Naak qarasaasiatigut saassussisoqaqqammereersoq qinersinernik kisitsinissaq aarlerinartumiinngitsoq

Danskit partiivisa kommuniisalu nittartagaat arlallit,  Ruslandimut tapersersuisunit qinersinissap tungaanut qarasaasiakkut innarlerneqareersullu, qinersinermut akisussaasut naapertorlugit marlunngornermi qinersinissaq aarlerinartoqanngilaq.

Danmark nunarsuarmi inuiaqatigiippassuit akornanni, digitalimik ingerlatsinerpaajusut ilagaat, Danmarkimili qinersinermi taasinerit, qarasaasiaq atornagu, assammik nammineq allataapput qinersinernillu kisitsineq aamma assaat atorlugit pisarluni. Taamaaliornikkut qinersineq innarlerneqariaannaanngilaq, nunami namminermut tunngasunut ministereqarfimmi qinersinermut allaffeqarfimmiit taama ilisiımatitsisoqarpoq.

- Assersuutigalugu qarasaasiat ajortikkaluarpata innaallagiarunnermiluunniit uniinnartoqarnavianngilaq. Taamaattoqassagaluarpat naneruutit qaammarngani qinersinerit kisinneqarsinnaapput.

- Taamaalioreernerullu kingorna qinersinerup inernera naatsorsuut, pappiaraq aqerluusarlu atorlugit naatsorsorneqarsinnaavoq. Taamatut iliorneq sivisunerulaassaaq, qinersinerilli kisinneqarnissaanut akornutaanngilaq, qinersinermut siunnersorti Christine Boeskov allakkatigut oqaaseqarpoq.

Qarasaasiakkut inupiluusersortartut Ruslandimik tapersersuisut NoName057(16)-imik atillit  qinersinissaq sioqqullugu nittartakkat arlallit matusimanerarlugit internetikkut attaveqaqatigiittarfinni allapput.

Naatsorsuutigineqartoq

DDoS-ikkut saassussineq pineqarpoq. Nittartakkat paasissutissanik annertuunik artorsittarpaat. Taamaaliornikkut nittartakkat matuneqarsinnaapput.

Saassussinerit eqqumaffigineqartut, Inuiaqatigiinni isumannaallisaanermut aqutsisoqarfimmit tusagassiuutitigut ataasinngornermi allaaserineqarpoq.

Ullormi qinersiffiusumi marlunngornermi, qinersinerit qinersiffinneersut kisinneqalerpata, qinersititsinermi aaqqissuusseriaaseq nutaaq misilinneqassaaq.

Kommunit qarasaasialerisuisa ataatsimoorfiat Kombit tamatuminnga suliaqartuuvoq, ullormilu qinersiffiusumi suna tamarmi pissusissamisut ingerlanissaa taakkua naatsorsuutigaat.

Pisortaaneq Kristian Vengsgaard, atuagassiami Danske Kommuner-imi, Kommunernes Landsforeningimit saqqummersinneqartartumi, sapaatip-akunnerani kingullermi taama oqarpoq.

- Aaqqissuussinerup nutaajusup aaqqissuusseriaaseq ukiut 30-40-t matuma siornatigut atuuttoq taarserpaa, aaqqissuussinerullu pisoqqap sananeqarnerata nalaani nunarsuup, ullutsinnut sanilliullugu, allarluinnarmi inissisimanikuunera eqqarsaatigalugu isumannaatsuunissarlu pillugit aaqqissusseqqittoqarpoq, taanna Danske Kommuner-imut oqarpoq.

Nittartagaq qinersinerup inerneranik saqqummiussiffik qarasaasiatigut saassussinermit matuneqassagaluarpalluunniit tamanna qinersinermut qinersinerullu inerneranut tamanna sunniuteqarnavianngitsoq oqaatigineqarpoq.

Inuiaqatigiinni isumannaallisaanermut aqutsisoqarfik naapertorlugu, qarasaasiatigut saassussinerit qinersinissap tungaanut amerliartornissaat naatsorsuutigineqarsimavoq, kiisalu "qinersinerup naalagaaffimmit qarasaasiatigut inupiluusersortartunit qarasaasiatigut saassussinikkut sunnerniarneqarnissaa ilimanaateqannginnerunerusoq."

/ritzau/