Nalik Venturesimi pisortaq nutaaq
Peter Christensen Nalik Venturesimi pisortanngorpoq. Namminersorlutik Oqartussat suliffeqarfiutaat tusagassiuutinut nalunaarummi taama paasissutissiivoq.
Peter Christensen atorfimmi misilittagaqareerluni atorfinitsinneqarpoq. Taanna marloriarluni pisortaagallartutut atuuffeqarpoq, suliffeqarfimmilu 2022-miilli CFO-tut inissisimalluni.
Suliffeqarfimmut nunatsinnilu inuussutissarsiornikkut suliffeqarfiup inissisimaneranut ilisimaarinnilluarnera tunngavigalugit, Peter Christiansen aqutsisunngornissaminut piareersimavoq, Nalik Ventures allappoq.
- Peter ukiorpaalunni aaqqissugaanitta iluani pingaarutilittut inissisimasuuvoq, tamannalu tunngavigalugu tatigilluinnarparput Nalik Ventures piffimmut aalajangersimasumik aningaasaliinernut ineriartornernullu pitsanngorsaanissamut ingerlariaqqitsitsissasoq. Suliassami piumasaqaataasut aaqqissugaasumik tamakkiisumik isiginnittaaseqarneq najukkamilu atuutsitsilersitsisarneq piginnaasaqarfigai, siulersuisuni siulittaasoq Miki Lynge oqarpoq.
Takornariaqarnermi misigisassanillu suliassaqarfiit iliuuseqarfiginiarai
Nalik Ventures naapertorlugu, piffimmi takornariaqarnermi misigisassanillu suliassaqarfinni pisinnaassutsikkut iliuuseqartoqarnissaani inerisaanissamilu atorfinitsitsineq pivoq.
Nalik Venturesimi kapitalip tullia tassaavoq ineriartortitsinissamut tunngaviit pitsanngorsarnissaat aamma ineriartornermut nutaamut ikorfartuutaasinnaasunik aningaasaliinissamut orniginarsaanissaq. Tassani umiatsianik angallassisartut, camp-it imaluunniit suliniutinut angisuunut, matumani akunnittarfinni suliassaqarfinni attaveqaasersuutit pineqarput.
- Nalik Ventures tapersiinermik taarsigassarsinermillu taamaallaat suliaqarfiussanngilaq, isumassarsianik piviusunngortitsiviussaaq. Isumassarsiat sumiiffimmi aalajangersimasumik allannguiviusinnaasut, inuussutissarsiorfillu periarfissagissaarnerpaaffiani pitsanngorsaaqataalluni, Peter Christiansen oqarpoq.
Ineriartorneq nuna tamakkerlugu pitsanngorsarneqassaaq
Aallarnisaasut ataasiakkaat annertuumillu suliniuteqartut tamarmik inissaqartinneqarnissaat pisortartaap pingaartitaraa.
Suliniutit pilersaarusiallu aalajangersimasut aqqutigalugit Nalik Ventures suliffeqarfimmik aallartitsisoqarnissaanut pisariillisaasarpoq, aningaasaliinernullu annertuunut aalajangiinissamut tunngaviliinissap nukittunerusumik pinissaanut suliaqaqataassalluni.
- Peqataarusuppugut sumiiffiillu periarfissallit, illoqarfiit anginerusut kisiisa pinnagit aallukkusullugit inuussutissarsiorfiit suliffissanik pilersitsiviusut pitsanngorsaaqataavigerusuppavut, Peter Christiansen oqarpoq.
