Corona pillugu aqutsisoqarfik: Aasianni allanik killilersuisoqassanngilaq
Coronamik tunillatsissimasoq Aasianniittoq sapaatip-akunnerata siuliani paasineqarmat tamanna allanut sunniuteqarpoq: Tunillatsissimasummi angerlarsimaannartussaanermi allanik ilagisaqannginnissamut malittarisassat malissimanngilai.
Taamaammat Inatsisartuni aningaasaqarnermut ataatsimiititaliami ilaasortat Nuummi upalungaarsimanissaq pillugu angerlartinneqarput, Sisimiuni sanaartornermik ilinniarfimmi atuartut 80-it aamma angerlartinneqarput.
AAMMA ATUARUK Aasiannut sukannersumik suli ukkatarinninneq: 15-it tunillatsissimasinnaasut
Inuit 15-it tunillatsissimasumut qanillisimanertik pissutigalugu angerlarsimaannartussanngortinneqarput.
Kommune Qeqertalimmi borgmesterip, Ane Hansenip tunillatsissimasumut qanigisaasoq suleqatigigamiuk nalunartut pillugit aamma angerlarsimaannartussanngortinneqarpoq.
Naalakkersuisut nunatsinnut tikittut tikinnerminnit ullut tallimat qaangiunneranni misissorteqqittarnissaannut malittarisassat atuutilerseqqinnikuuaat.
Angerlarsimaannarninni pisuttuarsinnaavutit aamma najugaqatigisannut qanillisinnaavutit.
Niuerniarsinnaavutit.
Allanut pulaassanngilatit, pulaartoqassanngilatit, bussissanngilatit, taxassanngilatit suliartussanallu.
Nunatsinnut tikinnermi ullut tallimat qaangiunneranni misissorteqqissaatit. Misissortinnerup tunillatsissimannginneq uppernarsarpagu suliartoqqissinnaavutit nalinginnaasumillu inuunerit ingerlateqqissinnaallugu.
Misissorteqqinnianngikkuit ulluni 14-ini angerlarsimaannassaatit aatsaallu ersiuteqanngikkuit suliartoqqillutit.
Ilaqutariit angerlarsimaannartarnissaat
Tamanna pissutigalugu borgmesterip nunatsinnut tikittunut malittarisassat sukannersut ujartorpai:
- Danmarkimit tikittup angerlarsimaannarnissaani illoqutigiit sinnerini angerlarsimaannartoqarnissaanut piumasaqaateqartoqanngilaq. Taamaattoqartariaqarporli, Ane Hansen (IA) KNR-imut sapaatip-akunnerata siuliani oqarpoq.
Nalunaaruteqarnerli taanna Namminersorlutik Oqartussani corona pillugu aqutsisoqarfimmi taperserneqanngilaq. Corona pillugu aqutsisoqarfik corona pillugu Naalakkersuisunut siunnersuisarpoq. Aasiannullu nutaanik sukaterisoqassanngitsoq taakkunannga ersarissumik akissutigineqarpoq.
Corona pillugu aqutsisoqarfik pisoq pillugu KNR-imut ima allappoq:
”Aqussinnaanngisamik tuniluuttoqalissagaluarpat sukannernerusumik malittarisassiornissaq periarfissaavoq. Apeqqutaalluinnassaarli tuniluunnerup qanoq siammartiginera.”
AAMMA ATUARUK Tunillatsissimasumut Aasianniittumut ilaqutaasoq tunillatsissimanngitsoq
”Sumiiffimmi tuniluunneq aqutassaajunnaarpat, annertuumilluunniit tuniluuttoqalissagaluarpat, inoqarfinni ataasiakkaani sakkortuumik sukaterisoqarsinnaanissaa naatsorsuutigineqarsinnaavoq.”
Nunatsinni coronamik tunillatsissimasut katillugit 17-iusimapput. Taakkunannga ataasiinnaq suli tunillatsissimasutut nalunaarsorsimavoq – tunillatsissimasorlu Aasianniilluni.
Nunatsinni tunillatsissimasunit napparsimmavimmut uninngasoqarnikuunngilaq.