Peqqinnissaqarfik ilungersuaffiusoq: Ernisussat Nuuliarsinnaasut uninngasullu Danmarkiliaanneqarsinnaasut

Peqqinnissaqarfik sulisussaaleqivoq. Imami sulisussaaleqitigaaq, allaat ernisussat Nuuliartariaqarsinnaassallutik napparsimasullu Danmarkiliaanneqartariaqartut amerlipilooriaannaassallutik. 

Peqqissutsimut Naalakkersuisoqarfik tusagassiorfinnut taama nalunaarpoq. 

Peqqinnissarfiup sulisussaaleqinera tusarnartaanngilaq. Aasaaneranili sulisussarsiorneq ingammik ajornakusoortoq, naalakkersuisoqarfik nalunaarummini allappoq. 

- Peqqinnissaqarfimmi sulisussarsiornerup pitsanngorsarnissaa anguniarlugu sulisussarsiornermi suliniutit annertusarneqarput kiisalu taartaasussarsiortarfinniit peqqinnissakkut sulisussarsiortoqarpoq, naalakkersuisoqarfik nalunaarummini aamma allappoq.

- Naak sulisussarsiorneq annertusarneqareeraluartoq aasap ingerlanerani Peqqinnissaqarfiup suliaqassusia attatiinnarniarlugu naammattunik sulilersitsisoqarsinnaasimanngilaq.

Erniartorneq, nuunneqarneq utaqqinerlu 

Tassalu Peqqinnissaqarfik ima sulisussaaleqitigaaq, allaat nakorsiat, uninngasut ernisussallu nunap immikkoortuani napparsimmavimmi, najukkaminnut qaninnermi, passunneqarsinnaanatik. 

Taamaammat Naalakkersuisoqarfik makkuninnga iliuuseqarpoq:

• Nunap immikkoortuani napparsimmavinni illersorneqarsinnaasumik erninissamut upalungaarsimasoqarnissamut pisarialinnik sulisoqanngippat avannaani kujataanilu naartusut Dronning Ingridip Napparsimmavissuani erniartornissaat pisariaqarsinnaasassaaq. Tamanna minnerpaamik Ilulissani nunap immikkoortuani napparsimmavimmut aamma Qaqortumi nunap immikkoortuani napparsimmavimmut atuunnissaa naatsorsuutigineqarpoq.
• Peqqissaavinni, nunap immikkoortuisa napparsimmaviini aamma Dronning Ingridip Napparsimmavissuani nakorsanik peqqissaasunillu sulisussaaleqinermi sulisoqannginnermiluunniiit, uninngasut Danmarkiliaanneqartarsinnaasassapput.
• Nunaqarfinni nakorsiartitsinerit kinguartinneqarsinnaasassapput taamaatinneqarsinnaasassallutilluunniit.
• Nalunaaqutaq 16.00-p kingorna saaffiginnittut najukkami peqqinnissaqarfimmuunngitsoq nunalli immikkoortuani napparsimaveqarfimmut qaninnerpaamut saaffiginneqquneqarsinnaasassapput.
• Nuummi Dronning Ingridip Peqqissaavia aamma sulisussaaleqivoq. Taamammat nakorsamut oqarasuaammut sianertut ullup ingerlanerani uterfigineqanngeriaannaasassapput. 

Peqqinnissaqarfik aasaarnerani nalimmassaanerit pillugit ilisimatitsisarumaartoq, Peqqissutsimut Naalakkersuisoqarfik nalunaarpoq.