Isumaqatigiissut nutaaq: Nunatsinni nakorsassarsiortarneq ajornannginnerulissaaq

Nunami allamiut nunatsinni napparsimaveqarfimmi sulerusuttut pitsaassusaannik nakorsaaneqarfik qularnaarinnittartutut inississaaq.

Allattoq Karline Platou, Ann-Sophie Greve Møller

septembarip 06-at 2023 16:01

Isumaginninnermut, Suliffeqarnermut, Nunamullu Namminermut Naalakkersuisup Jess Svanep (S), aammalu danskit integrationsministeriata Kaare Dybvad Bekip (Socialdemokratiet), napparsimaveqarfimmi nunami allamiunik nunatsinni sulisitsinissamut isumaqatigiissut iluarsaataq ullumi atsiorpaat.

Atsioqatigiinneq fast trackimik taasamik 2021-milu atuutilersinneqartumeersoq atorlugu atsioqatigiinneruvoq nutaamik eqqarsarluni nunani allamiunik peqqinnissaqarfimmi sulisussanik tikisitsinissamut pisariillisaasussaasoq.

Fast-track atorlugu isumaqatigeeriaaseq, nunamilu allameersunik tikisitsilluni sulisussarsiornermut piuminarsaataasoq, qinnuteqareeraannilu Namminersorlutik Oqartussat akinissaanik utaqqeqqaarneqartartoq 2021-mi atuutilersinneqarpoq.

Aamma atuarukAllamiut peqqinnissamik suliallit nunatsinni atorfinilertorsinnaalertut

Isumaqatigiissummilu matumani iluarsaateqqitami ullumi atsiorneqartoq tassaavoq, nakorsat peqqissaasullu nunami allamiut nunatsinni sulerusuttut danskit piginnaatitsisussaatinngikkaluarlugit aamma sulilersinnaanerannik isumaqartoq.

- Atsiornerput nuannaarutigisorujussuuara aamma nunatsinni nunanit allamiunit akuutitsinerunerlu pillugit uagut annerujussuarmik oqartussaaffiginissaa kissaatigiuaannarnikuuarput., Jess Svane oqarpoq.

Nunatsinni peqqinnissaqarfimmi nunami allamiut suliumallutik qinnuteqartut pitsaassusaannik nakorsaaneqarfik qulakkeerinnittassaaq.

- Pilersaarutigaarput, nunani avannarlerni najoqqutassiat assingi atorniarlutigit, tassa imaappoq, tikittut tunngaviusumik ilinniarteqqaarneqartassapput soorlu aamma nunani tamalaani akuerisamik nunani avannarlerni aamma taamaattartut

- Nunani tamalaani suliffeqarfeqartarpoq peqqinnissaqarfimmi Sulisut pappiaraataannik misissueqqissaartartunik, tassa ilumut allagartaat tutsuiginarnersut qulakkeerneqartarlutik, aammalu inuit tamakku ilinniagaasai imai qanorpiaq innersut qulakkeerneqartarluni, taannalu aallaqqaammut periuserissavarput, Henrik L. Hansen oqarpoq.

Fast-track atorlugu isumaqatigiissummi akissutigineqarpoq, maani nunatsinni peqqinnissaqarfiit sulisussanik amigaateqartut.

FAST TRACK SUNAAVA?

- Naalakkersuisut aamma Danmarkimi oqartussat sulisartunik nunanit allaneersunik inuttassarsiornermut fast-trackimik isumaqatigiissummik februaarip 11-ani 2021 atsioqatigiipput, uani peqqinnissamik suliaqarnissamut ilinniarsimasut sukkanerusumik atorfinitsittarnissaat pineqarpoq.

- Isumaqatigiissummi tassani allassimavoq, kinaluunniit qinnuteqartoq – Namminersorlutik Oqartussat qinnuteqaatertik pillugu tusarniaanerata akissuteqarfiginissaa -utaqqeqqaarnagu – Kalaallit Nununaannut suliartorsinnaasoq.

- Jess Svane aamma Kaare Dybvad Bek fast-traskimik isumaqatigiissut nutartigaq septembarip arfernanni 2023-mi atsioqatigiissutigaat, tassani allassimalluni, kikkulluunniit peqqinnissamik suliaqarnissamut ilinniarsimasut, Kalaallit Nunaanni sulisinnaanermut najugaqarsinnaanermullu qinnuteqarsinnaasut – Kalaallit Nunaata peqqinnissaqarfiani sulisinnaaneq Danmarkimit piginnaatitaaffimmik tunineqarsimanngikkaluarpalluunniit.

- Sulisartunik nunanit allaneersunik inuttassarsiorsinnaanermik isumaqatigiissut piffissani suliffissaaleqisut ikittuinnaaffianni pisariaqartinneqarpat atuuttassaaq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.