Drone-qareernerata kingorna sakkutuut nunanit allaneersut Danmarkimi sulissasut
Danmarkimi silaannakkut angallanermi qanittukkut pisut pissutigalugit "piffissami aggersumi" sakkutuut nunanit allaneersut amerlanerusut Danmarkimut tikissapput.
Taamatut illersornissaqarfik nittartakkamini allappoq, tassanilu sakkutuut, sakkutuut immikkoortortaqarfii atortussallu nunanit allaneersut qanoq sivisutigisumik Danmarkimiissanersut erseqqissaatigineqanngilaq.
Dronet aamma dronenik pasitsaassineq pissutigalugit Danmarkimi silaannarmi angallassinerup ilaanik arlaleriarluni matusinerup kingorna nunat arlallit danskit oqartussaasui tapersersorniarlugit aalajangersimapput, ilaatigut dronenut akiuussutissanik politiinillu sulisitsinikkut tunissuteqarlutik.
- Iligisartakkatsinnit qanimut suleqataasunit maannakkut tapersersorneqarneq nunani tamalaani Danmarkip EU-mik Natomillu suleqateqarluarneranik uppernarsaataavoq, illersornissamut pisortaq Michael Hyldgaard Illersornissaqarfiup nittartagaani oqarpoq.
Naleqqussapallassinnaasut
Taamaalillutik sakkutuut „pissutsinut maanna atuuttunut“ sukkasuumik naleqqussarsinnaanngortut nangilluni oqarpoq.
Nunanit allanit ikiuisut qanoq sivisutigisumik Danmarkimiissanersut nalunarpoq, ullunili tulliuttuni Københavnimi EU-p ataatsimeersuarnerani nunat arlallit ikiuukkumallutik nalunaarput.
Nunat taakkua ilagaat USA, nunat siuttuisa ataatsimeersuarneranni Danmarkip dronenut illersornissaanut atortussanik tapersersuisoq.
Frankrigittaaq qulimiguulimmik Fennecimik kiisalu inunnik 35-nik dronenik illersuisussanik neqeroornermigut ikiuussimavoq.
Sverigep aamma atortussiat dronemut akiuussutissat "radarillu sakkortuut arlallit“ EU-mi ataatsimeersuarnernut atatillugu atukkiuppai, taakkualu „piffissami killilimmi“ atugassaasut, Sverigemi ministeriuneq Ulf Kristersson oqarpoq.
Aammattaaq Sverige ilaatigut EU-mi ataatsimeersuarnernut atatillugu Københavnimut politiinik motorcykelertartunik alapernaarsuiartortitaqarlunilu qaartartunik ujaasisartunik qimminik aallartitsivoq.
Tamatuma saniatigut Tuluit Nunaat, Norge, Tysklandi, Hollandi, Poleni, Finlandi Ukrainelu aamma ikiuupput.
/ritzau/
