Tunillatsissimasumut Aasianniittumut ilaqutaasoq tunillatsissimanngitsoq

Coronamik tunillatsissimasup Aasianniittup Nuummut tunillaasimasinnaanerata ernumatiginera annikinnerulerpoq. Tunillatsissimasumummi ilaqutaasoq Nuummut angalalluni Inatsisartuni aningaasaqarnermut ataatsimiititaliami ataatsimeeqataasimasoq tunillatsissimanngitsoq uppernarsarneqarpoq.

Inatsisartuni aningaasaqarnermut ataatsimiititaliami ilaasortat angerlarsimaannaqquneqarunnarunnaarput. Tamanna Inatsisartuni ilaasortaq, Doris Jakobsen (S) Facebookimini akkappaa.

Tamannalu Inatsisartuni siulittaasup, Vivian Motzfeldtip (S) uppernarsarpaa.

- Nakorsaaneqarfiup Anignaasaqarnermut ataatsimiititaliami ilaasortat angerlarsimaannaqquneqarnerat atorunnaarsinneqartoq Inatsisartut siulittaasoqarfia ilisimatippaa, Vivian Motzfeldt KNR-imut oqarpoq.

Aningaasaqarnermut ataatsimiititaliami ilaasortat pingasunngormat unnukkulli angerlarsimaannaqquneqarput. 

AAMMA ATUARUK Tamaat isigalugu: Coronavirus pillugu killiffik

Tamanna aningaasaqarnermut ataatsimiititaliami sinniisup coronamik tunillatsissimasumut Aasianniittumut qanimut atassuteqarneranik pissuteqarpoq, taannalu aningaasaqarnermut ataatsimiititaliami ataatsimeeqataasimalluni.

Aningaasaqarnermut ataatsimiititaliami ilaasortat mianersornissaq pissutigalugu pingasunngornermi unnukkut angerlarsimaannartitaalerput, tamannalu pissutigalugu Inatsisartuni sisamanngornermi ataatsimiinnissat taamaatiinnarneqarlutik.

Tunillatsissimasup Aasianniittup corona pillugu malittarisassat malissimanngilai. Pineqartup ulluni tallimani sivisussuseqartumik angerlarsimaannaqqusaanermi piumasaqaatit malinnagit pulaartoqarsimavoq – taamaalillunilu pineqartoq allanut tunillaasimasinnaalluni.

SIsimiuni Sanaartornermik Ilinniarfimmi KTI-mi atuartut 80-it ulluni angerlartinneqarput. Atuartut nutaat ilaata tunillatsissimasoq Aasianniittoq qanillisimasimammagu atuarfik taama aalajangersimasoq, forstanderi, Jakum Møller nassuiaavoq.

Aasianni inuit qulit missaanniittut angerlarsimaannartinneqarput.