16.000 koruuninik akiligassinneqartoq: 18-inik ukiulik coronamut malittarisassanik malinnissimanngitsoq

Unnerluussisussaatitaaneq Morten Nielsen apersorneqarnerata kingorna nalunnaqutaq 19.10 nutarterneqarpoq .

Arnaq 18-inik ukiulik Danmarkimiit Nuummut tikinnermini angerlarsimaannaqqusinermi maleruagassat sisamariarluni unioqqutippai.

Innuttaasup ernumasup politiinut saaffiginninnerata kingorna politiit pisoq ilisimasaqarfigilerpaat.

Kalaallit Nunaanni politiini unnerluussisussaatitaaneq Morten Nielsen KNR-imut taama oqarpoq.

- Innuttaasumit ernumasumit saaffigineqarpugut. Kalaallit Nunaanni inuiaqatigiit mikisunnguupput, kikkullu Danmarkimiit tikinnersut ilisimaneqakkajuppoq, innuttaasullu ilaat katerissinnaanermut maluruagassat malinneqannginnerat mamiagineqarsimavoq, Morten Nielsen oqarpoq.

AAMMA ATUARUK Coronamut maleruaqqusanik unioqqutitsineq: Aasianni unioqqutitsisoq akiliisinneqassasoq

Saaffiginninnerup kingorna politiit suliaq misissulerpaat.

- Arnap tikerlaap inuit ilagisimasai oqaloqatigaavut, arnallu nammineq tallimanngornermi inunnik sisamanik-tallimanik, ullorlu alla inunnik marlunnik peqateqarsimanini nassuerutigaa, tamannalu Naalakkersuisunit maleruagassanik sinaakkuserneqartunit unioqqutitsineruvoq, Morten Nielsen oqarpoq.

Arnaq tamassuma saniatigut hashimik marloriarluni paarisaqarsimavoq, aanngajaarniutillu pillugit inatsisinik unioqqititsisimasutut unnerluunneqarpoq.

- Nuannisaqatigiinniarluni, ikiarooqatigiinniarlunilu naapittoqarsimavoq, ikiaroornartumillu tigummiaqaqqaarnani ikiaroortoqarsinnaanngimmat anngajaarniutit pillugit inatsisinik unioqqititsisimasutut aamma unnerluunneqarpoq, Morten Nielsen oqarpoq.

Arnaq sapaatip akunnerata naanerani unnerluutigineqarnermi kingorna 16.000 koruuninik akiligassinneqarpoq.

Kalaallit Nunaanni politiit tusagassiuutinut nalunaarummi taama allapput.

Arnaq covid 19-imik tunillatsissimanngitsutut uppernarsineqarnissani sioqqullugu katerisimaartunut peqataasarsimavoq. Tamassuma saniatigut hashimik marloriarluni paarisaqarsimavoq, aanngajaarniutillu pillugit inatsisinik unioqqititsisimasutut unnerluunneqarpoq.

Suliap eqqartuussivimmi suliassanngortinneqarnissaa maanna utaqqineqarpoq.

Aasiaani covid 19-imik tunillanneqarsimasoq, massaakkulli peqqisseqqissimasoq, 9000 koruuninik tikinnermini angerlarsimaannaqqusinermi maleruagassanik unioqqutitsisimanermini sapaatip akunnera kingulleq akiligassinneqarpoq.

Arnaq Nuummiittoq tikinnerminiit ullut tallimassaa qaangiuttut covid 19-imik misissorteqqippoq, tunillanneqarsimanngitsorlu uppernarsarneqarpoq.