Oquk pissutigalugu Nuummi atuarfimmik matusoqaqqittoq

Nuummi Atuarfik Samuel Kleinschmidtimi (ASK) init arlallit oqoqartut paasineqarnerat pissutigalugu atuarfik matuneqarallarpoq.

Kommuneqarfik Sermersooq nittartakkaminni paasissutissiivoq.

Kommuni pilertortumik akisussaassuseqartumillu iliuuseqartoq borgmesterip Avaaraq Olsenip (IA) oqaatigaa, taassumalu meeqqat ilinniartitsisullu peqqissusaat salliutinneqartuaannartoq erseqqissaatigaa.

- Pilertortumik akisussaassuseqartumillu iliuuseqarpugut. Meeqqat sulisullu peqqissusaat salliutinneqartuaannarput.

- Isumakululertoqarnera paasisinnaavarput, atuartitsinerilli unitsinneqaratik ingerlaannarnissaat anguniarlugu tamaviaarpugut, Avaaraq Olsen oqarpoq.    

Atuarfimmi allami, tassa USK-imi oqummut assingusumik ASK-imi nassaartoqarnera pissutigalugu ASK-ip matuneqarnissaanut aalajangertoqartoq, kommuni aamma allappoq, USK septembarimi matuneqarpoq.

ASK ‘isumannaallisaaneq’ pissutigalugu matuneqartoq, kommune allappoq.

Misissuinerup akissutai takkutijaartut

Atuartut ukiaanerani atuanngiffeqalinnginnerminni pigisaminnik poortueqquneqarput, atuarfillu matussanersoq suli qularnartoq Kommuneqarfik Sermersuup sapaatip akunnerani matunani nalunaarutigaa.

Atuarfiup iluata silaannaanik misissuinermi inernerit sapaatip akunnerata tulliani aatsaat akissutersineqarnissaat tassani pissutaapput.

Atuarfilli matuvoq, atuartullu ininut allanut nuutsinneqassapput, atuartut taamaalillutik atuartinneqaannarsinnaassallutik, kommune allappoq, borgmesterillu paasinnittoqarnissaa kissaatiginerarpaa.

- Uani pisumi angajoqqaat sulisullu paasinninnissaat suleqataanissaallu kissaatigaarput. Ilimaginngisatsinnik pisoqarpoq, meeqqalli toqqissisimanartumiitinniarlugit suleqatigiippugut, borgmesteri, Avaaraq Olsen naggasiivoq.

Kommuneqarfik Sermersuup islandimiut sanaartugassanik suliffeqarfiannut Istakimut isumaqatigiissuteqarneranni ullormi tassani atuarfiup matuneqarnissaa nalunaarutigineqarpoq. Istak Atuarfik Inussummik sanaartoqataavoq, atuarfillu piffissami sivisuumi atorneqanngilaq. Isumaqatigiissuteqartoqarnera pissutigalugu atuarfiup 2026-mi aggustimi ammarnissaa naatsorsuutigineqalerpoq.