Nunatsinnut angalasoqarnissaanut killilersuinerit apriilip 18-ianut sivitsorneqartut
Killilersuinerit sukannersut atuutiinnassapput.
Killilersuinerit februaarip naanissaata tungaanut atuukkaluartut apriilip ulluisa 18-iata tungaanut sivitsorneqarput.
Tassa imaappoq oqartussanit akuerineqarsimasut kisimik nunatsinnut apriilip ulluisa 18-iata tungaanut angalasinnaapput. Tassa inuit corona pillugu allattoqarfimmit akuerineqarsimasut kisimik nunatsinnut isersinnaapput.
Tassa nunatsinnukarnissamut billetsimik Air Greenlandikkut pisisoqarsinnaanngilaq - pisinissaq corona pillugu allattoqarfimmit akuerineqaqqaassaq.
Tuluit Nunaanni allanngortoq kommunillu killeqarfii
Naalakkersuisut oqarnerat naapertorlugu – tamatumani pissutaasut marluupput: Nunatsinni kommunit akornanni angalasoqarnissaanut killilersuinerit qasukkarneqarput.
Aamma Tuluit Nunaannit coronap allanngortup Danmarkimi tunillaassuunnerulernera pissutaavoq. Naalakkersuisut corona allanngortoq taanna nunatsinnut eqqunneqarnissaa kissaatiginngilluinnaraat, siulittaasoq, Kim Kielsen (S) oqarpoq.
AAMMA ATUARUK MT Højgaard coronamut atatillugu akiligassiinerit pillugit: Taamaattoqarnikuunngilaq taamaattoqaqqissagunanngilarlu
Kommunimit kommunimut allamut angalalluni aaqqissuussinernut nalunaaqqaarluni peqataaffigineqarneqartussanut peqataajartornissaq maannamut inerteqqutaasimagaluarpoq.
Kommuninut allanut angalalluni aaqqissuussinernut peqataanissamut qasukkaanerit aqagumit apriilip ulluisa 18-iata tungaanut atuutissapput.
Tamatuma pisinnaanissaanut tallimanik piumasaqaateqarpoq:
Aaqqissuussinerit illoqarfinni ukunani kisimi pisinnaapput:
- Ilulissat, Aasiaat, Qasiannguit, Qeqertarsuaq, Kangerlussuaq, Maniitsoq, Sisimiut, Nuuk, Paamiut, Narsaq, Narsarsuaq aamma Qaqortoq.
- Aaqqissuussisoqarnissaanut ullut 30-t sioqqullugit illoqarfimmi aaqqissuussiffiusussami tunillatsissimasumik uppernarsaasoqarsimassanngilaq.
- Aaqqissuussineq 50-init amerlanerusunit peqataaffiussappat tamanna Nakorsaaneqarfimmit akuerineqaqqaassaaq. Isiginnaartussat naatsorsorneqartunut ilaassapput.
- Tamatuma saniatigut aaqqissuussisoqarnissaanut ullut 14-it kingulliit iluanni tikittut peqataqqusaanngillat. Inuit ullut 14-it kingulliit iluanni tikittumut qanillisimasut aamma peqataaqqusaanngillat.
- Illoqarfimmi aaqqissuuffiusumi tunillatsissimasumik naammattuuisoqarpat aaqqissuussinermut peqataasut namminneq kommunerisaminnut aallartinnatik coronamik tunillatsissimannginnermut uppernarsarneqaqqaassapput.
- Aap, piumasaqaatit sukannerput, nakkutigineqarsinnaanngitsumilli tunillaassuuttoqalinnginnissaanut tamanna pisariaqarpoq, peqqissutsimut naalakkersuisoq, Martha Abelsen (S) oqarpoq.
Naalakkersuisut nunatsinnut angallanneq decembarip ulluisa 30-anni matuaat. Matusinerlu taanna maanna apriilip ulluisa 18-iata tungaanut atuuttussanngorlugu sivitsorneqarpoq.
Kommunimut apriilip ulluisa arfernanni qinersisoqartussaavoq - tamanna aalajangiusimaneqarpoq.
inatsisartunullu qinersisoqarnissaa ulluini kingullerni qulini aamma qanillattungaatsiarneqarpoq.
Tusagassiortunilli katersortitsinermi taakku marluk tunngavilersuutitut atorneqanngillat.
Nunatsinni maannakkut coronamik tunillatsissimasumik uppernarsaasoqaqqanngilaq. Tunillatsissimasut katillugit 30-usimapput taakkulu tamarmik peqqisseqqinnikuupput.
- Malittarisassat tamarmik malinneqarnissaat innersuussutigaarput - tunillatsissimasumik nunatsinnut tikittoqaqqinnissaa ilimagereertariaqarparput. Tuluit Nunaannit allanngortoq peqqinnissaqarfinnut kingunerluutaangaatsiarluni sukkasuumik siaruaappoq, nakorsaaneq, Henrik L. Hansen oqarpoq.
Tuluit Nunaanni Afrikallu kujataani allanngortut
Danmarkimi Statens Serum Institutip coronavirusimik tunillatsissimasut nutaat 437-t ataasinngornermi uppernarsarpai.
Tunillatsissimasuni taakkunani Tuluit Nunaanni coronavirusimik allanngortumik, B117-imik tunillatsissimasut amerlapput.
Coronavirusip allanngortup saniatigut Afrikap kujataani allanngortumik Danmarkimi aamma uppernarsaasoqarnikuuvoq.
Coronavirus taanna B1351-itut ilisimaneqartoq tunillatsissimasut arfineq-pingasut akornanni nassaarineqarpoq.
