Danmarkimi kommuninut qinersisoqarnerani kalaalertaqalertut
Naqqiissut: Poul Bloch Jensenip suliffeqarfik GLTolk ingerlatarigaa ilanngutassiami siuliani saqqummiupparput, suliffeqarfimmulli attuumassutaarunnikuuvoq. KNR ajuusaarpoq.
Kommuninut nunap ilaanullu marlunngorpat qinersisoqalernerani allagartarsuit Danmarkimi nivinngaassorneqaleruttorput.
Qineqqusaartut marluk allagartarsuarni takuneqarsinnaasut kalaallisut tunuliaqutaqarput. Lisa Bundgaard Jensen Tunumi Kuummiineersoq Jyllandip avannaani Morsip qeqertaani Radikale Venstre tunuliaqutaralugu qinigassanngortippoq.
- Inuit immikkullu inuiaassusillit ikinnerussuteqartut tamakkerlugit nunap immikkoortuini qinigaqartoqartariaqartoq isumaqarpunga, taanna oqarpoq.
Lisa Bundgaard Jensen ungasissumut angalasartuuvoq. Kalaallit Nunaanni Danmarkimilu peroriartorpoq, inersimasunngoramilu Spaniami Tysklandimilu najugaqarpoq. Morsimi maanna najugaqarpoq, kulturikkut suliaqartartuuvoq, kalallit kulturiannik kulturikkullu naapeqatigiinnerit pillugit saqqummiisartuuvoq.
Aamma immaqa – qinersisut piumassappata – kommunimi politikerinngussaaq.
- Akuunerulersitsineq, assigiinngisitaarneq naligiinnerlu pingaartitaraakka. Assigiinngitsuunerput nukittut isigaara.
- Meeqqat atugarissaarnerulernissaat aamma sulissutigissavara. Kalaallit Nunaanni immitsinnut isumagilluarsinnaanerusarpugut ataatsimoornerusumillu eqqarsartaaseqarluta. Tamanna maani ilinniarneqarsinnaagaluarpoq, tamannalu tamaviaarutissavara, taanna oqarpoq.
Pisinnaagaanni iliuuseqartoqartariaqarpoq
Nunap illuatungaani qeqertaq alla – aalajangersimanerusumik Langeland - Poul Bloch Jensen kommunimut qinersisoqarnissaanut sassarpoq.
Taanna maani politikkeqarnermi Partii Inuit-mik pilersitseqataasutut ilisimaneqarpoq, kalaallit saammaateqatigiinnissamut ataatsimiititaliaannik oqaluuserisassanngortitsinikuulluni.
Taanna Danmarkimut 2016-imi nuuppoq, politikkikkut misilittakkani atorlugit Konservative sinnerlugu qinigassanngortippoq.
- Inuiaqatigiit najugaqarfigisanniittut sullikkusuppakka, iliuuseqarfigineqarsinnaasunillu allannguerusuppunga. Pisinnaagaanni iliuuseqartoqarsinnaasoq isumaqarpunga, taanna oqarpoq.
Poul Bloch Jensenip inuussutissarsiornermut aamma inuuniarnikkut ajornartorsiortunut atugassarititaasut pitsaanerulernissaat qineqqusaarutigaa.
Allagartarsuarmi kulturi
Kalaallit Nunaat ukioq manna oqaluuserisassaniingaatsiarpoq. Tassami USA-p Kalaallit Nunaat aqulertariaqaraa, Amerikamiut præsidentiata Donald Trumpip oqaaserisai pillugit nutaarsiassaniingaatsiarpoq.
Soqutigineqarnerujussuaq ajunngitsumik sunniuteqartoq Lisa Bundgaard Jensen isumaqarpoq. Allagartarsuarmi kalaallit atisaliaat iverutillu kalaalerpaluttut atorlugit assitaliunnissaa aalajangiuppaa.
Danskit tusagassiuuteqarfiini inuit namminermisut ittut amerlanerusut sulisinneqarnerunissaat peroriartornermini kissaatigisarpaa.
- Immikkut inuiaassusera kulturimalu takutinnissaa pingaartittorujussuuara. Siornatigut merserisimassagaluarpara, taanna oqarpoq nangillunilu:
- Kalaallit Nunaat pillugu isummat pigiliutiinnakkat amerlasoorpassuupput aamma ilisimasaqannginneq, tamatumalu aaqqiivigineqarnissaannik kissaateqartut maani Danmarkimi inuppassuit ukioq manna paasilerpaat.
Taamaakkaluartoq qineqqusaarnissap aallartinnginnerani eqqasuuteqarpoq.
- Assigiinngisitsisoqarneranik misigisaqarnissara pillugu ernumallungalu eqqasuuteqarpunga. Allagartarsuit nivinngakkakka peerneqariarlutik iginneqarsimasut aamma misigaara.
- Sumiiffimmili politikerit oqaloqatigisakka inussiarnersorujussuupput sassarneralu ajunngitsuusoq misigitillunga. Siornatigut oqaasissaqartitaanngitsut sinnerlugit sassarnissara akisussaaffigigiga misigaanga, naak ilaatigut sinissaarussutigisaraluarlugu, Lisa Bundgaard Jensen oqarpoq.
- Kalaallit nunaannik soqutiginninnerujussuaq Poul Bloch Jensenip aamma malugaa. Soqutiginninnerujussuup annikillisinnissaa maanna ajunngitsoq, taanna isumaqarpoq.
- Trumpi Kalaallit Nunaallu oqaluuserineqaqaat, taakkualu eqqartorneqaleraangata qatsussineq maanna malunnarsivoq. Taakkulu pillugit oqaluuserineqarpallaarunnaarput, taarsiulluguli sumiiffimmi iliuuseqarfiusinnaasut pineruagut, taanna oqarpoq.
