Nunatta Issittup eqqissisimanissaa pillugu Japanimiut aningaasaateqarfiat suleqatigisussanngoraa
Naalakkersuisut Japanimiut aningaasaateqarfiat, Sasawawa Peace Foundation Issittumi eqqissineq sillimaniarnerlu pillugit ilisimatusarnissamut suleqatigiinnissamut isumaqatigiissuteqarfigaat.
Isumaqatigiissut Nunanut allanut Ilisimatusarnermullu Naalakkersuisumit, Vivian Motzfeldtimit aamma aningaasaateqarfiup præsidentianit, Atsushi Sunamimit novembarip 14-ianni tallimanngornermi atsiorneqarpoq.
Nunatta eqqissinermut suliniarfia
Nunatsinni nunanut allanut, sillimaniarnermut illersornissamullu 2024-mit 2033-mut periusissiami nunatta nunanit tamalaanit suleqateqarluni eqqissinermut suliniarfimmik pilersitsinissaa anguniagaavoq. Japanimiut aningaasaateqarfianik suleqateqarneq Issittumi ilisimasanik ineriartortitsinissamut ilisimatusarnissamillu suliaqarnermut tapertaassaaq.
- Nunarsuarmi pissutsit allanngoraqisut inuuffigaavut. Aatsaat taama pingaaruteqartigilerpoq eqqissineq pillugu suliniarnerup nukittorsarneqarnissaannut. Nunarput sorsuffiusimanngisaannarpoq, tamannalu attattuarusupparput.
- Nuannaarutigingaarparput Nuna ukiorpassuarni eqqissinermut oqaloqatigeeriaatsinillu eqqissinermut tunngaveqartumik ineriartortitsisimasoq suleqatigisussanngoratsigu. Isumaqarpunga nunarput eqqissineq pillugu ilisimasanik nunarsuarmioqatigiinnut tunniussassaqartoq, katersuuffiusinnaasorlu, Vivian Motzfeldt oqarpoq.
Eqqissineq pillugu nunanut assigiinngitsunut katersuuttarfiussasoq
Nunatta Japanimiut eqqissineq pillugu ilisimatusarnermik suliaqarnerat isumassarsiorfigaa, taamaammallu Sasakawa Peace Foundation eqqissinermut suliniarfeqalersinnaanermut oqaloqatigiissuteqarfigilerpaa. Isumaqatigiissummi ilisimatusarnerup, ilinniartitaanerup, oqaloqatigiinnerup, paarlaasseqatigiinnerullu iluani suleqatigiinnissat ilaapput.
The Sasakawa Peace Foundation 1986-imi pilersinneqarpoq, Japanillu nunanik allanik suleqateqarneranut nukittorsaanermik suliaqarluni. Aningaasaateqarfik Japanimi naalagaaffimmit taperneqartarpoq, taannalu nunat assigiinngitsut akornanni nersualaarneqartarluni.
Naalakkersuisut oqarnerat naapertorlugu eqqissinermut suliniarfik nunat tamalaat akerleriinnerit aamma eqqissinerit ilisimatusarfiginissaannut, eqqissinissamut ikiuunnissamut, pingaartumillu Issittumi piujuartussamik ineriartortitsinissamut katerittarfigileratarsinnaavaat.
