Pinerluttaalisitsisut ikiorserneqarnissaat qanilliallattoq
Thin Blue Line Denmarkip misissuineq, nunatsinni pinerluttaalisitsisut sisamararterutaasa sulinermit kingunerluuteqartualersimanerannik takutitsisoq qaammammi matumani siusinnerusukkut saqqummiuppaa.
Tamatuma kingorna ikiuiniarnermi akitsorterussisoqarnerani, ikiuiniaqatigiiffiup Kalaallit Nunaanni politiinut pinerluttaalisitsisunut suliaqaqqinnissaanut 425.930 koruunit atorneqartussanngortinneqarlutik qulakkeerneqarput.
Taamaammat Thin Blue Line Denmarkimi pisortaq, Stinne Ølshøj aamma suliniummi aqutsisoq, Henrik Bertram suliniutip sumiiffimmi aallaaveqartumik iliuuseqarnerup piujuartunngortinneqarnissaanut aallarniiartorlutik nunatsinniipput.
- Thin Blue Line Denmarkip suliaanik Kalaallit Nunaanni kivitsisinnaasunik Kalaallit Nunaanni sumiiffimmi aallaaveqartumik nammineq kajumissutsiminnik suliaqartunik nukinnik atuilluta immikkoortortaqarfeqalernissarput takorluugaraarput, Henrik Bertram oqarpoq.
Taakku tikeraarnerminni Sisimiuni, Aasianni, Ilulissani, Kangerlussuarmi Nuummilu politiit ataatsimeeqatigaat. Illoqarfinni ataasiakkaani pisariaqartitanik paasisaqarnissaq attaveqaqatigiiffimmullu annerusumut aallarniinissaq siunertaavoq.
Najukkami attaveqaqatigiinneq kalaallinillu aallaaveqartoq
Ikiuiniaqatigiiffik 2026-p naanissaata tungaanut sammiviit marluk samminiarpaat: Kalaallit Nunaanni pinerluttaalisitsisunut inooqataanikkut sammisaqartitsinerit aamma immikkut ilisimasalinnik terapimillu najukkami Danmarkimilu neqeroorutigineqarsinnaassapput.
Inooqataanikkut sammisat mattusimajunnaarnissamut aamma pinerluttaalisitsisut akornanni ataatsimoornermik pilersitsinissamut siullertut tunngassuteqarput. Politiiunerluni imaluunniit politiiusimanerluni, politiinut ikiortaasimanerluni imaluunniit kommunefogediusimanerluninerusut apeqqutaanngilaq.
- Kalaallit Nunaanni nunap immikkoortuini tamani inummik ataatsimik Nuummi aqutsisunut atassuteqataasinnaavoq, taannalu illoqarfinni ataasiakkaani pinerluttaalisitsisunut sammisassaqartitsisarsinnaalluni, Henrik Bertram oqarpoq.
Sammisaqartitsinerit kalaallinut tunngaveqassapput. Pinngortitamut angalaarnerusinnaavoq, ataatsimut misigisassarsiorneq pinerluttaalisitsisunut pisortatiguunngitsumik ataatsimoortitsisoq aamma amerlasuut kisimiillutik tigummisartagaannik oqaluuserinninnissamut ajornaannerulersitsisoq.
- PTSD-qaraanni qisuariaatit amerlasuut ilisarisinnaasarpaat: assersuutigalugu kamassimaqqajaasoqarsinnaavoq, sakkortuumik qisuariartoqarsinnaavoq, imaluunniit tunuartertoqarsinnaavoq. Amerlasuut ajoquteqartutut misigisimalertarput. Allanik ilisimannillutik oqaaseqartunik naapitsigaanni tamanna nassuiaatissartaqartoq ersarissisarpoq. Taamaalillutillu uatsinniit ikiorneqarnissaat aamma oqinnerulertarluni, Stinne Ølshøj oqarpoq.
Thin Blue Line Denmarkimit misissuinermi apersorneqartut 87 procentiisa sulinerminni pissutsit artukkiisut pisulluunniit sakkortuut qaammammut ikinnerpaamik ataasiarlutik marloriarlutilluunniit nalaattarpaat. Pisunik sakkortuut nalaataat ilaatigut tassaapput ajutoornerit, imminut toquttut, nakuusertut, kinguaassiutitigut atornerluinerit. Pisullu tamakku PTSD-qalernermik uippakajaalernermik imaluunniit angsteqalernermik kinguneqarsinnaapput.
Apersorneqartut 21 procentii inooqataanikkut peqataanerup avataaniilersimallutik oqaatigaat. Amerlasuullu ilaqutariinnerat aamma sunnerneqarsimalluni.
Taamaammat Kalaallit Nunaanni najukkamut tunngaveqartumik suliaqarnissaq ujartuinermi suliaqarnerup pingaartup ilagigaa, Henrik Bertramip aamma Stinne Ølshøjip oqaatigaat.
Kalaallit Nunaanni suliniuteqarnermi immikkut ilisimasalimmik neqerooruteqarsinnaalernissaq pingaaruteqartut aamma ilagaat.
Pinerluttaalisitsisut siullertut aamma ilaqutaasut qanigisaasullu kingorna sammineqassasut, Stinne Ølshøj oqarpoq.
- Inunnik ataasiakkaanik terapeutimik aamma tarnip pissusianik ilisimasalinnik oqaloqateqartartoqareerpugut, taakku kalaallit danskisullu ingerlanneqarsinnaapput. Danmarkimi aamma eqimattakkaanut ingerlatsisarpugut, tassunga peqataasussat angalatittarpagut. Kiisalu illoqarfinnut ataasiakkaanut najukkami pinerluttaalisitsisunik oqaloqateqariartortartoqarluta.
Ajortukkerneqarnerit sunniuteqartartut
Henrik Bertramip aamma Stinne Ølshøjip pinerluttaalisitsisut artukkerneqarsimanerminnik ukiorpassuarni tigumminniinnarsimasut amerlasuutigullu tapersersorneqarsimanngitsut anguneqarnissaat aamma pingaartitaraat.
- Oqaluttuat sakkortunerpaat tusarsimasakka pinerluttaalisitsisunit ukiorpassuarni ullut tamaasa, ukioq kaajallallugu sakkortuunik nalaataqartartuneerput. Kalaallit pinerluttaalisitsisut, illoqarfinni avinngarusimasuniittut, ukiorpassuarnilu assigiinngitsorpassuarnik pissuteqartumik sulisunik amigartumiissimasut sulianilu amerlasuuni kisimiittariaqarsimasut, Henrik Bertram oqarpoq.
Taamaammat nammineq Stinne Ølshøjillu suliniuteqarnermi atorfeqarsimasut pinerluttaalisitsisutullu suliunnaarsimasunut aamma pineqarput.
Suliffimmiikkunnaarsimasut tarnimikkut ikilerneqarsimasut aamma taakku suliffimmut allamut ingerlaqqissimasut kisiannilu nalaassimasaminnik suli tigumminnittut immaqalu ikiorneqarsinnaanerminnik ilisimasaqanngitsut aamma pineqarput.
Henrik Bertramip Stinne Ølshøjillu nammineq kajumissutsiminnik suleqataarusuttut pingasut sumiiffinni suliaqaqataasussat pissarsiarereerpaat: tassa pinerluttaalisitsisutut atorneqarsimasut sulisunut immikkoortortaqarfimmik tunuliaqutalik, politeeqarfimmi aqutsisuusimasoq ukiorpassuarnilu misilittagaqartoq kiisalu danskit politeeq piffissami sivisuumi Kalaallit Nunaanniittoq.
Nammineq kajumissutsimik suleqataaniartut siulliit inissereermata najukkamik tunngaveqartumik suliniuteqarnerup ukiuni aggersuni ineriartortinneqarsinnaanissaa Thin Blue Line Denmarkip neriuutigaa, pinerluttaalisitsisut sulisimasullu taamaalillutik sulinerminni misigisimasatik kisimiillutik tigummiinnassanngilaat.
