Peqqinnissaqarfik ilungersorfiusorujussuusoq naalakkersuisoq oqarpoq

Peqqinnissaqarfik sulisussaaleqiffiuvoq. Ajornartorsiutaangaarmat, arnat Nuummut erniartortariaqarsinnaapput, napparsimasullu Danmarkimut nuunneqarnerusariaqartassallutik.

Naatsumik oqaatigalugu, peqqinnissaqarfik sulisussaaleqigami aasaanerani naammassisakinnerussaaq.

Peqqissutsimut naalakkersuisoqarfik ippassaq taama nalunaaruteqarpoq.

Tamannalu ilungersunartupilussuusoq, peqqissutsimut naalakkersuisoq, Mimi Karlsen (Inuit Ataqatigiit), oqarpoq.

- Peqqinnissaqarfimmi sulisussaaleqineq ilungersunartorujussuarmiippoq. Inuttassaaleqineq illoqarfinni assigiinngitsuni malunnaateqarpoq. Imaluunniit ima taallugu, nunarput tamaat tassuuna eqqorneqarpoq, Mimi Karlsen KNR-imut oqarpoq.

1-imit 10-mut qanoq ilungersunartiginersoq kisitsisilerusunngilaa.

Peqqissaasut nakorsallu qasseqqissaat amigaataanersut pillugu Nakorsaaneqarfimmut innersuussivoq.

 - Danmarkiminngaanniinerusoq sulisussarsiortarpugut, kisianni aamma Danmarkimi nakorsassaaleqillutik ajornartorsiorput, aammalu peqqissaasunik amigaateqarlutik. Taamaammat ajornartorsiot taanna nunani avannarlerni atuummat, soorunami aamma uagutsinnut kalummaappoq, Mimi Karlsen oqarpoq.

Soraartut nutaanik atorfinitsitsiniarneq ajornakusoortoq

Peqqinnissaq pillugu Ataatsimiititaliarsuup nunatsinni peqqinnissaqarfimmi pissutsit pillugit isumaliutissiissutini maajimi tunniuppaa.Peqqinnissaqarfippullu ingerlalluarpallaanngitsoq inerniliuppaa.

Sulisussarsiorneq sulisullu sulisoriinnarnissaat ajornakusoorput. Nutaanik atorfinitsitsiniarneq ajornakusoorpoq, sulisorpassuillu soraarput.

1.600-t missaanniittut peqqinnissaqarfimmi maajimi sulippput, taakkunanilu 900-t atorfiliupput. Nutaanik 1.500-t missaanniittunik ukiumut atorfinitsitsisoqartarpoq.

Ingammik peqqissaasut akornanni nikerartoqaqaaq. Peqqissaasusutut ilinniagalinni kalaallisut oqaaseqartut 53 procentiisa missaat peqqissaasutut sulinatik allamik atorfeqarput.

Aamma oqaatsit ajornartorsiutaapput. Nunatsinni nakorsiartarfinni nakorsat qallunaatuinnaq oqaluttuugajupput. Oqaatsitigut ajornartorsiutit nakorsiap peqqinnissaqarfimmilu sulisut akornanni attaveqaqatigiinnermut sunniuteqarnerluttartut misissuinerup takutippaa.

Peqqinnissamut nappaatinullu atatillugu kalaallisut taaguutit amigaataasut misissuinerup aamma ersersippaa, tamannalu pissutigalugu nakorsiat kalaallisut oqaaseqartut eqqugaaqqajaanerullutillu oqalutsinik ilinniarsimasunik pisariaqartitsisarput.

Danskit nakorsat amerlanerusut nunatsinnut nuutsinneqartarnissaat sulissutaasoq

Mimi Karlsenillu oqarnera naapertorlugu, Naalakkersuisut aaqqiissutissarsiorput. Danskit peqqinnissaqarfianni nakorsat nunatsinnut piffissap ilaani suliartortarnissaat pillugu danskit peqqissutsimut ministeriat, Sophie Løhde (V), oqaloqatigisimallugu paasissutissiisutigaa.

- Kingullermik oqaloqatigigakku paasivara, suliaq tigugaat, taamaalilluni aamma taanna eqqarsaatigalugu suliaqartut.

Aamma Naalakkersuisut Naalagaaffiit Peqatigiit peqqissuunissaq pillugu suleqatigiiffiannik suleqatigiinnerunissamik isumaqateqaqqammersut innersuussutigaa. Tamanna Peqqinnissaq pillugu Ataatsimiititaliarsuup inassutaasa piviusunngortinnissaannut iluaqutaassassoq, Naalakkersuisut allapput.

Tamakkuli aatsaat kingusinnerusukkut iluaqutaasinnaapput. Peqqinnissaqarfik maanna naammassisakinnerugallarpoq.

Taamaammat nunatsinniittut namminneq peqqissuunissaminnut akisussaanerunissaat, Mimi Karlsenip kammattuutigaa.

- Innuttaasut nalunngittariaqarpaat, napparsimaveqarfitsinni pissutsit atuunneranni, sulisussaaleqinitsinni, immitsinnut paarinissarput ingalluni pingaaruteqarpoq.

Peqqinnissaqarfik aningaasanut inatsimmi aningaasartuutaaffiunerpaavoq. 1,7 milliardit koruunit peqqinnissaqarfimmut ukioq mannaannaq aningaasartuutaapput.