Kattuffiit: Peqqinnissaqarfimmi sulisussaaleqineq ajornartorsiutaajuassaaq

- Peqqinnissaqarfimmi sulisussaaleqineq ilungersunartorujussuarmiippoq.

Peqqinnissamut Naalakkersuisoq, Mimi Karlsen, qanittumi taama oqarpoq.

Oqaatigisaa ima tusarluarnanngitsumik siunersereernermi takkuppoq: Naak sulisussarsiorneq annertusarneqareeraluartoq aasap ingerlanerani Peqqinnissaqarfiup suliaqassusia attatiinnarniarlugu naammattunik sulilersitsisoqarsinnaasimanngilaq. Tamannalu inuiaqatigiinnut akisussaaq. Tamannami ima isumaqarpoq arnat ernisussat Nuuliartariaqartarsinnaassasut napparsimasullu Danmarkiliaanneqartariaqartut amerlipilooriaannaassallutik.

Ullumikkulli pissutsit Mimi Karlsennip eqqartugaatut ilungersunartuusut nalinginnaasuminngaanniit ajornerujussuunngillat.

- Sulerulunneq peqqutigalugu saaffiginnissutit amerlanerulernikuunngillat, Peqqissaasut Kattuffianni siulittaasoq Ken Jensen oqarpoq.

Peqqisaasut Kattuffiat peqqissaasunit, sulisusaaleqineq pequtigalugu sulineq ilungersornarneralugu, aamma pissutsit maannatut ilinngikkallarmatali allattunit saaffigineqartartoq, taanna oqaluttuarpoq.

Ken Jensenip oqarnera naapertorlugu peqqinnissaqarfimmi aasaanerani sulisussaaleqineq atuutuartussanngortoq, Peqqissutsimut Aqutsisoqarfiup oqaatigisimavaa. Siorna ukiullu marluk matuma siorna aamma pissutsit taama ipput.

- Siulittuut immini piviusunngortittuuvoq, taanna oqarpoq.

Atorfissaqartitsinerujussuaq

Nakorsat Kattuffianni siulittaasoq, Hans Christian Florian Sørensen, isumaqataavoq.

- Atorfiit affaaluunniit aalajangersimasumik atorfilinnik peqqissaasunik nakorsanillu inuttaqanngillat, taamaattumik maanna aasaanerani ilungersunarneruvoq, Nakorsat Kattuffianni siulittaasoq oqarpoq ilanngullugulu oqaatigaa maannakkut ullut takinerummata peqqinnissaqarfimmi sulisussarsinissaq ajornannginnerusariaqaraluartoq.

Tamassumalu iluatsissimannginneranut Hans Christian Florian Sørensenip oqarnera naapertorlugu nunani allani aamma sulisussaaleqineq pissutaaqataavoq. Tamassumunnga Norge assersuutitsialaavoq. NRK-p allaaserisaa naapertorlugu, Norgemi ukiumut koruunit millionit hunnorujulikkaat arlallit taartaasunut atorneqartarput. Atukkat akissarsiallu pitsaanerusut danskit peqqissaasuisa Norgeliarnissamut pilerisaatigisaraat, Danmarks Radiop ilaatigut qulaajarsimavaa.

Tamanna Danmarkimut nunatsinnullu unammillissallugu ajornakusoorpoq.

2022-mi sulisussaaleqinerujussuup taartaasunut aningaasartuutit 40 millionit koruunit nalinginut annertussuseqalersippai- aningaasartuutit ukiut sisamat ingerlanerini aatsaat taama qaffatsigalutik. Peqqinnissaq pillugu Ataatsimiititaliarsuup 2023-mi isumaliutissiissutaani kisitsisit tamanna ersersippaat.

Nakorsat peqqissaasullu assersuutigalugu ulluni qulingiluani nunatsinni taartaasartut immikkoortortaqarfiit amerlanerpaartaasa iluaqutigineq ajoraat, siulittaasut marluullutik isumaqarput. Aningaasat atorluarneruneqarsinnaagaluarput.

Peqqissaasut Kattuffiat aaqqiissutissatut peqqissaasut akunnerni amerlaneruni sulisut tapisiagissaartinneqarnissaannik siunnersuuteqarnikuugaluarput, Ken Jensenilli oqarnera naapertorlugu tamanna Namminersorlutik Oqartussaninngaanniit soqutigineqarsimanngilaq:

- Akissarsiat qaffanneqarnerusinnaalaaraluartut soorunami isumaqarpugut, tamannali tusaaniarneqarsimanngilaq. Aqutsisut peqqissaasut kissaataannik neqerooruteqarsinnaannginnerisa kinguneri maanna takugunarpavut. Ullumikkut taama isikkoqartillugu sulerusunngillat. Kiffaanngissuseqarnissaq toqqartarpaat qavatigullu suliartoqqusisut sianeraluaraangata akineq ajorput.

Peqqissaasut sivisunerusmik sulisassagunik qanoq aningaasarsiaqarnerulertariaqarnersut isumqatigiinniutissaammat, Ken Jensenip oqatigiumanngilaa. Kisianni: 

- Malunnartumik amerlasariaqarput.  

Ilungersunarsiartorpoq

Tamanna iluaqutaasinnaagaluarpoq ajornartorsiummulli aaqqiissutaassanngitsoq, Ken Jensen isumaqarpoq.

- Peqqinnissaqarfiup iluani tunngaviusumik allannguinissaq pisariaqarpoq, taanna oqarpoq ullumikkullu pissutsit ilungersunartorujussuunerat erseqqissarlugu.

Nakorsallu Kattuffianni siulittaasoq isumaqataavoq.

- Ilungersunarsiaertortoq ajoraluartumik oqaatigisariaqarpara, Hans Christian Florian Sørensen, nunatsinni ukiuni qulikkaani arlalinni nakorsaasimasoq taama oqarpoq.

Peqqinnissaqarfimmut suna aaqqiissutaasinnaanersoq taassuma akissutissaqartinngilaa.

Mimi Karlsenip oqarnera naapertorlugu Naalakkersuisut aaqqiissutissarsiorput.