Allamiut peqqinnissamik suliallit nunatsinni atorfinilertorsinnaalertut
Naqqiut: 'Fast track'-imik taallugu isumaqatigiissut Danmarkimi peqqinnissamik sulialinnut atuuttoq allaatigisami uani allaqqagaluarpoq. Isumaqatigiissut taanna nunani allani naalagaaffeqatigiit avataanniittuni peqqinnissamik sulialinnuinnaq, Danmarkimili peqqinnissaqarfimmi sulisinnaanermut allagartalinnuinnaq, atuuppoq. Tamanna allaatigisami uani naqqippoq.
Nunatsinni napparsimmaviit, peqqissaaviit nakorsiartarfiillu nunat allat peqqinnissaqarfianeersunik ilinniarsimasunik pisariaqartitsiuaannarput.
Isumaqatigiissutitaaq nunani allani naalagaaffeqatigiit avataaniittuni peqqissaasunik, nakorsanik, kigutit nakorsaannik peqqinnissamillu sulialinnik allanik nunatsinni atorfinitsitsilertorsinnaalernermik qulakkeerisuuvoq.
Tassa imaappoq, fast trackimik taallugu isumaqatigiissutitaaq nunani allani peqqinnissamik suliallit nunatsinni atorfinissinnaanngornerannik qulakkeerisuuvoq, taakku qinnuteqaataat Naalakkersuisoqarfimmi tusarniaatigineqaqqaanngikkaluarlutik.
AAMMA ATUARUK Nunatsinnut angalasoqarnissaanut killilersuinerit apriilip 18-ianut sivitsorneqartut
Danmarkimiilli qinnuteqartup peqqinnissaqarfimmi sulisinnaanermut atuuttumik allagartaqarnissaa Kalaallit Nunaannilu akissaatit sulinermilu atukkat pillugit isumaqatigiissut nalinginnaasut naapertorlugit atorfininnissaa piumasaqaataapput.
- Taamaattumik isumaqatigiissut taanna atorlugu Kalaallit Nunaanni peqqinnissaqarfinnut inunnik peqqinnissaqarfimmi suliaqartunik piaarnerusutut inuttassarsiortarnissaq Naalakkersuisut naatsorsuutigaat, Suliffeqarnermut, Avatangiisinut Ilisimatusarnermullu Naalakkersuisoq Jess Svane (S) tusagassiuutinut nalunaarpoq.
Nunanit allaneersunik Kalaallit Nunaanni atorfinitsitsisarneq Danmarkimit suli akisussaaffigineqarmat, Naaalakkersuisut aamma nunami allamiunut akuulersitsinissamullu ministereqarfik isumaqatigiissuteqartuupput.
Isumaqatigiissutitaaq taanna 2021-mi februaarip ulluisa aqqarnganni atuutilerpoq.
Danskit naalagaaffiallu allamik inuussutissarsiutilinnik nunanit allaneersunik Kalaallit Nunaanni atorfinitsitsisalernissaq pillugu suli isumaqatigiinniartoqaleruttortoq, Jess Svane ilisimatitsivoq.