Ilinniartitsisut Kattuffianni siulittaasoq qinigaaqqittoq

Elna Thomsen Heilmann Ilinniartitsisut Kattuffianni IMAK-imi siulittaasutut sapaatip-akunnerata naanerani qinigassanngorteqqippoq. Unammillerneqarnanilu ukiuni sisamani tulliuttuni atuuteqqinnissani qulakkeerpaa.

- IMAK-ip Sinniisoqarfianut ilaasortanit, qinersisinnaasunit tamanit, 28-nit, siulittaasutut qinerneqarnera assut nuannaarutigaara. Tamanna Sinniisoqarfiup ataatsimoorneranik ersersitsivoq, tusagassiuutinut nalunaarummi oqaaseqarpoq.

Elna Thomsen Heilmann siullermeerluni 2021-mi siulittaasunngorpoq.

- Sinniisoqarfimmut ilaasortanit uannut tatiginninnerujussuarmik takutitsisoqarpoq. Tamannalu uanga sulininni nukittoqqutigissavara, taanna oqarpoq.

Oquk sakkortusaarnerlu oqaluuserisassaniittut

IMAK 1300 missaannik ilaasortaqarpoq, amerlanerpaartai nunatsinni meeqqat atuarfiini atorfeqartuullutik.

Sinniisoqarfimmut ilaasortat, Nuummi sapaatip-akunnerata naanerani ataatsimeersuarneranni siulittaasumik qinersinissaq kisimi oqaluuserisassaniinngilaq.

Ilinniartitsisut sullivimminni avatangiisaat atugaallu aamma ilaapput.

Matumani sumiiffippassuarni illuni silaannaloqisuni oquttunilu ulluinnarni suliffigisartagaat pineqarput.

- Tamanna ilinniartitsisut kisimik ajornartorsiutiginngilaat. Sullitattami pingaarnerpaat, tassa meeqqat, tamanna aamma ulluinnarsiutigilersimavaat. Taamaattumik qinikkat atuarfinni avatangiisit pillugit sulinerat pitsaanerujussuusariaqarpoq, tusagassiuutinut nalunaarummi Elna Thomsen Heilmann oqarpoq.

Atuarfinni ilinniartitsisunut atuarfiillu pisortaannut nakuusernerit sakkortusiartuinnarlutillu amerliartuinnarmata, taakku annerusumik illersorumallugit suliaqartoqarnissaa ataatsimeersuarnermi aamma aalajangerneqarpoq.