’Qanoq?' Peqqinnissaqarfimmi nunat allamiut sulilernerat oqaatsitigut akimmisaarutaassaaq

Nakorsat, peqqissaasut aamma ernisussiortut Danmarkimi sulissagunik sulisinnaanermut akuersissummik peqarnissaannik piumasaqaat nunatsinni sulilersussanut siunissami pisariaqassanngilaq.

Tassa nunanit allanit sulisussarsiorsinnaanermut isumaqatigiissummi nutaami inernerusoq.

Pisup kingunisaanik kalaallisut danskisullu oqalussinnaanngitsunik peqqinnissaqarfik atorfinitsitsisinnaalerpoq. Ajornartorsiutinik kinguneqarsinnaasoq, Charlotte Bøgelund, Ernisussiortut Kattuffianni siulittaasoq oqarpoq.

- Nakorsianut pisut erseqqissumik nassuiaatigisinnaasariaqartarpagut, nakorsiartut qanorpiaq innerat inuttaanut paatsoornanngitsumik oqaluttuaralugulu paasissutigisinnaaniassagatsigu.

Peqqinnissaqarfik ullumikkut oqalutsinik peqareerpoq, pisariaqartinneqarmata, ajornanngitsumimmi peqqinnissaqarfimmi sulisut nakorsiallu paaseqatigiissinnaasariaqarput.

- Nakorsiap nakorsarneqarnissaminut atatillugu namminerpiaq susoqartinnagu nakorsap innersuussutaa akuerisussaavaa. Susoqarnissaa paasinngikkuniuk annilaanganeq, toqqissisimannginneq aamma sioorassuteqarneq atugarilersinnaavai, oqarpoq.

Aamma Peqqissaasut Kattuffiani siulittaasup Ken Jensenip oqaatsit aporfiulersinnaanerat ilimagisinnaanerarpaa.

- Sullitarlu paaseqatigiinnissaq pingaartorujussuuvoq. Maannakkumut allaat danskisut kalaallisullu oqaatsit ajornartorsiutaasarnerat malugisaqaarput, ilaanni ilungersunartumik, oqarpoq.

Isumaqatigiissut nutarsaqqikkumaartoq

Peqqinnissamut Naalakkersiosoq, Mimi Karlsen (IA), isumaqatigiissutip nutaap atsioqatigiissutaaneranik nuannaarutiginnippoq, peqqinnissaqarfik, sulisussaaleqiffioqisoq, ajornannginnerusumik atorfinnik inuttaliisinnaanngussammat. Peqatigitillugu ilisimatitsissutigaa nutserisoqarsinnaaneq qulakkeerneqarniarlugu isumaqatigiissut nutarsarneqassasoq.

-Danskisuumiit kalaallisut oqaatsitsinnut nutserisinnasunik sulisoqartuaannarnikuugatta, ajornartorsiut nutaajunngilaq. Isumaqatigiissulli nutarterneqassappat tuluttut oqaasillit atorfinissappata tuluttuumiit kalaallit oqaasiinut nutserisinnaasoqartariaqassaagut, oqarpoq.

Nunatta Nakorsaanerata Henrik L. Hansenip qulakkeerlugu oqaatigisinnaanerarpaa, isumaqatigiissummi nutaami nutserisoq pinngitsoorani atorfinitsitsinermi qulakkeerneqarersimassasoq.

- Peqqinnissaqarfimmi sulisut nakorsiamik attaveqassatillugit, oqaatsit oqaatigineqartut illuatungeriinnit paasineqarnissaat piumasaqaatitaqarpoq. Suliassat annerit ilagilissavaat, oqaatsinik ilinniarluarsimasoqarnissaanik qulakkeeninnissaq, oqarpoq.

Nunanit allameersunik suleqatissarsiorsinnaanermik isumaqatigiissut pingasunngornermi atsioqatigiissutigineqarput ukunannga: Isumaginninnerrmut, Suliffeqarnermut Nunamullu Namminermut  Naalakkersuisoq, Jess Svane (S), aamma Danmarkimi Nunanut Allanut aamma Nunat Allamiunut Akuutitsinermut Ministeri, Kaare Dybvad Bek (A) Assi © : KNR / Ann-Sophie Greve Møller

Nutserisoqarneq pitsanngorsarneqassasoq

Nutserisoqarnerup pitsanngorsaaviginera oqaatsit aporfiusinnaanerannik pinngitsoortitsinnaasoq, Peqqissaasut Kattuffianneersoq Ken Jensen oqarpoq.

- Suliassat ilagissavaat, nutserisut ikittunnguit, pikkorissut, peqqinnissaqarnermi oqaatsinik atorneqartartunik ilisimasallit katersuutsinnissaat. Immaqalu kukkuneqanngitsumik nutserisinnaanissaat qulakkeerniarlugu pikkorissarteqqinnissaat, oqarpoq.

Ernisussiortut Kattuffianneersoq Charlotte Bøgelund aamma nutserisut pikkorinnerulernissaannik anguniaqarnissamut isumaqataavoq, peqqinnissaqarfiup nunanit allaneersunik atorfinitsitsiniarnera iluatsissappat pisariaqartoq unnerlugu. Peqqinnissaqarfimmi sulisuussagaanni sakkussat pitsaanerit pigereertariaqartut oqaatigai.

-Imaassinnaavoq peqqinnissaqarfimmi ordbogimik tuluttuumik nutaamik - timip pisataanik  nappaatillu suunerannik allattorsimaffimmik - nutserisunut atugassamik sanasariaqartugut, taamaalioraannimi danskisut kalaallisullu oqaatsit ilanngullugit qupperiaannanngorlugit pigineqalissasammata.

Ilaanni inuup navialisinnaasarpoq, taamaammat sulisut nakorsiallu paaseqatigiissinnaannginnerat pissutigalugu nakorsiap atugaasa ajornerulernissaat pinngitsoortinneqartariaqarpoq.

- Imaassinnaavoq siusinaarluni ernisuttoqalersoq, naartunermi toqunartoqalersoortoqartoq imaluunniit naartusut ilaat aaqalersoortoq. Peqqiilliornerit ulloq unnuarlu pisinnaapput, nakorsiarnermilu nutserisoq tamatigut pisariaqartinneqarneq ajorpoq,aamma nalinginnaasumik nakorsiartitsinerup avataani, oqarpoq.

Charlotte Bøgelund aamma Ken Jensen isumaqarput, tamanit pitsaanerpaassasoq sulisussarsiorneq nunani avannarlerni skandinaviamilu pippat. Naak isumaqatigiissummi nunarsuaq tamarmi pineqaraluartoq.