Droneqarneranik pasitsaassisoqarnera pissutigalugu Aalborgip mittarfia matullatsiarneqartoq

Aalborgip mittarfiata eqqaani dronenik silaannakkoortoqarneranik pasitsaassineq pissutigalugu, mittarfik sapaatiummat unnukkut matuneqarpoq.

Matuneqarneranit akunnerup ataatsip missaa qaangiummat, nalunaaqutaq 23.30 sioqqutitsiarlugu, silaannakkut angallannerup ammaqqinneqarnera Naviairip tusagassiuutinut sillimasuata Jan Eliassenip nalunaarutigaa.

Naviair timmisartut Danmarkimi silaannakkut isumannaatsumik angalanissaannut akisussaasuuvoq.

- Timmisartut aallarsinnaallutillu missinnaaleqqinnerat aalajangerneqarpoq, Jan Eliassen oqarpoq.

Mittarfimmi susoqarsimanera kiisalu suna tunngavigalugu silaannakkut angallassinnaanermut ammaassisoqaqqinera taassumap itisilinngilaa.

- "Aalborgip mittarfiata eqqaani dronemik ataatsimik arlalinnilluunniit takunnnittoqarsimaneranik ilisimasaqarlutik“, Jyllandip avannaani politiit inuit attaveqaqatigiittarfianni X-imi sapaammi kingusissukkut allapput.

Politiit sumiiffimmik misissuilluarsimanerat tassunga atatillugu oqaatigineqarpoq.

'Arlaatigut susoqartoq'

Politiit sumiiffimmi misissuinerat ataasinngornerup unnuaani nalunaaqutaq 01.40 naammassineqartoq, Jyllandip avannaani politiit sillimasuisa pisortaanit, Morten Axelsenimit, ataasinngornermi ullaaralaakkut nalunaarutigineqarpoq.

- Silaannarmi angallaviusartumi droneqarsimanersoq suli ilisimaneqanngilaq, taanna oqarpoq.
- Dronet takuneqarsimanersut suli uppernarsineqanngilaq.

Aalborgip mittarfiani pisortamut tullersorti ingerlatsinermullu pisortaq Kim Bermann naapertorlugu, silaannaq angallaffiusartoq nalunaaqutaq 22.10 missaani matuneqarpoq.

- Isumannaatsumik angallattoqarsinnaannginnera pissutigalugu, Naviair-ip silaannakkut angallanneq matugaa, nakkutilliisoqarfimmit sianerfigitillunga paaseqqammerpara, Kim Bermann sapaatiummat unnukkut Nordjyskemut oqarpoq.

Timmisartoq KLM-imeersoq Amsterdamimiit Aalborgiliarluni sapaammi unnukkut mittussaq, Billundip mittarfianukaqquneqarsimasoq, Kim Bermann Ritzauimut kingorna oqarpoq.

Aalborgip mittarfiata nittartagaa naapertorlugu, timmisartut marluk Københavnimiit qangattartussat Aalborgimut sapaatiummat unnukkut mittussaasimagaluarput - SAS-ip timmisartua nalunaaqutaq 22.10 mittussaq aamma Norwegianip timmisartua nalunaaqutaq 22.15 mittussaq.

SAS-ip timmisartuussinissaralua, mittarfiup nittartagaa naapertorlugu, taamaatiinnarneqarsimavoq.

/ritzau/