MT Højgaard coronamut atatillugu akiligassiinerit pillugit: Taamaattoqarnikuunngilaq taamaattoqaqqissagunanngilarlu
Inuusuttut sanasut sisamat 20-t 24-llu akornanni ukioqartut juullikkunni angerlamut angalareerlutik suliffimminnut MT Højgaardimut Nuummut februaarip aallartinnerani uteramik corona pillugu malittarisassanik malinnissimanngitsutut unnerluutigineqarput.
Taakku tamarmik 6.000 koruuninik akiligassinneqarput - sulisitsisuminnillu MT Højgaardimit soraarsinneqarlutik.
Angerlarsimaannarnissamut malittarisassat
- Nunatsinnut tikikkuit ulluni tallimani angerlarsimaannassaatit.
- Ullut tallimassaanni misissorteqqissaatit.
- Angerlarsimaannarnerup nalaani pisuttuarsinnaavutit, najugaqatigisatit attavigisinnaavatit aamma ulluinnarni atortussanik pisiniarsinnaatitaallutit.
- Pisiniarnissannulli anersaartuutinut illersuummi kiinnamulluunniit assersuummik atugaqassaatit.
- Allanut pulaassanngilatit, pulaartoqassanngilatit, aaqqissuussinernut peqataassanngilatit, bussissanngilatit, taxassanngilatit suliartussanallu.
- Ullut tallimassaanni misissorteqqinnianngikkuit tikinninniit ullut 14-it angerlarsimaannassaatit.
- Ilungersunarluinnartutut tiguarput. Taakku sisamat iliuuserisimasaat pakatsissutigaarput. Nuanniilliutigaarpullu, tikisitagummi sanasuupput pikkorissut, MT Højgaardip nunatsinni immikkoortortami pisortaa, Kim Ulrik Hansen oqarpoq.
AAMMA ATUARUK Soraarsitsineq akiligassiinerlu: Inuit sisamat coronamut atatillugu unioqqutitsisimasutut unnerluutigineqartut
Taakkunannga sisamanit coronamik tunillatsissimasoqanngilaq. Ullorli taanna tikikkamik ulluinnarni niuertarfimmut pisiniarnerminni qanermut assiaquteqanngillat
Pisumilu allami nukkassartarfimmut Fitness GL-imiittoqarsimalluni.
- Sanasut inuusuttut sisamat juullinnginneranni aamma maaniipput. Taakku juullip ukiortaallu akornanni angerlariarlutik suliffimminnut uteqqittussaapput, sulisorinerat nuannarilluinnarpagut. Suleqatigeqqinnissaannut qilanaaraluarpugut, taamaattoqarsinnaanngilarli, Kim Ulrik Hansen oqarpoq.
Ilisarineqartut politiinullu unnerluutigineqartut
Taakku sisamat ilisarineqarsimanerisa kingunerisaanik suliaq Kalaallit Nunaanni Politiinut anngunneqarpoq.
Illoqarfimmi suliffeqarfiit misissueqqissaartoqarneranut ikiuullutik angutit sisamat malittarisassanik malinnginnerannik takutitsisumik videoliutikkut immiussamik politiinut tunniussipput.
- Meeqqanut kinguaassiutitigut atornerluinerit pisullu uku piffissami matumani kisimik pingaarnerutinneqartarput. Inuiaqatigiinni tuniluuttoqarsinnaaneranut aarlerinartumik unitsisoqarnera pingaartuuvoq. Taamaammat suliani taakkunani sukkasoorujussuarmik iliuuseqartarpugut, politimesteri Bjørn Tegner Bay KNR-imut oqarpoq.
Politiit nunarput tamakkerlugu coronamut attuumassuteqartunik katillugit 30-nit 40-nut amerlassuseqartunik suliaqarput
Taakku pisiniarfinnit qanillisoqannginnissaanut piumasaqaatinik malinninngitsunit inunnut angerlarsimaannarnissaminnik malinninngitsunut tunngapput, soorlu uani sanasut sisamat unioqqutitsisut.
AAMMA ATUARUK 16.000 koruuninik akiligassinneqartoq: 18-inik ukiulik coronamut malittarisassanik malinnissimanngitsoq
- Sulisunik amerlasuunik tikisitsisarpugut, Corona pillugu aqutsisoqarfimmi misissuisartut suleqatigilluarpagut. Taakku uagutsinnut tatiginnipput, tamannalu eqquutsissinnaallugu takutittariaqarparput, MT Højgaardimit Kim Ulrik Hansen oqarpoq.
Taakku sisamat malittarisassanik malinninnginnerannut akisussaaffeqarpisi?
- Siornatigut ajornartorsiutiginikuunngilarput, taamaattoqaqqinnissaalu neriuutiginngilarput. Sulisuttali corona pillugu malittarisassanik eqqaamanninnissaanut nassuiaanerusalissaagut.
- Aamma isumaqarpunga Immersugassaq Sumut misissortinnerlu qanoq atussaneraat pillugit nassuiaasartugut. Aamma Københavnip mittarfiani ullut tallimat qaangiunneranni misissortinnissaq pillugu ilisimatitsisoqartarpoq... Taamaammat paasinngitsoorneqarsinnaanngikkaluarpoq, Kim Ulrik Hansen oqarpoq.
