Coronamut maleruaqqusanik unioqqutitsineq: Aasianni unioqqutitsisoq akiliisinneqassasoq
Aasianni najugallip Danmarkimiit nunatsinnukareernermini angerlasimaannaqqusaanermut maleruagassanik unioqqutitsinini akisuunaarpaa.
9.000 koruuninik akiliisinneqassasoq, Kalaallit Nunaanni Politiit tusagassiuutinut nalunaarput.
AAMMA ATUARUK Coronamik tunillatsissimasumik Aasianni uppernarsaasoqaqqittoq
Akiliisinneqartussaq coronavirusimik tunillanneqarsimasoq misissorteqqereernerani oktobarip ulluisa 21-anni paasineqarpoq, taassumalu maleruagassat pingasoriarluni tamannalu sioqqullugu unioqqutitsisimavai.
Akiliisinneqartussaq nunatsinnut nunatsinnilu angalanermut maleruagassani aalajangersakkanik unioqqutitsisimasoq, allatseqarfimmi pisortaq Line Mika Skov KNR-imut ilisimatitsivoq. Akiliisinneqartussaq coronavirusimut misissorteqqinnginnermini katersuuttuni aaqqissuussinermiluunniit peqataallunilu pisortat suliffeqarfiutaanniissimavoq.
Politimesterip Bjørn Tegner Bayip inuit oqartussat coronavirusi siaruatsaaliniarlugu killilersuinerannik pimoorussilluinnarnerannik nersualaarpai.
- Kalaallit Nunaanni Politiit covid-19-imik siaruatsaaleeqatigiissinnaasugut qularinngilaat. Akiligassiinerpulli tamatta illersugaanissatsinnut maleruagassanik unioqqutitsisoqartillugu qisuarianasuarnissatsinnut akiligassiinissatsinnullu upalungaarsimanitsinnik ersersitsivoq, politimesteri tusagassiuutinut nalunaarpoq.
Aalassatsitsisoq
Aasianni unioqqutitsisoq ulluni tallimani angerlarsimaannaqqusaanermini pulaartoqartarsimaneragaavoq, tamannalu aalassatsitsingaatsiarpoq:
Inuk tunillanneqarsimasumut qanillisimasoq aallartitallu aningaasarnermut ataatsimiititalimi ilaasortat ataatsimeeqatigiartorlugit Nuummukarsimammata, Inatsisartut aningaasaqarnermut ataatsimiititaliaani ilaasortat nalunartut pillugit angerlarsimaannaqquneqarput.
AAMMA ATUARUK Corona pillugu aqutsisoqarfik: Aasianni allanik killilersuisoqassanngilaq
Sisimiunilu KTI-mi atuartut ilaata Aasianni tunillanneqarsimasoq qanillisimammagu, tassani atuartut 80-it angerlartitaapput.
Tunillanneqarsimasoq peqqisseqqittutut nalunaarutigineqareerpoq.