærinngorusunngilagut. Ullormut pisariaqartitavut naammattut pissarsiariinnarusuppavut nuannarisatsinnillu inuussutissarsiuteqarluta, umiatsiaaqqat Nuummi nunarsuup isuanut ingerlaartut qimerluujutigalugit oqarpoq.

Suliffeqarfissuilli taakku ilaannikkut unammillerusulersitsisarput.

- Qallunaat suliffeqarfissui, umiatsiarsuarnik saviminiusunik angalanerit tamaasa 65-inik ilaasoqartartut, eqqunngitsunik paasissutissiisartillugit uagut suliffeqarfiuterput annerulersikkusulertarpara, taanna oqarpoq.

Taanna Jørgenilu takornarianik angallassisunik sisamat tallimallu akornanni angalatitsisoqarput, amerlanerpaallu arfineq-marluk angallamminnut ilaasorisinnaasarpaat.

- Taamaattumik ilaannikkut tamanna kajumississutigisarpara. Qallunaat suliffeqarfiutaat angivallaarujussuarput.